އީރާންގައި ކުރަމުންދާ މުޒާހަރާތަކާ ބެހޭގޮތުން މަޝްވަރާކުރަން އެ ޤައުމުގެ ޤާނޫނު ހަދާ މަޖިލީހުން ތައްޔާރުވެއްޖެއެވެ. މިކަމަށްޓަކައި ޤާނޫނު ހަދާ މަޖިލީހުން ބާއްވާ ޖަލްސާއަށް އީރާނުގެ އަމަނާބެހޭ މުއައްސަސާތަކާއި ޖާސޫސީ އިދާރާތަކާއި އެނޫންވެސް ތަފާތު މުއައްސަސާތަކުގެ އިސްވެރިން ޙާޒިރުވެވަޑައިގެން މައުލޫމާތު ދެއްވުމަށްވަނީ ހަމަޖެހިފައެވެ.
އީރާނުގައި ސަރުކާރާ ދެކޮޅަށް މުޒާހަރާތައް ފަށާފައިވަނީ ތަކެއްޗާއި ޚިދުމަތްތަކުގެ އަގުބޮޑުވުމާ ގުޅިގެންނެވެ. ނަމަވެސް މި މުޒާހަރާތައް ސިޔާސީ މުޒާހަރާތަކަކަށް ބަދަލުވެ، މުޒާހަރާތަކުގެ ބައިވެރިން ވަނީ އީރާނުގެ ރައީސް ހަސަން ރޫޙާނީ އާއި ދީނީ މުރްޝިދު އާޔަތުﷲ އަލީ ޚާމެނާއީގެ އިސްތިއުފާއަށް ގޮވާލާފައެވެ. އަދި މުޒާހަރާތައް ދިގުދެމިގެން ގޮސްފައިވާއިރު މުޒާހަރާތަކުގެ ބައެއް ބައިވެރިންވަނީ ހަމަނުޖެހުން ހިންގައި އީރާނުގެ އާންމު ތަންތަނަށާއި ސަލާމަތީ ބާރުތަކުގެ މަރުކަޒުތަކަށް ޙަމަލާދީ ހަރުކަށި އަމަލުތައް ހިންގަން ފަށާފައެވެ.
ހަމަނުޖެހުން އުފައްދަން ފެށުމާއެކު އީރާނުގެ އަމަނާބެހޭ ފަރާތްތަކުން ބާރުގެ ބޭނުންކޮށް ބާވީހަށްވުރެ ގިނަމީހުން މަރާލުމުގެ އިތުރުން އެތައް ސަތޭކަ ބަޔަކު ހައްޔަރުކޮށްފައިވެއެވެ. އީރާނުގެ ރައީސް ހަސަން ރޫހާނީ ވަނީ ރައްޔިތުންނަށް ކުރިމަތިވާ ދަތިތަކާ ގުޅިގެން އެ މީހުންގެ ޝަކުވާތަކާއި ޝުޢޫރުތައް ސަރުކާރަށް ހާމަކުރުމަށްޓަކައި ސުލްހަވެރިކަމާއެކު މުޒާހަރާ ކުރުމުގެ ހައްގު ރައްޔިތުންނަށް އޮންނާނެކަމަށް ވިދާޅުވެފައެވެ. ނަމަވެސް ހަމަނުޖެހުންތައް އުފައްދައި ސިޔާސީ މަޤްޞަދުތައް ޙާޞިލުކުރުމަށްޓަކައި މުޒާހަރާ ކުރިއަށްގެންދިޔުމުގެ ފުރުޞަތު ނުދެއްވާނޭކަމުގެ އިންޒާރު ރޫހާނީ ދެއްވިއެވެ.
މުޒާހަރާތަކަށް ހަފުތާއެއް ވުމުން، އީރާނުގެ ސަރުކާރަށް ތާއީދުކުރާ އެތައް ސަތޭކަ ހާސް ބަޔަކުވަނީ މުޒަހަރާތަކުގެ ތެރެއަށް ވަދެގެންފައެވެ.
މިއާއެކު ސަރުކާރާ ދެކޮޅަށް ކުރި މުޒާހަރާތައް ބަލިކަށިވެ ސަރުކާރަށް ތާއީދުކުރާ މުޒާހަރާތަކުގެ ބާރު ގަދަވެގެންދިޔައެވެ.
ނަމަވެސް ހޮނިހިރު ދުވަހު އީރާނުގެ ސަރުކާރުންވަނީ މުޒާހަރާތަކުގައި ހައްޔަރުކުރި ހަތަރު ސަތޭކަ ފަންސާހަށްވުރެ ގިނަ މީހުންގެ ތެރެއިން ގިނަ ޢަދަދެއްގެ ބަޔަކު މިނިވަންކޮށްފައެވެ.
އީރާނުގެ ބައެއް ރަށްތަކުގައި މިހާރުވެސް މުޒާހަރާތައް ކުރިޔަށްދެއެވެ. އެހެން ނަމަވެސް މީގެތެރޭގައި ގިނައީ ސަރުކާރަށް ތާއީދުކުރާ ފަރާތްތަކެވެ. އަދި އެ ފަރާތްތަކުން މުޒާހަރާކުރަނީ ސަރުކާރުގެ ދިފާއުގައެވެ.
ސަރުކާރާ ދެކޮޅަށް ކުރާ މުޒާހަރާތައް ކުރިޔަށްގެންދަނީ ރޭގަނޑުގެ ވަގުތުތަކުގައި، އެކަހެރި ބައެއް އަވަށްތަކާއި ވިލެޖްތަކުގައެވެ. ނަމަވެސް މިއީ އީރާނުގެ ސަރުކާރަށް ފިއްތުންތައް ކުރިމަތިކުރެވޭފަދަ މުޒާހަރާތަކެއް ނޫނެވެ. އަދި މި މުޒާހަރާތަކުގައި ލީޑަރޝިޕް ނެތްކަމަށް ޚަބަރުތައް ބުނެއެވެ.