ރާއްޖޭގައި ޢިމާރާތްކުރާ އެންމެ ބޮޑު ސްކޫލްގައި އަންނަ އަހަރު ކިޔަވައިދޭން ފަށާނެ - އެޑިއުކޭޝަން
ހުޅުމާލޭ ނެއިބަރހޫޑް އެކެއްގައި އިމާރާތްކުރާ "އެން-ވަން" ސްކޫލްގެ މަސައްކަތް ނިންމާ އަންނަ ދިރާސީ އަހަރުގައި ކިޔަވައިދޭން ފަށާނެކަމަށް އެޑިއުކޭޝަން މިނިސްޓްރީން ބުނެފިއެވެ.
އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އަޙްމަދު ޝަފީއު ވިދާޅުވީ ހޫޅުމާލޭގައި އިމާރާތްކުރަމުންދާ އެން-ވަން ސްކޫލްގެ ބޮޑުބައެއް ނިމިފައިވާކަމަށާއި އަންނަ މަހުގެ ތެރޭގައި ސަރުކާރާ އެ ސްކޫލް ހަވާލުކުރަން ނިންމާފައިވާކަމަށެވެ. އަދި ސްކޫލްއަށް ހޯދަންޖެޙެ ފަރުނިޗަރ ތައް ހޯދުމަށް މިހާރު އިޢުލާންކޮށްފައިވާކަމަށާއި މިނިސްޓްރީން ކުރަންޖެހޭ ކަންތައްތައް ކުރަމުންދާކަމަށްވެސް ޝަފީޢު ވިދާޅުވިއެވެ. މިގޮތުން ނޮވެމްބަރު މަހުގެ ތެރޭގައި ޓީޗަރުން ހޯދުމުގެ މަސައްކަތް ފަށާނެކަމަށާއި ހުޅުމާލޭގެ ސްކޫލްތަކުގައި މިހާރު ތިބި ޓީޗަރުންނަށްވެސް އަލަށް އިމާރާތްކުރާ ސްކޫލްގައި ކިޔަވއިދިނުމުގެ ފުރުޞަތުވެސް އޮންނާނެކަމަށް އެޑިއުކެޝަން މިނިސްޓްރީން ބުނެއެވެ.
ޒަމާނީ ވަސީލަތްތަކާއެކު އިމާރާތްކުރަމުންދާ މި ސްކޫލްގައި ދެދަންފަޅީގައި 1200 އާއި 2000 ހާ ގާތްކުރާ އާދަދަކަށް ކިޔަވައިދެވޭނެކަމަށް އެޑިއުކޭޝަން މިނިސްޓްރީން ބުނެއެވެ. ހުޅުމާލޭގެ ނެއިބަރހޫޑް އެކެއްގައި އިމާރާތްކުރާ "އެން-ވަން" ސްކޫލްއަކީ 7 ބުރީގެ 3 ބްލޮކާއެކު ތަރައްޤީކުރާ މި ސްކޫލްއަކީ 1680 ކުދިންގެ ޖާގައިގެ ސްކޫލެކެވެ. އެންމެ ފަހުގެ ޒަމާނީ ވަސީލަތްތަކާއެކު އިމާރާތްކުރާ މިސްކޫލުގައި ޕްރައިމެރީ އަދި ސެކަންޑްރީ ގްރޭޑްތަކަށް ޚާއްޞަކޮށްގެން 50 ކްލާސްރޫމް ހުންނާނެއެވެ.