އޭނާގެ މެކްސިމަމް ގްރީން ސްޓްރީޓްސްއަށް ދިނިން ކަމަށާއި، ނިކުތީ ދެކޭގޮތް ބަދަލުކުރަންކަމަށް ގްރީން ސްޓްރީޓްސްގެ ކޯޗުކަމުން ވަކިކުރި ޞޮބާހު މުޙައްމަދު ބުނެފިއެވެ.
އުރީދޫ ދިވެހި ޕްރިމިއަރ ލީގުގައި އެޓީމް ކުޅުނު ފަހު މެޗަށްފަހު ކޯޗުކަމުން ވަކިކުރި ޞޮބާ ބުނީ އޭނާ ކުރީ އުނދަގޫ، ޗެލެންޖް ބޮޑު މަސައްކަތެއް ކަމަށާއި، ނަމަވެސް އެކަމުގައި އޭނާގެ މެކްސިމަމް ދިނިންކަމަށެވެ. އާ ޓީމެއް އަދި މެނޭޖްމަންޓްގައިވެސް ޒުވާން އާ ޓީމެއް އޮވެ ފުރަތަމަ ޑިވިޝަނަށް ނިކުމެ މަސައްކަތް ކުރުމަކީ ފަސޭހަކަމެއް ނޫންކަމަށާއި، އެއީ ޗެލެންޖެއްކަމަށް ޞޮބާ ބުންޏެވެ. ނަމަވެސް އެޗެލެންޖާއެކު ގްރީން ސްޓްރީޓްސްއިން ސީޒަން ފެށީ ވަރަށް ރަނގަޅަށްކަމަށް ކުރިން ބޮޑަތި ގިނަ ކްލަބްތަކާއެކު ކާމިޔާބު ހޯދި ކުޅުންތެރިޔާ ބުންޏެވެ. އޭގެ ހެއްކެއްގެ ގޮތުގައި އޭނާ ފާހަގަކުރީ މާބޮޑު ޚަރަދު ކުރި، ބޮޑަތި ކްލަބްތައް ފަހަތަށް ޖައްސާ އެންމެ ވާދަވެރި ލީގުގެ ދެވަނަ މަޤާމް ހޯދުމެވެ." އަޅުގަނޑާއި، ގްރީން ސްޓްރީޓްސްގެ ސަޕޯޓަރުންނަށް އަޅުގަނޑު ބުނެލަން ބޭނުމީ އަޅުގަނޑުގެ މެކްސިމަމް ދީފީމޭ. އަޅުގަނޑު ނިކުތީ އަޅުގަނޑާ ދޭތެރޭ ދެކޭގޮތާއި، ގްރީން ސްޓްރީޓްސްއާ މެދު ދެކޭގޮތް ބަދަލުކުރަން " އެކަން ކާމިޔާބުވެއްޖެކަން ފާހަގަކުރަމުން ޞޮބާ ބުންޏެވެ.
ޞޮބާ ބުނީ މައްސަލަ ދިމާވީ ސީޒަން ފެށި ގޮތަށް ހިފަހައްޓާނުލެވުން ކަމަށާއި، ދިވެހި ލީގުގެ ފަހު ތިން މެޗުގައި މަސައްކަތްކުރީ ބާރަ، ތޭރަ ވަރަކަށް ކުޅުންތެރިންނާއެކުކަމަށެވެ.
" މިސާލަކަށް މެޗެއްގަ ހަތްދިހަ މިނިޓް ރަނގަޅަށް ކުލެފަވެސް ފަހު ފަނަރަ މިނިޓް ކޮންސެންޓްރޭޓް ނުކުރެވިއްޖިއްޔާ ލަނޑު ލިބޭނެ. އެކަހަލަ ގޮތެއް މިވީ " ދިވެހި ލީގަށް ދިޔައިރު ގްރީންގެ ސަމާލުކަން ގޮސްފިކަން ފާހަގަކުރަމުން ޞޮބާ ބުންޏެވެ.
ޞޮބާ ބުނީ އޭނާ ކޯޗިންގައި ކުރިއަށްދާނެކަމަށާއި، ގިވަޕް ނުކުރާނެކަމަށެވެ. އަދި ގްރީން ސްޓްރީޓްސްއިން އޭނާ ވަކިކުރީ ކްލަބް ދޫކޮށްލަން އޭނާ ނިންމާ، އެކަން ކުޅުންތެރިންނާވެސް ޙިއްޞާކޮށްފައިވަނިކޮށް ކަމަށެވެ. އަނެއްކޮޅުން ގްރީން ސްޓްރީޓްސްއިން އަންނަނީ އެފްއޭކަޕަށް ކޯޗެއް ހޯދުމުގެ މަސައްކަތް ކުރަމުންނެވެ. ގްރީން ސްޓްރީޓްސް ދެވަނަ ޑިވިޝަނުން ފުރަތަމަ ޑިވިޝަނަށް އައީވެސް ޞޮބާގެ އިރުޝާދުގެ ދަށުންނެވެ.