އިދިކޮޅު ފަރާތްތަކުން މިސަރުކާރާމެދު ހަސަދަވެރިވަނީ، އެފަރާތްތަކުން ސަރުކާރު ހިންގިއިރު ޤައުމަށް ގެނެސްފައިނުވާވަރުގެ ތަރައްޤީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ޒައާމަތުގައި ޤައުމަށް ގެންނަމުންދާތީކަމަށް އެންވާރަމަންޓް މިނިސްޓަރ ޠާރިޤް އިބްރާހިމް ވިދާޅުވެއްޖެއެވެ.
މިނިސްޓަރ ތޯރިޤް މިހެން ވިދާޅުވީ ށ.މިލަންދޫގައި ސާފުފެނުގެ ނިޒާމް ޤާއިމްކުރުމުގެ މަޝްރޫ ފައްޓަވާދެއްވާ އެރަށުގައި އޮތް ރަސްމިއްޔާތެއްގައި ވާހަކަ ދައްކަވަމުންނެވެ.
ށ. މިލަންދޫގައި ސާފުފެނުގެ ނިޒާމު ޤާއިމްކުރުމުގެ އަމަލީ މަސައްކަތް ފެށުމުގެ ރަސްމިއްޔާތުގައި އެންވާރަމެންޓް މިނިސްޓަރ ޠާރިޤް އިބްރާހިމް ދެއްކެވި ވާހަކަފުޅުގައި ވަނީ މިދިޔަ ހަތަރު އަހަރުގެ ތެރޭގައި ސަރުކާރުން މިލަންދޫއަށް ގެނެސްދީފައިވާ ތަރައްޤީއަށް އަލިއަޅުއްވާލައްވާފައެވެ.
ސަރުކާރުން ދިވެހި ރައްޔިތުންގެ ތަރައްޤީއަށް ކުރަމުންދާ މަސައްކަތްތަކަށް އަލިއަޅުއްވާލައްވަމުން މިނިސްޓަރ ވިދާޅުވީ އިދިކޮޅު ފަރާތްތަކުން މަސައްކަތްކުރަނީ ސަރުކާރުން ދިވެހި ރައްޔިތުންގެ ތަރައްޤީއަށް ކުރަމުންދާ މަސައްކަތް ހުއްޓުވުމަށް ކަމަށެވެ. އަދި އިދިކޮޅު ފަރާތްތަކުން މި ސަރުކާރާމެދު ހަސަދަވެރިވަނީ އެފަރާތްތަކުން ސަރުކާރު ހިންގިއިރު ޤައުމަށް ގެނެސްދެވިފައިނުވާވަރުގެ ތަރައްޤީގެ ބޮޑެތި މަޝްރޫޢުތައް މި ސަރުކާރުން ދިވެހި ރައްޔިތުންނާ ހަމައަށް ގެނެސްދެމުންދާތީކަމަށެވެ.
މިނިސްޓަރ ޠާރިޤުގެ ވާހަކަފުޅުގައި ވަނީ ރައީސް މައުމޫނާއި ރައީސް ނަޝީދުގެ ސަރުކާރުގައިވެސް ބޮޑެތި ކޮރަޕްޝަންގެ މައްސަލަތަކެއް ފެންމަތިވެ އެމައްސަލަތައް ނުބަލާ ދޫކޮށްލާފައިވާކަމަށް ތުހުމަތު ކުރައްވާފައެވެ. މިނިސްޓަރ ވިދާޅުވީ އެ ސަރުކާރުތަކުން މިފަދަ މައްސަލަތައް ނުބަލާ ދޫކޮށްލިނަމަވެސް މި ސަރުކާރުން ކޮރަޕްޝަންގެ މައްސަލަތަކާ ދެކޮޅަށް ތެދުވާނެކަމަށާ، އެފަދަ މައްސަލަތައް ބަލާނެކަމަށެވެ.
މިނިސްޓަރ ޠާރިޤުގެ ވާހަކަފުޅުގައި ވަނީ މި ސަރުކާރުން ރައްޔިތުންގެ ތަރައްޤީ ހިންގާފައިވާ މަޝްރޫޢުތަކަށް އަލިއަޅުއްވާލައްވާފައެވެ. މިނިސްޓަރ ވިދާޅުވީ ރައީސް ޔާމީނުގެ ޒައާމަތުގައި ރާއްޖޭގެ އެކި ރަށްރަށުގައި ފަސްދޮޅަސް ހަތަރަކަށްވުރެ ގިނަ ނަރުދަމާ މިއަހަރު ނިމޭއިރު ޤާއިމްކުރެވިގެންދާނެކަމަށެވެ. ނަމަވެސް ރައީސް މައުމޫންގެ ތިރީސް އަހަރާއި ރައީސް ނަޝީދުގެ 3 އަހަރު އަޅާކިޔާއިރު، އެ ތިރިސް ތިން އަހަރުގައިވެސް ރާއްޖޭގައި ޤާޢިމްކުރެވުނީ ހަމައެކަނި އެންމެ ތިރީސް ނަރުދަމާ ކަމަށެވެ.
މިނިސްޓަރ ތާރިޤް ވިދާޅުވީ ކޮންމެ މީހަކު ރައީސްކަމުގައި ހުންނެވި ނަމަވެސް ރައްޔިތުން ބޭނުންވާ ކަންކަމުގައި އެދޭނެކަމަށާ، ނަމަވެސް ކުރީގެ ރައީސުން ރައްޔިތުންގެ އަޑު އަހާފައި ނުވާކަމަށެވެ. ނަމަވެސް ރައީސް ޔާމީނަކީ ރައްޔިތުންގެ އަޑު އަހާ، ރައްޔިތުން ބޭނުންވާ ތަރައްޤީ ގެނުވުމުގައި ދެމިހުރި ވެރިއެއްކަމަށް މިނިސްޓަރ ވިދާޅުވިއެވެ. އަދި ޤައުމުގެ ކޮންމެ ދިމާލަކަށް ބެލިއަސް މި ސަރުކާރުން ގެންނަމުންދާ ތަރައްޤީ ފެންނާނެކަމަށާ މި ތަރައްޤީ ދަމަހައްޓާ، ކުރިމަގު އުޖާލާކުރުމަށް އިތުރު ފަސް އަހަރަށް ރައީސް ޔާމީން ހޮވަން ޖެހޭކަމަށް މިނިސްޓަރ ވިދާޅުވިއެވެ.