ޙައްދުފަހަނައަޅާދިއުމާއި، ލާދީނީ ފިކުރުތައް ހުއްޓުވުމަށް ކުރަންޖެހޭ މަސައްކަތްތައް އިތުރުކޮށް ހަރުދަނާކުރުމަށް އަރަބި އިސްލާމީ ޤައުމުތަކާއި ގުޅިގެން މަސައްކަތްކުރައްވާނެކަމަށް ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވެއްޖެއެވެ. މިނިސްޓަރ މިހެން ވިދާޅުވީ، އަންނަ އާދިއްތަ ދުވަހު ސައުދިއަރަބިޔާގެ ވެރިރަށް ރިޔާޛްގައި ބާއްވާ ޓެރަރިޒަމާ ދެކޮޅަށް މަސައްކަތްކުރާ އިސްލާމީ ޤައުމުތަކުގެ މިނިސްޓަރުންގެ ބައްދަލުވުމަށް ފުރާވަޑައިގަތުމުގެ ކުރިން ދެއްވި އިންޓަރވިއުއެއްގައި.
ޢަރަބި އިސްލާމީ ޤައުމުތައް ގުޅިގެން ދުނިޔޭގައި ޙައްދުފަހަނަ އަޅާ ދިއުމާ ދެކޮޅަށް، ޚާއްޞަކޮށް ޓެރަރިޒަމާ ދެކޮޅަށް ކުރެވޭ މަސައްކަތްތަކާ ގުޅޭގޮތުން މި ބައްދަލުވުމުގައި މަޝްވަރާކުރުމަށް ހަމަޖެހިފައިވެއެވެ. ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވީ، މި ބައްދަލުވުމުގައި ޓެރަރިޒަމާއި ހައްދު ފަހަނައަޅާދިއުމާ ދެކޮޅަށް މިހާރު ރާއްޖެއިން ގެންގުޅޭ ސިޔާސަތު ހާމަކޮށް އެ ޤައުމުތަކާ ގުޅިގެން މަސައްކަތްކުރުމަށް މަޝްވަރާކުރައްވާނެކަމަށެވެ. އަދި މި މަސައްކަތުގައި ބޭރު ޤައުމުތަކުގެ އިތުރު އެހީތެރިކަން ހޯދުމަށް މަސައްކަތްކުރައްވާނެކަމަށްވެސް މިނިސްޓަރ ވިދާޅުވިއެވެ. ހައްދުފަހަނައަޅާ ދިއުމާ ދެކޮޅަށް މަސައްކަތްކުރުމާއި، ދިއުމަށާއި، އިސްލާމްދީން ނޫން އެހެންދީނަތައް ފެތުރުން ހުއްޓުވުމަށް ޤައުމުތަށް ގުޅިގެން ކުރާ މަސައްކަތް އިތުރުކުރަން ޖެހިފައިވާކަން މިނިސްޓަރ ފާހަގަކުރެއްވިއެވެ.
"އަޅުގަނޑު ޤަބޫލްކުރާ ގޮތުގައި އަޅުގަނޑުމެންނަކީ މުސްލިމް ޤައުމަކަށްވެފައި، އަދި ޢަރަބި ދުނިޔޭގައިވެސް އަޅުގަނޑުމެންނަކީ އަބަދުވެސް އެމީހުންނާ އެކުގައި މަސައްކަތްކުރާ ޤައުމަކަށްވާތީއާއެކު ޚާއްޞަކޮށް ރާއްޖޭގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ޒަޢާމަތުގައި ޙައްދުފަހަނައަޅާދިއުމާއި ޓެރަރިޒަމާ ދެކޮޅަށް ވަރަށް ގިނަ މަސައްކަތްތައް ކުރެވިގެންދާއިރުގައި ދުނިޔޭގެ އެހެން ޤައުމުތަކާއެކުގައި، އަޅުގަނޑުމެން ތިބިކަމާއި، އަދި ހަމައެކާއެކު މި މަސައްކަތުގައި ބޭރުގެ އެހީ އިތުރަށް އަޅުގަނޑުމެންނަށް ލިބުމަށް އިތުރަށް މަގުފަހިވެގެންދާނެ، އަދި ބޭރު ދުނިޔޭގައި އަޅުގަނޑުމެނަށް އޮންނަ އިތުބާރު ބޮޑުވެގެންދާނެ. މީގެ އިތުރުން ރާއްޖޭއަކީ އަބަދުވެސް ޢަރަބި އިސްލާމީ ޤައުމުތަކާއެކު ވަރަށް ގާތް ގުޅުމެއްބާއްވާ އަދި އަބަދުވެސް އިސްލާމްދީނުގެ ހިދާޔަތު ފެތުރުމަށް މަސައްކަތްކުރާ ޤައުމަކަށްވާތީވެ އަޅުގަނޑު ޤަބޫލްކުރާ ގޮތުގައި އަޅުގަނޑުމެނަށް ވަރަށް ފައިދާކުރާނެ. އަދި ރާއްޖެއަކީ ސައްތަ އިންސައްތަ ޤައުމަކަށްވާތީ އިސްލާމީ ވަހުދަތުގެ ތެރޭގައި އިސްލާމްދީނުގެ ފުރިހަމަކަން މަތީ އަޅުގަނޑުމެން ތިބުމަށާއި، ރާއްޖެއަކީ މެދުމިނުގެ ޤައުމެއްގެ ގޮތުގައި ޚާއްޞަކޮށް ހައްދުފަހަނައަޅާ ދިއުމާ ދެކޮޅާށް ދިއުމަށާއި، ލާދީނީ ފިކުރުތަކާއި، އިސްލާމްދީން ނޫން އެހެންދީނަތައް ފެތުރުން ހުއްޓުވުމަށް އެންމެން އެއްކޮށް މަސައްކަތްކުރުމަކީ ވަރަށް މުހިންމުކަމެއް." ޑިފެންސް މިނިސްޓަރ ވިދާޅުވިއެވެ.
ރައީސުލްޖުމްހޫރިއްޔާ ޢަބްދުﷲ ޔަމީން ވަނީ، ރާއްޖެއިން ޓެރަރިޒަމާއި ހައްދުފަހަނަޅައިދިއުމުގެ ވިސްނުމާ ދެކޮޅަށް މަސައްކަތްކުރުމަށް ނޭޝަނަލް ކައުންޓަރ ޓެރަރިޒަމް ސެންޓަރގެ ނަމުގައި ޚާއްޞަ މަރުކަޒެއް 2016 ވަނަ އަހަރުގެ ފެބުރުއަރީ މަހުގެ ފަންސަވީސްވަނަ ދުވަހު އުފައްދަވާފައެވެ. މި ސެންޓަރުގެ މަސައްކަތަކީ، ޓެރަރިޒަމުގެ ޙަރަކާތްތަކާއި ހައްދުފަހަޅައިދިއުމުގެ ވިސްނުމާ ދެކޮޅަށް ރާއްޖެއާއި، ބައިނަލްއަޤްވާމީ މަސްރަޙުގައި މަސައްކަތްކުރުމެވެ. އަދި ދިވެހި ސަރުކާރުގެ ވުޒާރާތަކާއި، އިދާރާތަކާއި މުވައްސަސާތަކާ ވިލަރެސްކުރައްވައިގެން މިފަދަ ޙަރަކާތްތަކާއި ވިސްނުންތަކާ ދެކޮޅަށް މަސައްކަތްކުރުމެވެ.