އިންޑިއާގެ ޖަވާހަރުލާލު ނެހެރޫ ޔުނިވަރސިޓީގައި، ރާއްޖޭގެ ކުރީގެ ރައީސް މުޙައްމަދު ނަޝީދު، ޑިމޮކްރަސީއާއި ގުޅޭގޮތުން ތަޤްރީރުކުރައްވައިފިއެވެ.
ރައީސް ނަޝީދު އިންޑިއާއަށް މިހާރު ކުރައްވަމުން ގެންދަވާ ދަތުރުފުޅަކީ ކައުންސިލް ފޯރ ކަލްޗަރަލް ރިލޭޝަންސްގެ ދަޢުވަތަކަށާއި، ޖަވާހަރުލާލު ނެހެރޫ ޔުނިވަރސިޓީގެ ދަޢުވަތަކަށް ކުރައްވާ ދަތުރުފުޅެކެވެ.
ޖަވާހަރުލާލު ނެހެރޫ ޔުނިވަރސިޓީގައި މިއަދު މެންދުރުފަހު ރައީސް ނަޝީދު ދެއްވި ތަޤްރީރުގައި އަލިއަޅުއްވާލައްވާފައިވަނީ އޭޝިއާ ސަރަޙައްދުގެ ޑިމޮކްރަސީއާއި ޤައުމުތަކުގެ ސުލްހަ މަސަލަސްކަމާއި ޚިޔާނާތާއި ދެކޮޅަށް ކުރެވޭނެ މަސައްކަތްތަކާއި ގުޅޭގޮތުންނެވެ.
ރައީސް ނަޝީދއަކީ ޑިމޮކްރަސީއަށާއި، މޫސުމަށް އަންނަ ބަދަލުތަކާއި ގުޅޭގޮތުން އެމަނިކުފާނު ކުރައްވާ މަސައްކަތްޕުޅަށް ސަރަޙައްދީ ޤައުމުތަކުންނާއި ދުނިޔޭގެ ޤިނަ ޤައުމުތަކުގެ މެދުގައި ވަރަށް ބޮޑު މަޤްބޫލުކަމެއް ލިބިވަޑައިގެންފައިވާ ބޭފުޅެކެވެ.
އިންޑިއާއަށް ފުރާ ވަޑައިގަތުމުގެ ކުރިން ރައީސް ނަޝީދު މީޑިއާ އާއި ބައްދަލުކުރައްވާ ވިދާޅުވެފައިވަނީ، ދިވެހިރާއްޖޭގެ ސަލާމަތާއި ރައްކާތެރިކަން އެންމެ ބޮޑަށް ގުޅިފައިވާ ޤައުމަކީ އިންޑިއާ ކަމަށާއި އެހެން ނަމަވެސް ދުވަހަކުވެސް ރާއްޖެ އަޅުވެތި ކުރުމަށް އެ ޤައުމުން މަސައްކަތް ކޮށްފައިނުވާ ކަމަށެވެ. އަދި ރައީސް ނަޝީދު ވިދާޅުވީ ރާއްޖެއާ އިންޑިއާއާ ދެމެދު އޮންނަ ގުޅުމުގެ ސަބަބުން ރާއްޖޭގެ މިނިވަން ކަމަށް އެއްވެސް ބުރުލެއް ނާރާނެ ކަމަށެވެ.