އީރާނުގެ ނިއުކްލިޔަރ މައްސަލައިގައި އެމެރިކާއިން އީރާނާ ދެކޮޅަށް އަޅާ ދަތިކުރުމުގެ ފިޔަވަޅުތަކުން އީރާނުގެ ތެލުގެ އެކްސްޕޯޓަށް ހުއްޓުމެއް އަތުވެއްޖެނަމަ، އެ ސަރަހައްދުގެ އެހެން ޤައުމުތަކުން ތެޔޮ އެކްސްޕޯޓްކުރަން ހުރަސް އަޅާނެކަމުގެ އިންޒާރު، އީރާނުގެ ރައީސް ހަސަން ރޫޙާނީ ދެއްވައިފިއެވެ.
އީރާނުގެ ރިޔާސީ އޮފީހުގެ ވެބްސައިޓްގައި ޝާއިޢުކޮށްފައިވާ ބަޔާނެއްގައި ރޫޙާނީ ވިދާޅުވެފައިވަނީ އީރާނުން އެކްސްޕޯޓްކުރާ ތެޔޮ ހުއްޓުވުމަށް އެމެރިކާއިން މަސައްކަތް ކުރާނެކަމަށް ބުނެފައިވާ އިރު، ސަރަހައްދުގެ އެހެން ޤައުމުތަކުން ތެޔޮ އެކްސްޕޯޓްކުރުން ނުހުއްޓުވާ، އީރާނުން ތެޔޮ އެކްސްޕޯޓުކުރުން ހުއްޓުވުމުގެ މާނައެއް ނެތްކަމަށެވެ.
ސްވިޓްޒަލޭންޑަށް މިހާރު ކުރައްވަމުން ގެންދަވާ ދަތުރުގައި މިކަމާ ބެހޭގޮތުން އިތުރަށް ވާހަކަދައްކަވަމުން ރޫޙާނީ ވިދާޅުވީ، އެމެރިކާގެ ފިޔަވަޅުތަކުގެ ސަބަބުން ތެޔޮ އެކްސްޕޯޓް ނުކުރެވޭނެ ހަމައެކަނި ޤައުމަކީ އީރާނު ކަމަށް ދުށުމަކީ ގޯހެއް ކަމަށާއި ތެޔޮ ވިއްކައިގެން އީރާނަށް ލިބޭ ޢާމްދަނީ އެމެރިކާއަށް ނުހުއްޓުވޭނެ ކަމަށެެވެ.
އީރާނުން މީގެ ކުރިން ވެސް ވަނީ އެމެރިކާއިން އަޅާ ފިޔަވަޅުތަކުގެ ރައްދުގައި ހަރްމޫޒްގެ ކަނޑުއޮޅި ބަންދުކުރާނެ ކަމުގެ އިންޒާރު ދީފައެވެ. މި ކަނޑުއޮޅިއަކީ ގަލްފުގެ ޤައުމުތަކުން ދުނިޔޭގެ އެހެން ޤައުމުތަކަށް ތެޔޮ ގެންދިއުމުގައި ބޭނުން ކުރާ މުހިއްމު މަގެކެވެ.