ކުރީގެ ރައީސް މުހައްމަދުނަޝީދަކީ ވެރިކަމަށް ވަޑައިގަތުމަށްޓަކައި ކޮންމެފަދަ ކަމެއްވެސް ކުރައްވަފާނެ ބޭފުޅެއްކަމަށާ، ބޭރުގެ ފަރާތްތަކުން ރާއްޖޭގެ ދާޚިލީ ކަންކަމަށް ނުފޫޒު ފޯރުވުމަށް، ނަޝީދު ގޮވާލައްވާ ގޮވާލެއްވުމަކީ ޤައުމުގެ ސަލާމަތާއި ރައްކާތެރިކަމަށް އޮތް ބޮޑު ނުރައްކަލެއްކަމަށް ސްރީލަންކާގައި ހުންނަވާ ރާއްޖޭގެ ސަފީރު މުޙައްމަދު ހުސައިން ޝަރީފު ވިދާޅުވެއްޖެއެވެ.
މުޙައްމަދު ހުސައިން ޝަރީފް މިހެން ވިދާޅުވީ ޕީ.އެސް.އެމް ނިއުސްގެ މޯލްޑިވްސް ޓުޑޭގައި ވާހަކަފުޅުދައްކަވަމުންނެވެ.
ޕީ.އެސް.އެމް ނިއުސްއިން އިނގިރޭސިބަހުން ގެނެސްދޭ ޕްރޮގްރާމް މޯލްޑިވްސްޓުޑޭގައި ވާހަކަފުޅު ދައްކަވަމުން ސްރީލަންކާ ގައި ހުންނަވާ ރާއްޖޭގެ ސަފީރު މުޙައްމަދު ހުސައިން ޝަރީފް ވަނީ ރާއްޖޭގެ މިހާރުއުފެދިފައިވާ ސިޔާސީ މައްސަލަތަކަށް އަލިއަޅުވާލައްވާ ވާހަކަފުޅުދައްކަވާފައެވެ.
އެގޮތުން ކުރިއަށް އޮތް ރިޔާސީ އިންތިޚާބުގެ ކުރިން ރާއްޖޭގެ ޤާނޫނީ ސަރުކާރު ބަޣާވާތަކުން ވައްޓާލުމަށް ދާދިފަހުން ބަޔަކު މީހުން ކުރި މަސައްކަތުގެމައްޗަށް ވާހަކަފުޅުދެއްކެވި. އެ ބަޣާވާތް ނާކާމިޔާބުކޮށްލީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްގައްޔޫމްގެ ސަރުކާރުގެ ހަރުދަނާ ވިސްނުމާއި ރޭވުންތެރިކަމުގެ ސަބަބުންކަން ފާހަގަކުރެއްވި. އަދި ޤައުމުގެ ސަލާމަތާއި ރައްކާތެރިކަން ދެމެހެއްޓުމަށްޓަކައި ސަރުކާރުން ކުއްލި ނުރައްކަލުގެ ޙާލަތު ޢިއުލާންކުރިނަމަވެސް އޭގެ ސަބަބުން ރައްޔިތުންގެ ޢާންމު ދިރިއުޅުމުގެ ހައްޤުތަކާއި ދަތުރުފަތުރުގެ ނިޒާމާއި އެހެނިހެން ޢާއްމު ޚިދުމަތްތަކަށް އެއްވެސް ހުރަހެއް ނާންނާނެކަމަށެވެ.
މީގެ އިތުރުން ބޭރުގެ ބައެއްޤައުމުތަކުން ރާއްޖެއަށް ނުފޫޒުފޯރުވުމަށްކުރާ މަސައްކަތުގެ ސަބަބުން ދިމާވާ މައްސަލަތަކުގެ މައްޗަށްވެސް ސަފީރު އަލިއަޅުވާލެއްވިއެވެ. އޭނާ ވިދާޅުވީ ރާއްޖޭގެ އެތެރޭގެ މައްސަލަތަކުގެ ތެރެއަށްބޭރުގެ ނުފޫޒު ފޯރުވުމަށް ކުރީގެ ރައީސް މުހައްމަދު ނަޝީދު ކުރައްވަމުންދާ މަސައްކަތްތަކަކީ ޤައުމުގެ ސަލާމަތާއި ރައްކާތެރިކަމަށް ހުރި ނުރައްކަލެއްކަމަށެވެ.
ނަޝީދަކީ ވެރިކަމަށް ވަޑައިގަތުމަށްޓަކައި ކޮންމެފަދަކަމެއްވެސް ކުރައްވަފާނެ ބޭފުޅެއްކަމަން ސަފީރު ފާހަގަކުރެއްވި. އެހެން ނަމަވެސް މިރާރު ރާއްޖޭގެ ވެރިކަން ކުރާ މައި ޕާޓީ ޕީ.ޕީ.އެމަކީ ޒިންމާދާރުސިޔާސީ ޕާޓީއެއްކަމަށާ، އެޕާޓީން ރާއްޖޭގެ މައްސަލަތަކުގެ ތެރެއަށް ބޭރުގެނުފޫޒުފޯރުވުމަށް ދުވަހަކުވެސް ބާރު ނާޅާނެކަމަށް ސަފީރު ވިދާޅުވިއެވެ. ސަފީރުވަނީ ބޭރު ދުނިޔޭގައި ޤައުމުގެ އަގުވައްޓާލުމަށް މަސައްކަތްނުކޮށް، އިންތިޚާބުގައި ބައިވެރިވެ ވެރިންކަން ހޯދުމަށް މަސައްކަތްކުރުމަށް އިދިކޮޅު ފަރާތްތަކަށް ގޮވާލާފައެވެ.