ބޭރުގެ ދައުލަތްތަކުގެ ނުފޫޒު ރާއްޖެއަށް ފޯރުވުމަށް ރާއްޖޭގެ ސިޔާސީ ފަރާތްތަކުން ގޮވާލުމަކީ ލިބިދެވޭނެ ޙައްޤެއް ނޫންކަމަށާއި، ވަކިވަކި ފަރުދުންނަށާއި ޕާޓީތަކަށްވިޔަސް އެފަދަ ހައްޤެއް ނެތްކަމަށް ރައީސުލްޖުމްޙޫރިއްޔާ ޢަބްދުﷲ ޔާމިން ޢަބްދުލްޤައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ބ.ތުޅާދޫ ބަނދަރުގެ މަޝްރޫޢާއި ގޮނޑުދޮށް ޙިމާޔަތްކުރުމުގެ މަޝްރޫޢު އިފްތިތާޙްކުރުމަށް ބޭއްވި ހަފްލާގައި ވާހަކަފުޅުދައްކަވަމުންނެވެ.
ބ.ތުޅާދޫ ރައްޔިތުންނާ ބައްދަލުކުރައްވައި ރައީސުލްޖުމްހޫރިއްޔާ ޢަބްދުﷲ ޔާމިން ޢަބްދުލްޤައްޔޫމް ވަނީ ޑިމޮކްރަސީއާއި ސިޔާސީ ޕާޓީތަކުގެ އަސާސްތަކާއި ދަޢުލަތުގެ ޙައްޤުތަކާ ގުޅޭގޮތުން ވާހަކަފުޅުދައްކަވާފައެވެ.
އެމަނިކުފާނު ވިދާޅުވީ، ދީނާއި ޤައުމުގެ ޙައްޤަކީ ވަކިވަކި ފަރުދުންގެ ޙައްޤުތަކަށްވުރެ މާޤަދަރުވެރިވާނެ ޙައްޤުތަކެއް ކަމަށެވެ. އަދި ފަރުދެއްގެ ޙައްޤަށްވުރެ މުޅި ރައްޔިތުންގެ ޙައްޤު މަތިވެރިވާންޖެހޭނެ ކަމަށާއި، މިފިކުރާ ޚިލާފަށް ވިސްނާ ބަޔަކަށް ދިވެހި ދަޢުލަތުން ފުރުސަތު ދެވިގެންނުވާނެކަމަށް ރައީސް ވިދާޅުވިއެވެ.
ފަރުދީ ހައްޤުތަކާއި ޕާޓީތަކުގެ ޙައްޤު އިސްކޮށް ޤައުމާއި ރައްޔިތުންނަށް ނަފްސާނީ އަދި ޖިސްމާނީ ގޮތުން ގެއްލުންދެވިގެން ނުވާނެ ކަމަށާއި އެފުރުސަތު އެއްވެސްބަޔަކަށް ސަރުކާރުން ނުދެއްވާނެ ކަމަށްވެސް ރައީސް ވިދާޅުވިއެވެ.
ބޭރުގެ ދަޢުލަތްތަކަށް ދިވެހި ދަޢުލަތާއި ގުޅޭގޮތުން ނުބައި މަޢުލުމާތުދީ ދިވެހި ރާއްޖެއަކީ ޙައްދު ފަހަނައަޅާ ދިއުމާއި އިސްލާމް ދީން ނޫން އެހެން ދީންތަކަށް ފުރުސަތު ދޭންޖެހޭ ޤައުމެއްގެ ގޮތުގައި ވާހަކަ ދެއްކުމަކީ މުޅި ރައްޔިތުންގެ ޙައްޤުތަކަށް އަރައިގަތުން ކަމަށްވެސް އެމަނިކުފާނު ވިދާޅުވިއެވެ. އަދި ރާއްޖޭގެ ދާޚިލީ ކަންކަމުގެ ތެރެއަށް ބޭރުގެ ނުފޫޒު ގެނައުމަށް ގޮވާލުމަކީވެސް ސިޔާސީ ޕާޓީތަކަށާއި ސިޔާސީ ލީޑަރުންނަށާއި ކުރީގެ ރައީސްކަން ކުރައްވާފައިވާ ބޭފުޅުންނަށްވެސް ކުރެވޭނެ ކަމެއް ނޫންކަމަށް ރައީސް ޔާމީން ވިދާޅުވިއެވެ.
