މަޑުއްވަރީ ދާއިރާގެ މެމްބަރު މުޙަންމަދު އަމީތު ޕީޕީއެމުން ވަކިކޮށްފައިވަނީ ސުޕްރީމް ކޯޓްގެ ޙުކުމަށްފަހުގައިކަމުން، އޭނާގެ ގޮނޑި ގެއްލިއްޖެކަމަށް އިލެކްޝަނުން ކަނޑައެޅީ ރަނގަޅަށްކަމަށް ދައުލަތުން މިއަދު ސުޕްރީމް ކޯޓްގައި ބުނެފިއެވެ.
މަޑުއްވަރީ ދާއިރާގެ މެމްބަރުކަމުން މުޙައްމަދު އަމީތު ވަކިކޮށްފައިވަނީ ޤާނޫނާއި ޤަވާއިދާ ޚިލާފަށްކަމަށްބުނެ އޭނާ ސުޕްރީމް ކޯޓަށް ހުށައަޅާފައިވާ ދުސްތޫރީ މައްސަލައިގެ އަޑުއެހުމުގައި، އޭނާ ވަނީ މިދިޔަ މަރޗް މަހުގެ ތެރޭގައި ޕީޕީއެމްގެ ސުލޫކީ ކޮމީން އޭނާ ޕީޕީއެމްގެ މެމްބަރުކަމުން ވަކިކޮށްފައިވާކަން އަންގާފައިވާކަމަށްބުނެ ފޮނުވާފައިވާ ސިޓީއެއް ހުށައަޅާފައެވެ.
އަދި ދެވަނަފަހަރު އޭނާ އެޕާޓީން ވަކިކުރެވޭނެ އެއްވެސް އަސްލެއް ނޯންނާނެކަމަށާއި، އިލެކްޝަންސް ކޮމިޝަނުން އޭނާގެ މަޖިލިސް މެމްބަރުކަމުން ވަކިވެފައިވާކަމަށް ނިންމި ނިންމުން ބާޠިލުކަމަށް ކަނޑައަޅައިދިނުމަށް އޭނާގެ ޤާނޫނީ ވަކީލް ވަނީ އެދިފައެވެ.
އެހެންނަމަވެސް ދައުލަތުގެ ވަކީލް ވިދާޅުވީ، އަމީތު ޕީޕީއެމުން ވަކިކޮށްފައިވާކަން އިލެކްޝަންސް ކޮމިޝަނަށް އަންގާފައިވަނީ 17 ޖުލައި 2017 ގައި ހިނގި ކަމެއްގެ މައްޗަށް ބިނާކޮށް، 18 ޖުލައި ވަނަ ދުވަހު ކަމަށާއި، އެއީ ސުޕްރީމް ކޯޓްގެ ޙުކުމަށްފަހު ދިމާވި ކަމެއްކަމުން، އޭނާ މަޖިލީހުގެ މެމްބަރުކަމުން ވަކިވެފައިވާކަމަށް ނިންމާފައިވާ ސުޕްރީމް ކޯޓްގެ ޙުކުމާ އެއްގޮތައްކަމަށެވެ. އަދި މިއީ ކުރިން ހިނގާފައިވާކަމެއްގެ މައްޗަށް ކޯޓްގެ ޙުކުމް ތަންފީޛްކުރުންކަމަށް ބެލެވޭނެ އެއްވެސް އުސޫލެއް ނޯންނާނެކަމަށް ދައުލަތުގެ ވަކީލް ވިދާޅުވިއެވެ.
ދައުލަތުގެ ވަކީލް ވިދާޅުވީ، ސިޔާސީ ޕާޓީއެއްގެ މެމްބަރަކު ޕާޓީން ވަކިވެއްޖެކަމަށް ބެލެވޭނީ، އޭނާ ވަކިވުމަށް ހުށައަޅައި، ޕާޓީގެ މެމްބަރުން ދަފްތަރުން އޭނާ އުނިކުރުމަށް ފުރިހަމަކުރަންޖެހޭ އިޖްރަޢަތްތައް ފުރިހަމަވުމުންކަމަށް ވިދާޅުވެފައެވެ. އަދި މީގެ ކުރިންވެސް އިލެކްޝަންސް ކޮމިޝަން ޢަމަލުކުރަމުންއައީ އެއުސޫލުންކަމަށް ދައުލަތުގެ ވަކީލް ވިދާޅުވިއެވެ.