އީރާނުގެ ނިއުކްލިޔަރ މައްސަލައާ ބެހޭގޮތުން 2015 ވަނަ އަހަރު ޤާއިމުކުރި އެއްބަސްވުމުން އެމެރިކާ ވަކިކުރާނީތޯ ނުވަތަ ނޫންތޯ އަންގާރަ ދުވަހު އިޢުލާނުކުރައްވާނެކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
މިކަމާ ބެހޭގޮތުން ކުރެއްވި ޓްވީޓެއްގައި އެމެރިކާގެ ރައީސް ޓްރަމްޕް ވިދާޅުވީ، އެމެރިކާގެ ސަރުކާރުގެ ނިންމުން އިޢުލާންކުރައްވާނީ އެމެރިކާ ގަޑިން މެންދުރު ދޭއް ޖަހާއިރު ވައިޓްހައުސްގައި ބާއްވާ ނޫސްވެރިންގެ ބައްދަލުވުމެއްގައިކަމަށެވެ.
ޓްރަމްޕް ވަނީ 2015 ވަނަ އަހަރުގެ އެއްބަސްވުމަށް އެކި ފަހަރުގެ މަތިން ހަރުކަށި ފާޑުކިއުންތައް އަމާޒުކުރައްވާފައެވެ. އެމެރިކާއިން އީރާނުގެ ނިއުކްލިޔަރ މައްސަލައިގައި އެ ޤައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް، ލުއިނުކުރާނެކަމަށް ޓްރަމްޕް އިޢުލާނުކުރައްވައިފިނަމަ މި އެއްބަސްވުމުން އެމެރިކާ ވަކިވެގެންދާނެކަމަށް މުރާސިލުން ބުނެއެވެ.
އެމެރިކާގެ ވައިޓްހައުސްގެ އޮފިޝަލަކު ވިދާޅުވީ، މި އެއްބަސްވުމާ މެދު ޓްރަމްޕްގެ ހުންނެވި ކަންބޮޑުވުންތަކަށް އެކަށިގެންވާ ހައްލު ހޯދުމުގައި ވިލާތުގެ ބާރުތައް ކަމަށްވާ އިނގިރޭސިވިލާތް، ފަރަންސޭސިވިލާތް އަދި ޖަރުމަނުވިލާތުން ކުރަމުންދާ މަސައްކަތުގައި ގިނަ ކާމިޔާބީތަކެއް ހޯދާފައިވާކަމަށެވެ. އެހެންނަމަވެސް، އެމެރިކާގެ ރައީސް މި މަސައްކަތްތަކަށް އިޖާބަދެއްވާނެކަމެއް ނުވަތަ ނޫންކަމެއް އެނގޭނީ އެ އިޢުލާންކުރީމާކަމަށް އެމެރިކާގެ އޮފިޝަލު ވިދާޅުވިއެވެ.