ޤައުމަށް ގެއްލުން ދިނުމަކީ އެއްވެސް ފަރުދަކަށް ކުރެވޭނެ ކަމެއްނޫންކަން ފާހަގަކުރައްވާ ރައީސް ޔާމީން ވިދާޅުވީ ޕާޓީތަކުގެ ލީޑަރުން އެފަދަ ކަންކަމަށް ގޮވާލާނަމަ ޕާޓީތަކުގެ މެމްބަރުންނަށް އެޕާޓީ ބަދަލުކުރުމުގެ ޙައްޤު އެބައޮތްކަމަށެވެ.
ޑިމޮކްރެޓިކް ޤައުމުތަކުގައި ޕާޓީތަކުގެ އަސާސީ ޤަވައިދުތަކާއި ޤާނޫނީ އުސޫލުތައް ޤާއިމުކޮށްފައި އެބަހުރި ކަމަށާއި އެ އުސޫލުތައް އެ ޤައުމުތަކުގައި ހިފަހައްޓާފައިވާ ގޮތަށް ރާއްޖޭގެ ސިޔާސީ ފަރާތްތަކުންވެސް ފަރުދުންގެ ޙައްޤަށް ޖާގަ ދޭންޖެހޭނީ ޤައުމުގެ ޙައްޤުތަކާއި އުސޫލުތައް އިސްކޮށްގެން ކަމަށްވެސް އެމަނިކުފާނު ވިދާޅުވިއެވެ. މި މޭރުމުން ވާހަކަފުޅުދައްކަވަމުން ރައީސް ޔާމިން ވަނީ އެހެން ދީން ތަކަށް ފުރުސަތު ދިނުމަށް ތާއީދުކުރާ ޕާޓީއަކަށް ޖާގަ ދީގެން ނުވާނޭ ކަމަށް އެމަނިކުފާނު ވިދާޅުވާ ވިދާޅުވުން ތަކުރާރުކުރައްވާފައެވެ.
އިދިކޮޅު ސިޔާސީ ފަރާތްތަކަށް ރައްދު ދެއްވަމުން ރައީސް ޔާމީން ވަނީ އިދިކޮޅު ފަރާތްތަކުން ވެރިކަމުގައި ތިއްބެވިއިރުވެސް ބޭރުގެ ނުފޫޒުތަކަށް ގޮވާނުލެއްވީ ކީއްވެތޯ ސުވާލު އުފައްދަވާފައެވެ.
ރައީސް ޔާމީން ވިދާޅުވީ ކޮންމެ ފިކުރަކަށް ތާއީދުކުރި ނަމަވެސް ޤައުމުގެ ތަރައްޤީއާއި ސުލްޙަ މަސަލަސްކަމާއި އެކުވެރިކަމަށް ފުރުސަތު ދޭންވާނެ ކަމަށެވެ. އަދި ފިކުރު ތަފާތުވި ނަމަވެސް ތަރައްޤީއާއި ދިވެހިންގެ އެއްބައިވަންތަކަމަށް ހުރަސް އަޅައިންގެނުވާނެކަމަށް ރައީސް ވިދާޅުވިވެ.
ރައީސް ޔާމިން ވިދާޅުވީ، ދިވެހި ޤައުމާއި ދިވެހި ފަރުދުންގެ އެންމެ އިސް ވާޖިބަކަށް ވާންވާނީ އިސްލާމް ދީން ދެމެހެއްޓުމާއި ނެގެހެއްޓުންކަމަށެވެ. އަދި އިސްލާމްދީން ރާއްޖޭގައި އޮތުމަކީ ދަޢުލަތައީ ރައްޔިތުންގެ ޙައްޤެއް ކަމަށްވެސް ރައީސް ޔާމިން ވިދާޅުވިއެވެ.