މާޒިޔާ އަތުން ބަލިވެ، އުރީދޫ ދިވެހި ޕްރިމިއަރ ލީގުގެ ގަދަ ހަތަރެއްގެ ޖާގަ ގެއްލުމުގެ ބިރު ގްރީން ސްޓްރީޓަށް ބޮޑުވެއްޖެއެވެ.
ލީގުގައި ރޭ މާޒިޔާ އަތުން ގްރީން ސްޓްރީޓް ބަލިވީ ތިނެއް ސުމަކުންނެވެ. ލީގުގެ ގަދަ ހަތަރެއްގެ ޖާގަ ތަކުގެ ތެރެއިން މިހާރު ކަށަވަރު ނުވަނީ ހަތަރުވަނަ ޖާގައެވެ. އެޖާގައަށް ވާދަކުރާ ގްރީން ސްޓްރީޓާއި، ތިނަދޫއާއި ދެމެދު އޮތީ ޕޮއިންޓެއްގެ ފަރަޤެކެވެ. ރޭގެ މެޗުން ގްރީން ބަލިވުމުން ގްރީން ފަހަތަށް ޖައްސާ ގަދަ ހަތަރެއްގެ ފަހު ޖާގަ ހޯދުމުގެ ފުރުޞަތު ބޮޑީ ތިނަދޫއަށެވެ.
ރޭގެ މެޗުގެ ފުރަތަމަ ލަނޑު ފުރަތަމަ ހާފްގެ އިތުރު ވަގުތުގައި ލިބުނު ހިލޭ ޖެހުން މޫސާ ޔާމީން ގޯލް އޭރިޔާ ތެރެއަށް ފޮނުވާލުމުން ބޮލުން ޖަހާ ގޯލްގެތެރެއަށް ފޮނުވާލީ ޑިފެންޑަރ ބޮޖާންއެވެ. ދެވަނަ ލަނޑު އިސްމާއީލް އީސާ ޖެހީ ކީޕަރު ފައިރޫޒް ކެރިކަށް ކުރި ފައުލަކާއި ގުޅިގެން ލިބުނު ޕެނަލްޓީއަކުންނެވެ. ފަހު ލަނޑު އަސްއަދު އަލީ މުޅިން ހުސްކޮށް ހުރެ ފޮނުވާލީ ގޯލްގެ އިރުމަތީ ފަރާތު ކަނަށެވެ. މީގެއިތުރުންވެސް މެޗުގައި ލަނޑު ޖަހާނެ ފުރުޞަތު މާޒިޔާއިން ތަނަވަސްކުރިއެވެ.
މެޗު މާޒިޔާ ކުޅުނީ މުޙައްމަދު އުމެއިރުއާއި، އަމްދާން އަލީއާއި ސަމްދޫހު ފަދަ ކުޅުންތެރިން ނުހިމަނައެވެ. ފުރަތަމަ އެގާރައިގައި ކުޅުނީ އަހުމަދު އިމާޒުއާއި، މޫސާ ޔާމީންއާއި، ޔަސްފާދު ހަބީބުއެވެ. މިއީ ޢާއްމުކޮށް ފުރަތަމަ އެގާރައިން ޖާގަ ނުލިބޭ ކުޅުންތެރިންނެވެ. ދެވަނަ ހާފްގައި ކޯޗު އިސްމާއީލް މަހުފޫޒު ވަނީ މާޒިޔާގެ ބެންޗުންވެސް ޢާއްމުކޮށް ފުރުޞަތު ނުލިބޭ ވަރަށް ޒުވާން ދެ ކުޅުންތެރިއަކަށްވެސް ފުރުޞަތު ދީފައެވެ.
ގްރީންއިން މެޗުގައި ބިދޭސީ އެއްވެސް ކުޅުންތެރިއަކު ބޭނުމެއް ނުކުރެއެވެ. ބިދޭސީ ކީޕަރުން ބެންޗުގައި އިން އިރު އަނެއް ތިން ކުޅުންތެރިން ބެންޗުގައިވެސް ނެތެވެ. ލީގުގައި މިއަދު ހަވީރު ތިނަދޫ މާޅޮސް އަތުން މޮޅުވެއްޖެ ނަމަ ގްރީންއަށް ގަދަ ހަތަރެއްގެ ޖާގަ ގެއްލޭނެއެވެ. އެހެން ވެއްޖެ ނަމަ ދެ ޕޮއިންޓްގެ ކުރިއެރުމަކާ އެކު ލީގުގެ ފަހު މެޗާ ހަމައަށް ދާއިރު ހަތަރު ވަނާގައި އޮންނާނީ ތިނަދޫއެވެ.
ފަހު މެޗުގައި ގްރީން ވާދަކުރަން ޖެހޭނީ ދެވަނާގައި އޮތް ޓީސީއާއެވެ. ތިނަދޫއަށް އޮންނާނީ މިލަންދޫއާ ވާަކުރާ މެޗެވެ.