މާލެއިން ބިން ވިއްކަން ހުޅުވާލީ ރައްޔިތުންނަށް ލާބަޔާއި މަންފާ ލިބެނިވި ކަންކަމަށް ރައްޔިތުންގެ ޚަޒާނާ މުއްސަނދިކުރުމަށް ކަމަށް ހައުސިންގ މިނިސްޓަރ ޑޮކްޓަރ މުޙައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ބިން ވިއްކަން އިޢުލާންކުރީ ޤާނޫނީ އިމުގެ ތެރެއިންކަމަށް ވިދާލުވެ ކުރެއްވި ޓްވީޓެއްގައެވެ.
ހައުސިންގ މިނިސްޓްރީން ވަނީ މާލެއިން 19 ބިމެއް ވިއްކަން އިއުލާންކޮށްފައެވެ.
މިނިސްޓްރީން ވިއްކަން އިއުލާން ކޮށްފައިވަނީ އޯކިޑްމަގުން ސްޕްރީމްކޯޓް ކުރިމައްޗަށް ވާގޮތަށް ހުންނަ މާފަންނުއާގެއިން ދައުލަތަށް ނެގި ބަޔާއި، މ. ދަންޑެހެލުގެ ކިޔާ ބިމުން ތިން ގޯއްޗަކާއި، ބޮޑުތަކުރުފާނު މަގުގައި ކުރީގެ ކުނިކޮށިން ހަ ގޯޗެކެވެ.
މީގެ އިތުރުން އެސްޓީއޯއިން ރެޑީ މިކްސް ކޮންކްރީޓް ތައްޔާރުކުރާ ތިންސަތޭކަ ހަތްދިހަ އަށް ނަންބަރު ކޮށިން ދިހަ ގޯއްޗެއް ވިއްކުމަށް ހަމަޖެހިފައިވާކަމަށްވެސް އިޢުލާންގައިވެއެވެ. އެ ގޯތިތަކުގެ ބިމުގެ ސައިޒާއި ބިން ވިއްކުމަށް ހަމަޖެހިފައިވާ އަގު، މި ޢިއުލާނުގައި ހިމާނާފައެއް ނުވެއެވެ. އިއުލާނުގައި ބުނެފައި ވަނީ ބިމާބެހޭ ގާނޫނުގެ ނުވަ ވަނަ މާއްދާގައިވާ ގޮތުގެ މަތީން އެ މިނިސްޓްރީއާ ހަވާލުކޮށްފައިވާ ބިމުގެ ތެރެއިން، މާލެއިން ބިން ވިއްކުމަށް ކަނޑައެޅިފައިވާ ޕްލޮޓްތަކަށް، ބީލަމުގެ އުސޫލުން، އަގުހުށަހެޅުމުގެ ފުރުސަތު، ހުޅުވާލާ ކަމަށެވެ. ބިން ގަންނަން ޝައުގުވެރިވާ ފަރާތްތަކުން ޕްރޮޕޯސަލް ހުށަހަޅަން ޖެހެނީ މިމަހުގެ 20 ވަނަ ދުވަހާއި 24 ވަނަ ދުވަހާ ދެމެދުގައި ކަމަށް ހައުސިންގ މިނިސްޓްރީ މަޢުލޫމާތުދެއެވެ.