ނުކުޅެދުންތެރިކަން ހުންނަ ކުދިންނަށް ތައުލިމު ދިނުމަށް ޚާއްސަ "ސެން" ކްލާސްތަކެއް މި އަހަރު ނިމުމުގެ ކުރިން ކޮންމެ އަތޮޅެއްގައި ގާއިމް ކުރައްވާނެ ކަމަށް އެޑިއުކޭޝަން މިނިސްޓަރ ޑރ. އައިޝަތު ޝިހާމް ވިދާޅުވެއްޖެއެވެ.
ނުކުޅެދުންތެރިކަން ހުންނަ ކުދިންނަށް ތައުލީމުގެ ފުރުސަތު އޮތް މިންވަރު ބެލުމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗްއާރުސީއެމް އިން ކުރިއަށް ގެންދާ އިންކުއަރީއަށް ބަޔާން ދެއްވަމުން ޑރ. އައިޝަތު ޝިހާމް ވިދާޅުވީ، ނުކުޅެދުންތެރިކަން ހުންނަ ކުދިންނަށް ދެމެހެއްޓެނިވި ގޮތެއްގައި ތައުލީމު ފޯރުކޮށްދިނުމަށް މިނިސްޓްރީން މިހާރުވެސް މަސައްކަތްތަކެއް ކުރައްވަމުން ގެންދަވާ ކަމަށާއި، އަތޮޅުތެރޭގައި ސެން ކްލާސްތައް ގާއިމް ކުރުމުގައި ބަލާނީވެސް އެއަތޮޅެއްގައި އެންމެ ގިނައިން އެފަދަ ކުދިން ތިބި ރަށެއްގައި ސެން ކްލާސް ގާއިމް ކުރުމަށް ކަމަށެވެ.
މިނިސްޓަރ ވިދާޅުވީ، ނުކުޅެދުންތެރިކަން ހުންނަ ކުދިންނަށް ކިޔަވައި ދިނުމަށް ބޭނުންވާ ޓީޗަރުން ތަމްރީނު ކުރުމުގެ މަސައްކަތްވެސް މިހާރު ފަށާފައިވާކަމަށާއި، ނުކުޅެދުންތެރިކަން ހުންނަ ކުދިންނަށް ތައުލީމު ފޯރުކޮށްދޭ އަމިއްލަ ޖަމްއިއްޔާތަކަށް ޓިޗަރުން ހަމަޖައްސާދެމުންދާ ކަމަށެވެ.