މިޔަންމާގެ ރަކާން ސްޓޭޓްގައި ބައިމަދު ރޮހިންޔާ މުސްލިމުންނާ ދެކޮޅަށް ހިންގި ޖަރީމާތަކަށް ރެކެން، ބަންގްލަދޭޝްއަށް ދިޔަ އެތައް ހާސް ބަޔަކު އަނބުރާ މިޔަންމާއަށް ގެންދެވޭނެ ފަދަ ހާލަތެއް ރަކާން ސްޓޭޓްގައި އަދިވެސް ޤާއިމުކުރެވިފައި ނުވާކަމަށް ބައިނަލްއަޤްވާމީ ރެޑް ކްރޮސް ޖަމާޢަތުގެ އިސްވެރިޔާ ވިދާޅުވެއްޖެއެވެ. ރެޑް ކްރޮސް ގެ އިސްވެރިޔާ ޕީޓަރ މައުރަރ މިހެން ވިދާޅުވެފައިވަނީ، ރަކާންގެ އިތުރުން ރޮހިންޔާ މުސްލިމުން މިހާރު ދިރިއުޅޭ ބަންގްލަދޭޝްގެ ވަގުތީ ކޭމްޕްތަކަށް ކުރެއްވި ދަތުރަކަށް ފަހުގައެވެ.
މައުރަރ ވިދާޅުވީ، އެ ދަތުރުގައި އޭނާއަށް ފެނިވަޑައިގެން ކަންކަމަށް ރިއާޔަތްކުރެއްވުމަށްފަހު، ކައިރި މުސްތަޤުބަލެއްގައި ރެފިއުޖީން އަލުން ރަކާނަށް ބަދަލުކުރުމަކީ ވާނެކަމެއް ނޫންކަމަށް ދެކެވަޑައިގަންނަވާކަމަށެވެ. އަދި އެތައް ބައިވަރު މީހުން އެއްފަހަރާ އަނބުރާ ގެނައުމުގެ ކުރިން ރަކާންގައި ގިނަ މަސައްކަތްތަކެއް އަދި ކުރަން ޖެހޭ ކަމަށްވެސް މައުރަރ ވިދާޅުވިއެވެ.
މި ގޮތުން އުމްރާނީ ގޮތުންނާއި އިޖްތިމާޢީ ގޮތުން މިކަމަށް އަދި ތައްޔާރުވާން ޖެހޭ ކަމަށްވެސް އޭނާ ވިދާޅުވިއެވެ. މިދިޔަ އަހަރުގެ އޯގަސްޓް މަހު އެންމެ ފަހުން މިޔަންމާގެ އަސްކަރިއްޔާއިން ރޮހިންޔާ މުސްލިމުންނާ ދެކޮޅަށް ހިންގި ޖަރީމާތަކުގެ ސަބަބުން ހަތް ސަތޭކަ ހާސް މީހުން އަވަށްޓެރި ބަންގްލަދޭޝަށް ހިޖުރަކޮށްފައިވާއިރު، މި މީހުން އަނބުރާ ގައުމަށް ފޮނުވުމާ މެދު މިޔަންމާ އާއި ބަންގްލަދޭޝުން އެއްބަސްވުމަށް އައިސްފައިވަނީ މިއަހަރުގެ ކުރީކޮޅުގައެވެ.