ރައްޔިތުންގެ މަޖިލީހުގެ ރިޔާސަތު އުސް ކުރަންއުޅޭކަމަށް ބުނެ ދައްކާ ވާހަކަތައް ރައްޔިތުންގެ މަޖިލީހުގެ ނާއިބު ރައީސް މޫސާ މަނިކު ދޮގުކުރައްވައިފިއެވެ.
މަޖިލީހުގެ ރިޔާސަތު ދިހަ ފޫޓަށް އުސްކުރަން މަސައްކަތްކުރާކަމަށް އިދިކޮޅު ފަރާތްތަކުން ދައްކާ ވާހަކަތައް މަޖިލީހުގެ ނާއިބު ރައީސް ދޮގުކުރެއްވީ ޕީޕީއެމުން ރުމާލު ދޭއް ޖަގަހާގައި ބޭއްވި އެޕާޓީގެ ހަރަކާތުގައި ވާހަކަފުޅު ދައްކަވަމުންނެވެ.
ޕީޕީއެމުން "އަޅޭ" މިނަމުގައި ރުމާލު ދޭއް ޖަގަހާގައި ބޭއްވި އެޕާޓީގެ ހަރަކާތުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއި އެމަނިކުފާނުގެ އަނބިކަނބަލުން ފާޠިމަތު އިބްރާހީމް ބައިވެރިވެވަޑައިގެންނެވިއެވެ. އިދިކޮޅު މެންބަރުންގެ ހުރަސްއެޅުމާއެކުވެސް ރައްޔިތުންގެ މަޖިލީހުގެ ޖަލްސާތައް ކުރިއަށް ގެންދިއުމަށްޓަކައި، ރައްޔިތުންގެ މަޖިލީހުގެ ރިޔާސަތު އުސްކުރަން މަސައްކަތްކުރާކަމަށް އިދިކޮޅު ފަރާތްތަކުން ދައްކާވާހަކަތަކަށް ރައްދުދެއްވާ ވާހަކަފުޅު ދައްކަވަމުން ރައްޔިތުންގެ މަޖިލީހުގެ ނާއިބު ރައީސް މޫސާ މަނިކު ވިދާޅުވީ، މަޖިލީހުގެ ޢިމަރާތުގެ ތަންތަން މަރާމާތުކުރުމާއި ބަދަލުތައް ވަކި އުސޫލެއްގެ މަތިން އަބަދުވެސް ކުރަމުން ގެންދާކަމަށެވެ.
މޫސާ މަނިކު ވިދާޅުވީ، ރައްޔިތުންގެ މަޖިލީހުގެ ޖަލްސާތަކަށް ހުރަސްއެޅުމުގެ ފުރުޞަތު އިދިކޮޅު ފަރާތްތަކަށް ނުދެއްވާނެކަމަށާއި، ރިޔާސަތު އުސްކުރަން އުޅޭކަމަށް ދައްކާ ވާހަކައަކީ ދޮގެއްކަމަށެވެ. އިދިކޮޅު ފަރާތްތަކަށް ފާޑު ވިދާޅުވަމުން މޫސާ މަނިކު ވިދާޅުވީ، އިދކޮޅު އެމްޑީޕީއަކީ ފަނާކުރާ ފިކުރުކަމަށް ބުނެދެއްވީ ކުރީގެ ރައީސް މަޢުމޫން ޢަބްދުލްޤައްޔޫމްކަމަށެވެ. ނަމަވެސް މިއަދު އެމަނިކުފާނު މަސައްކަތްކުރައްވަނީ ފަނާކުރަނިވި ފިކުރާއެކުގައި ކަމަށެވެ. އަދި މޫސާ މަނިކު ވިދާޅުވީ އޭނާ ޕީޕީއެމާ ގުޅިވަޑައިގަތީ އެޕާޓީއަކީ ބިނާކުރަނިވި ފިކުރުގެ ޕާޓީއަކަށް ވާތީކަމަށެވެ.
މި ޖަލްސާގައި ރައްޔިތުންގެ މަޖިލީހުގެ ގިނަ ޢަދަދެއްގެ މެންބަރުން ބައިވެރިވަޑައިގެން ވާހަކަ ދެއްކެވިއެވެ. މެމްބަރުން ވިދާޅުވީ، ރައީސުލްމްހޫރިއްޔާ ޤާނޫނާއި ޚިލާފަށް އެއްވެސް ކަމެއް މިހާތަނަށް ކުރައްވާފަ ނުވާކަމަށާއި، އިދކޮޅު މެންބަރުންނަށް އެފަދަ ކަމެއް ދެއްކިފަވެސް ނުވާކަމަށެވެ. އަދި އިދިކޮޅު ފަރާތްތަކުން ކަންބޮޑުވަނީ ރައީސް ޔާމީން މި ޤައުމަށް ގިނަ ތަރައްޤީ ގެންނަވާތީކަމަށް މެންބަރުން ވިދާޅުވިއެވެ.
މުނިފޫހި ފިލުވުމުގެ ހަރަކާތްތަކާއެކު ކުރިއަށްގެންދިޔަ މިޖަލްސާގައި ވާހަކަ ދެއްކި ހުރިހާ ފަރާތްތަކުންވެސް ވަނީ ރައީސް ޔާމީން ޤައުމަށް ގެންނަވާ ތަރައްޤީގެ ތަފްސީލްތަކަށް ބައްލަވާލައްވާ ވާހަކަ ދައްކަވާފައެވެ. އަދި މި ބޭފުޅުންވަނީ އިދިކޮޅު ފަރާތްތަކުގެ ހަރަކާތްތަކަށް ވަރަށް ބޮޑަށް ފާޑުވިދާޅުވެފައެވެ.