އުތުރު ކޮރެއާގެ ނިއުކްލިޔަރ ޕްރޮގްރާމް އެއް އަހަރުގެ ދުވަހުގެ ތެރޭގައި ހުއްޓާލެވޭނެކަމަށާއި އެމެރިކާއިން މިކަމަށް މަސައްކަތް ކުރާނެކަމަށް އެމެރިކާގެ ޤައުމީ ސަލާމަތާ ބެހޭ މުޝީރު ޖޯން ބޯލްޓަން ވިދާޅުވެއްޖެއެވެ.
އެމެރިކާގެ ސީ.ބީ.އެސް ނިއުސަށް ދެއްވި ބަސްދީގަތުމެއްގައި ބޯލްޓަން ވިދާޅުވީ، އުތުރު ކޮރެއާގައި ހުރި ނިއުކްލިޔަރ، ކެމިކަލް އަދި ބަޔަލޮޖިކަލް ހަތިޔާރު އެއް އަހަރު ދުވަހުގެ ތެރޭގައި ނައްތާލުމަށް އެމެރިކާއިން ޚާއްޞަ ޕްރޮގްރާމެއް އެކުލަވާލާފައިވާ ކަމަށެވެ.
އެހެންނަމަވެސް މިކަން އެންމެ ފުރިހަމަ ގޮތުގައި ކާމިޔާބުވާނީ އުތުރު ކޮރެއާއިން މިކަމަށް ފުރިހަމަ އެއްބާރުލުން ދީގެން ކަމަށާއި މިކަމުގައި އުތުރު ކޮރެއާއިން އެއްވެސް މަޢުލޫމާތެއް ސިއްރުކޮށްގެން ނުވާނެކަމަށްވެސް ބޯލްޓަން ވިދާޅުވިއެވެ.
ބޯލްޓަން ވިދާޅުވީ، އެމެރިކާގެ މި ހުށަހެޅުން އެގައުމުގެ ޚާރިޖީ ވަޒީރު މައިކް ޕޮމްޕެއޯ ދާދި އަވަހަށް އުތުރު ކޮރެއާއަށް ހުށަހަޅުއްވާނެ ކަމަށާއި، މިކަމަށްޓަކައި ޕޮމްޕެއޯ ދާދި އަވަހަށް އުތުރު ކޮރެއާއަށް ޒިޔާރަތްކުރައްވާނެ ކަމަށެވެ.
އުތުރު ކޮރެއާގެ އނިއުކްލިޔަރ ހަތިޔާރު ނައްތާލުމަށް އެގައުމުން އެއްބަސްވެފައިވާނަމަވެސް އެއީ ކިހާ ހަތިޔާރެއްކަމެއް އެގައުމުން މީގެ ކުރިން ބުނެފައެއް ނުވެއެވެ. އަދި މިފަދަ މަޢުލޫމާތެއް އެމެރިކާގެ ޖާސޫސީ އިދާރާތަކަށްވެސް ލިބިފައި ނުވާކަމަށް އެފަރާތްތަކުން ބުނާ އިރު، ހަތިޔާރުތައް ނައްތާލެވޭނެ އަސްލު ތާވާލެއް އެކުލަވާލެވޭނީ މި މަޢުލޫމާތާ އެކުގައިކަމަށް ތަޖުރިބާކާރުން ބުނެއެވެ.