ށ. މިލަންދޫގައި ސާފުފެނުގެ ނިޒާމު ޤާއިމުކުރުމުގެ މަސައްކަތް ފަށައިފިއެވެ.
މިލަންދޫގައި އޮތް ޚާއްޞަ ރަސްމިއްޔާތެއްގައި މި މަސައްކަތް އަމަލީގޮތުން ފައްޓަވައިދެއްވީ މިނިސްޓަރ އޮފް އެންވާރަމަންޓް އެންޑް އެނަރޖީ، ތޯރިޤް އިބްރާހިމްއެވެ.
މި މަޝްރޫއަކީ ދެމެހެއްޓެނިވި ގޮތެއްގައި އެންމެނަށް ރައްކާތެރި ސާފު ފެން ފޯރުކޮށްދިނުމަށް ސަރުކާރުން ފަށާފައިވާ މަޝްރޫޢުގެ ދަށުން ކުރިއަށްގެންދާ މަޝްރޫޢެކެވެ.
މިމަޝްރޫޢުގެ ދަށުން ށ. މިލަންދޫގައި 29 ކިލޯމީޓަރުގެ ބޯފެނުގެ ވިއުގައެއް ޤާއިމްކުރެވޭނެއެވެ. އަދި ގަޑިއަކު 10 ޓަނުގެ ފެންއުފައްދާ ދެ އާރު.އޯ ޕްލާންޓް ބެހެއްޓޭނެއެވެ. މިދެ ޕްލާންޓުން ދުވާލަކު 164 ޓަނުގެ ފެން އުފެއްދޭނެކަމަށް އެންވާރަމެންޓް މިނިސްޓްރީއިން ބުނެއެވެ. މި މަޝްރޫޢު ނިމޭއިރު ށ. މިލަންދޫގެ ހުރިހާ ގޭބީސީއަކަށާއި މުއައްސަސާތަކަށް ސާފު ފެނުގެ ޚިދުމަތް ދެވޭނެކަމަށް އެންވާރަމެންޓް މިނިސްޓްރީން ބުނެއެވެ.
އޯޕެކް ފަންޑް ފޯ އިންޓަރނޭޝަނަލް ޑިވެލޮޕްމަންޓް، (އޮފިޑް) ލޯނު އެހީ އާއި ދިވެހި ސަރުކާރުގެ ބަޖެޓުން ޚަރަދުކޮށްގެން ކުރިއަށްގެންދާ މި މަޝްރޫޢުގެ މަސައްކަތް ކުރުމަށް ސަރުކާރުން ހަވާލުކޮށްފައިވަނީ މާލޭ ވޯޓާރ އެންޑް ސްވަރޭޖް ކޮމްޕެނީ ޕްރައިވެޓް ލިމިޓެޑް، (އެމް.ޑަބްލިއު.އެސް.ސީ)އާއެވެ. މިމަޝްރޫއަށް 46 މިލިއަނަށް ވުރެ ގިނަ ރުފިޔާ ޚަރަދުވާނެކަމަށް އެންވާރަމަންޓް މިނިސްޓްރީއިން މަޢުލޫމާތުދެއެވެ.