އަންނަ އަހަރު ފައްސަތޭކަ ބާވީސް މަޝްރޫޢު ރާއްޖޭގެ އެކިކަންކޮޅު ތަކުގައި ކުރިއަށް ގެންދާނެކަމަށް މިނިސްޓަރ އޮފް ފިނޭންސް އެންޑް ޓްރެޜަރީ އަޙްމަދު މުނައްވަރު ވިދާޅުވެއްޖެއެވެ. މިނިސްޓަރ މިހެން ވިދާޅުވީ ޕީއެސްއެމްގެ ބަޖެޓް ޕްރޮގްރާމްގައި ވާހަކަފުޅު ދައްކަވަމުންނެވެ.އަންނަ އަހަރަށް ލަފާކޮށް ދައުލަތުން ރައްޔިތުންގެ މަޖިލީހަށް ހުށަހަޅުއްވާފައިވާ 27.9 ބިލިއަން ރުފިޔާގެ ބަޖެޓާ ގުޅޭގޮތުން ޕީއެސްއެމް ނިއުސްގެ ބަޖެޓް ޕްރޮގްރާމްގައި ވާހަކަފުޅު ދައްކަވަމުން ފިނޭންސް މިނިސްޓަރ އަޙްމަދު މުނައްވަރު ވިދާޅުވީ، ތަރައްޤީގެ މަޝްރޫޢުތައް ކުރިއަށް ގެންދާއިރު ރާއްޖޭގެ ވަސީލަތްތަކުގެ ބޭނުން އެންމެ އެދެވޭގޮތުގައި ހިފުމަށް އިސްކަންދެއްވާކަމަށެވެ. އެގޮތުން ސަރުކާރުން ކުރިއަށްގެންދާ އިންވެސްޓްމަންޓްތަކަކީ ވަރަށް ދުރު މުސްތަޤްބަލަކަށް ވިސްނައިގެން އަންނަން އޮތް ޖީލަށް އޭގެ ފައިދާކުރާނެ މަޝްރޫޢު ތަކެއްކަމަށް މިނިސްޓަރ ވިދާޅުވިއެވެ. އެގޮތުން މިސަރުކާރުގެ ވޭތުވެދިޔަ ހަތަރު އަހަރު ދުވަހުގެ ތެރޭގައި ޢުމްރާނީ ތަރައްޤީއަށް އަށާރަ ބިލިއަން ރުފިޔާ ޚަރަދު ކުރައްވާފައިވާކަމަށް ފިނޭންސް މިނިސްޓަރ ވިދާޅުވިއެވެ. މިއީ ބޮޑު ޢަދަދެއްކަން ފާހަގަކުރައްވާ މިނިސްޓަރ ވިދާޅުވީ ބަޖެޓްގައި ނުހިމެނޭ ތަރައްޤީގެ ގިނަ މަޝްރޫޢުތައްވެސް ކުރިއަށް ގެންދަވާފައިވާކަމަށާއި، އޭގެ ތެރެއިން ގިނަ މަޝްރޫޢުތައް މިހާރު ނިމިފައިވާކަމަށެވެ.
"އެންމެ މުހިންމުކަމަކީ މިސަރުކާރުން މިކުރާ އިންވެސްޓްމަންޓްތަކަކީ އަންނަންއޮތް ޖީލަށް ދުރުރާސްތާއަށް ވިސްނައިގެން ހިންގާ މަޝްރޫޢުތަކެއް. މިސާލަކަށް ވެލާނާ އިންޓަރނޭޝަނަލް އެއަރޕޯޓް އެތައް ގުނައަކަށް ބޮޑުކުރުން ކުރިއަށްދާއިރު، މިހާރު ޚިދުމަތްދެވެނީ 1.5 މިލިއަން މީހުންނަށްކަމަށްވާއިރު ސަރުކާރުގެ އަމާޒަކީ 7 މިލއަން ފަސިންޖަރުންނަށް ޚިދުމަތްދިނުން. މީގެ ފައިދާ ފެނިގެންދާނެ އަންނަން އޮތް ޖީލުތަކަށް. ހަމައެގޮތަށް ޒުވާނުންގެ ޝަހަރު މާލެއާ ގުޅުވާލަނީ ބްރިޖަކުން. މިބްރިޖްގެ ފައިދާ ޒުވާނުންގެ ޝަހަރު ތަރައްޤީވެގެންދާއިރު ބޯހިޔާވަހިކަން ލިބިގެންދާނެ. ޢުމްރާނީ ތަރައްޤީ ލިބިގެންދާނެ. އަދި ޒުވާނުންނަށް ވަރަށް ހިތްފަސޭހަތަނަކަށްވެގެން މިދަނީ. މި ތަރައްޤީއަކީ މިފަސްއަހަރަށް ވިސްނައިގެން ހިންގާ ތަރައްޤީއެއްނޫން. މިއީ ވަރަށް ދިގު މުސްތަޤްބަލަކަށް ގެންނަ ތަރައްޤީއެއް." މިނިސްޓަރ މުނައްވަރު ވިދާޅުވިއެވެ.
މިނިސްޓަރ ވިދާޅުވީ މިހާރު ހިނގަމުންދާ މަޝްރޫޢުތަކާއެކު އަންނަ އަހަރު އަލަށް ގިނަ މަޝްރޫޢުތައް ކުރިއަށް ގެންދާނެކަމަށެވެ. އެގޮތުން މިހާރު ހިނގަމުންދާ މަޝްރޫޢުތަކާއި އަލަށް ފަށާ މަޝްރޫޢުތަކާއެކު އަންނަ އަހަރު ފައްސަތޭކަ ބާވީސް މަޝްރޫޢު ކުރިއަށްދާނެކަމަށް ވިދާޅުވިއެވެ. އަދި އަލަށް 97 މަޝްރޫޢު ކުރިއަށްދާނެކަން ފާހަގަކުރެއްވިއެވެ. އޭގެ ތެރޭގައި ހިމެނޭ ބައެއް މަޝްރޫޢުތަކަކީ ބޯހިޔާވަހިކަމުގެ 22 މަޝްރޫޢާއި މިސްކިތް ބިނާކުރުމުގެ 28 މަޝްރޫޢާއި އިދާރީ ވަޞީލަތް ތަރައްޤީކުރުމުގެ 19 މަޝްރޫޢާއި ލަފާފުރުމުގެ ދަތިކަން ހައްލުކުރުމުގެ 75 މަޝްރޫޢާއި ފެނާ ނަރުދަމާގެ 57 މަޝްރޫއާއި ތިމާވެށި ރައްކާތެރިކުރުމުގެ 51 މަޝްރޫއާއި ތަޢުލީމީ ދާއިރާގެ 58 މަޝްރޫޢު އަދި ސިއްޙީ އިޖްތިމާޢީ 153 މަޝްރޫޢު ކުރިއަށް ގެންދިއުމަށް ބަޖެޓްގައި ހިމަނުއްވާފައިވެއެވެ.
އަންނަ އަހަރުގެ ބަޖެޓްގައި ޢުމްރާނީ ތަރައްޤީގެ މަޝްރޫޢުތަކަށް 7.1 ބިލިއަން ރުފިޔާ ވަނީ ކަނޑައަޅުއްވާފައެވެ.