މިނިސްޓްރީ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމަންޓް ހިންގުން ވަގުތީގޮތުން ޓޫރިޒަމް މިނިސްޓަރ ޢަލީ ވަޙީދާއި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ހަވާލުކުރައްވައިފިއެވެ.
މިކަން ރައީސުލްޖުމްހޫރިއްޔާގެ ތަރުޖަމާން އިބްރާހީމް ހޫދު ވަނީ ޕީއެސްއެމް ނިއުސްއަށް ކަށަވަރުކޮށްދެއްވާފައެވެ. ހޫދު ވިދާޅުވީ، ޔޫތު މިނިސްޓްރީ ހިންގުން ވަގުތީގޮތުން މިނިސްޓަރ ޢަލީ ވަޙީދާއި ހަވާލުކޮށްފައިވަނީ ވަކި މުއްދަތެއް ނެތިކަމަށެވެ.
އެމްއެމްޕީއާރުސީގެ ޚިޔާނާތުގެ ފައިސާ އެންމެ ގިނައިން ވަދެފައިވާ އެސްއޯއެފް ކުންފުނީގެ އެކައުންޓުން މިހާރުގެ ޔޫތު މިނިސްޓަރ އަޙްމަދު މަހްލޫފްގެ އެކައުންޓަށް 33000 (ތެއްތިރީސް ހާސް) އެމެރިކާ ޑޮލަރު ނުވަތަ 539،700 (ފަސް ސަތޭކަ ތިރީސް ނުވަހާސް ހަތް ސަތޭކަ) ރުފިޔާ ޖަމާކޮށްފައިވާކަން އޭސީސީގެ ރިޕޯޓުން ހާމަވުމާއި ގުޅިގެން މަޙްލޫފް ގޭގައި މަޑުކުރެއްވުމަށް ރައީސް އިބްރާހީމް މުޙައްމަދު ޞާލިޙް ވަނީ އަންގަވާފައެވެ.
މީ ފަހުގެ ތާރީހެއްގައި ކެބިނެޓްގައި ހިމެނިވަޑައިގަންނަވާ ވަޒީރެއްގެ މައްޗަށް ކޮރަޕްޝަން ތުހުމަތުތަކެއް ކުރެއްވުމުން ގޭގައި މަޑުކުރައްވަން އެންގެވި ފުރަތަމަ ފަހަރުކަންވެސް ފާހަގަކޮށްލެވޭ.
މިނިސްޓަރ މަހްލޫފް ގޭގައި މަޑުކުރައްވަން އެންގެވީ އެންޓި ކޮރަޕްޝަން ކޮމިޝަން (އޭސީސީން) އެމްއެމްޕީއާރްސީ ޚިޔާނާތާގުޅޭގޮތުން ނެރުނު ރިޕޯޓާއި ގުޅިގެން އެ މައްސަލަ ތަޙްޤީގު ނިމެންދެންކަމަށް ރައީސް އޮފީހުން ވަނީ ހާމަކުރައްވާފައެވެ.
މަޙްލޫފް ވަނީ އެމްއެމްޕީއާރުސީގެ ޚިޔާނަތުގެ ފައިސާގައި ޖެހިފައިވާކަން ސާބިތުވެއްޖެނަމަ މަޤާމުން އިސްތިއުފާދެއްވާނެކަމަށް ވިދާޅުވެފައެވެ.
މިނިސްޓަރ މަޙްލޫފުގެ އިތުރުން ހައުސިންގ މިނިސްޓަރީގެ ސްޓޭޓް މިނިސްޓަރ އަކްރަމް ކަމާލުއްދީންގެ އެކައުންޓަށް 30000 (ތިރީސް ހާސް) އެމެރިކާ ޑޮލަރު ނުވަތަ 462،600 (ހަތަރު ސަތޭކަ ފަސްދޮޅަސް ދެ ހާސް ހަސަތޭކަ) ރުފިޔާ އެސްއޯއެފުން ޖަމާކޮށްފައިވާ މައްސަލާގައި އޭނާވެސް ގޭގައި މަޑުކުރެއްވުމަށް ރައީސުލްޖުމްހޫރިއްޔާ ވަނީ އަންގަވާފައެވެ.