އދގެ މަސައްކަތްތަކަށް ކަނޑައަޅާފައިވާ ބަޖެޓާއި އެ ޖަމާޢަތުގެ މުވައްޒަފުންނަށް މުސާރަ ދިނުމަށް ކަނޑައަޅާފައިވާ ބަޖެޓް ހުސްވަމުންދާކަމަށް އދގެ ސެކްރެޓަރީ ޖެނެރަލް އެންތޯނިއޯ ގުޓޭރޭޝް ވިދާޅުވެއްޖެއެވެ.
މިދިޔަ ބުދަ ދުވަހު، އދގެ މެމްބަރު ޤައުމުތަކަށް ފޮނުއްވި ސިޓީއެއްގައި ގުޓޭރޭޝް ވިދާޅުވީ، އދގެ އަސާސީ ބަޖެޓްގެ ދަރަނި މި ވަގުތު ހުރީ ސަތޭކަ ތިރީސް ނުވަ މިިލިއަން ޑޮލަރުގައި ކަމަށާއި، މިއީ އަހަރުގެ ކުރީކޮޅު ބަޖެޓަށް މިފަދަ ހީނަރުކަމެއް ލިބުނު ފުރަތަމަ ފަހަރު ކަމަށެވެ. ގުޓޭރޭޝް ވިދާޅުވީ، އދ ފަދަ ޖަމާޢަތަކަށް މި ފަދަ މާލީ ގޮންޖެހުންތަކާ ކުރިމަތިލާން ޖެހިގެންނުވާނެ ކަމަށާއި، މި ގޮންޖެހުމުތަކުގެ ސަަބަބުން އެންމެ ބޮޑު އަސަރެއް ކުރާނީ އެ ޖަމާޢަތުން އެހީވާ ފަރާތްތަކަށްކަމަށެވެ.
އދގެ ސެކްރެޓަރީ ޖެނެރަލް ވަނީ މެމްބަރު ޤައުމުތަކުން އދއަށް ދޭން ޖެހޭ މާލީ އެހީ، ވީ އެންމެ އަވަހަށް ދިނުމަށްވެސް ގޮވާލާފައެވެ. 2017 ވަނަ އަހަރުގެ ޑިސެމްބަރު މަހު އދގެ ޢާއްމު މަޖިލީހުން ވަނީ، 2018 އިން 2019 ވަނަ އަހަރަށް އދގެ އާސާސީ ބަޖެޓަކީ، ފަހެއް ޕޮއިންޓް ހަތަރު ބިިލިއަން އެމެރިކާ ޑޮލަރު ކަމުގައި ކަނޑައަޅާފައެވެ.
އދން ބުނާގޮތުން އދގެ 193 މެމްބަރު ގައުމުތަކުގެ ތެރެއިން އެ ޤައުމުތަކުން އދއަށް ދައްކަންޖެހޭ ބައި މިހާތަނަށް ދައްކާފައިވަނީ 112 ޤައުމުންނެވެ. މީގެ ތެރޭގައި އދގެ ސަލާމަތީ މަޖިލީހުގެ ދާއިމީ މެމްބަރު ޤައުމުތައްވެސް ހިމެނެއެެވެ.