މަގުމަތީގައި އުޅޭ ބުޅަލުގެ އާބާދީ ކޮންޓްރޯލްކުރުމަށް "ޕްރޮޖެކްޓް ބައޯކަލޯ" އިފްތިތާހުކޮށްފި

މަގުމަތީގައި އުޅޭ ބުޅަލުގެ އާބާދީ އިތުރުވަމުންދާ މައްސަލައަށް ހައްލެއް ހޯދުމަށާއި، އާންމު ސަރަހައްދުތަކުގެ ސާފުތާހިރުކަން ދެމެހެއްޓުމަށްޓަކައި "ޕްރޮޖެކްޓް ބައުކާލޯ ރައްކާތެރި، ސާފުތާހިރު އަދި އޯގާތެރި މުޖުތަމައެއް،" މިއަދު ހުޅުމާލޭގައި އިފުތިތާހުކޮށްފިއެވެ.

މިއީ މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާބެހޭ ވުޒާރާއާއި، ޖަނަވާރުންގެ ހިމާޔަތުގައި މަސައްކަތްކުރާ ފަރާތްތަކާއި، އިޖުތިމާއީ ޖަމިއްޔާތަކުގެ އިތުރުން ކަމާބެހޭ މުހިންމު ފަރާތްތައް ގުޅިގެން ކުރިއަށްގެންދާ ގައުމީ ފެންވަރުގެ މަޝްރޫޢެކެވެ.

މި މަޝްރޫޢާ ގުޅޭގޮތުން ޕީއެސްއެމް ނިއުސްއަށް މައުލޫމާތުދެއްވަމުން ވަޒީރު ޝިޔާމް ވިދާޅުވީ، މި މަޝްރޫޢާއެކު ބުޅަލާމެދު މުޖުތަމައުގައި ދެކޭ ގޮތް ވަރަށް ބޮޑަށް ބަދަލުވެގެންދާނެ ކަމަށް އުންމީދުކުރައްވާކަމަށެވެ.

"އަޅުގަނޑުމެން މި އުންމީދުކުރަނީ އެންމެން ގުޅިގެން މި ކުރެވޭ މަސައްކަތްތަކާއެކު ދިވެހިރާއްޖޭގައި ބުޅާލާ ދޭތެރޭގައި މިީހުން މިދެކޭ ގޮތް ބަދަލުކުރެވޭ ކަމަށް. މި ސަބްޖެކްޓުގައި ކޮމިއުނިޓީގެ ވިސްނުން، ބުޅަލަށް ބޭނުންވާ ޝެލްޓާޔާއި ބުޅާލަށް ބޭނުންވާ ކެއާރ ދޭން ހެދިފަ ހުރި މުއައްސަސާތައް، އަދި އަޅުގަނޑުމެން ވުޒާރާގައިވެސް ވެޓިނަރީއެއް އެބަ އޮތް ބުޅަލުގެ ޝެލްޓާއެއް އޮޅުހިޔާ ހާލަތު އިމްޕްރޫވްކުރުމަށްޓަކައި ވަރަށް މުހިންމު މަސައްކަތެއް މި ކުރެވެނީ،" ވަޒީރު ޝިޔާމް ވިދާޅުވިއެވެ.

ދަނޑުވެރިކަމާބެހޭ ވަޒީރު ވިދާޅުވީ، މި މަޝްރޫއުގެ ފުރަތަމަ މަރުހަލާ ހުޅުމާލޭގައި ކުރިއަށްގެންދާއިރު، މީގެ މައިގަނޑު މަޤުޞަދަކީ މުޅި ރާއްޖެއަށް ފުޅާކުރެވޭނެ ފަދަ ނަމޫނާ ނިޒާމެއް ބިނާކުރުން ކަމަށެވެ.

މި މަޝްރޫއުގެ މައިގަނޑު އަމާޒަކީ ބުޅަލުގެ ވެލްފެއާ އާއި، ސާފުތާހިރުކަމާއި، އާންމުންގެ ހޭލުންތެރިކަން އިތުރުކުރުމުގެ އިތުރުން، އިންސާނީ އުސޫލުތަކުގެ ތެރެއިން މަގުމަތީ ބުޅަލުގެ އާބާދީ ކޮންޓްރޯލްކޮށް، އެކުވެރި މާހައުލެއް ގާއިމުކުރުން މުހިންމު ކަމަށްވެސް ވަޒީރު ވިދާޅުވިއެވެ.

ހުޅުމާލޭގައި ކުރިއަށްގެންދާ މި ޕައިލެޓް މަޝްރޫއުގެ ދަށުން، "ޓްރެޕް-ނިއުޓާ-ރިޓާން" ޓީއެންއާރް ޕްރޮގްރާމެއް މެދުވެރިކޮށް ބުޅާ ދަރިމައިވުން ހުއްޓުވުމުގެ މަސައްކަތް ކުރިއަށްދާނެ ކަމަށް ދަނޑުވެރިކަމާބެހޭ ވުޒާރާއިން ވިދާޅުވިއެވެ. އަދި ވެޓެރިނަރީ ފަރުވާ ދިނުމާއި، ޒިންމާދާރުކަމާއެކު ކާނާ ދިނުމާއި، ބުޅާ އެޑޮޕްޓްކުރުމަށް ބާރުއެޅުމާއި، މަގުމަތީގެ ސަލާމަތްތެރިކަމުގެ އިތުރުން އިޖުތިމާއީ ހޭލުންތެރިކަން އިތުރުކުރުމުގެ ހަރަކާތްތައްވެސް ހިމެނޭ ކަމަށް އެ ވުޒާރާއިން މައުލޫމާތުދެއެވެ.

ޖަނަވާރުންގެ ހިމާޔަތާއި ރައްކާތެރިކަމަކީ މި ސަރުކާރުން އިސްކަންދޭ ކަމެއްގެ ގޮތުގައި ރައީސުލްޖުމްހޫރިއްޔާގެ 2024 ވަނަ އަހަރުގެ ރިޔާސީ ބަޔާނުގައި ވަނީ ފާހަގަކުރައްވާފައެވެ. އެ ބަޔާނުގައި މަގުމަތީގައި އުޅޭ ޖަނަވާރުންގެ މައްސަލަތަކަށް ދާއިމީ އަދި ފުރިހަމަ ހައްލެއް ހޯދުމުގެ މުހިންމުކަން ވަނީ ބަޔާންކުރައްވާފައެވެ.

މި މަގުސަދު ހާސިލުކުރުމަށްޓަކައި، "ޖަނަވާރުންގެ ހިމާޔަތާއި ރައްކާތެރިކަމުގެ ބިލު" 2025 ވަނަ އަހަރުގެ ނޮވެންބަރު މަހު ރައްޔިތުންގެ މަޖިލީހުން ފާސްކޮށް، 3 ޑިސެމްބަރު 2025 ގައި ރައީސުލްޖުމްހޫރިއްޔާ ވަނީ ތަސްދީގުކުރައްވާފައެވެ. "ޖަނަވާރުންގެ ހިމާޔަތާއި ރައްކާތެރިކަމުގެ ގާނޫނު"ގެ ދަށުން ޖަނަވާރުންގެ ވެލްފެއާ އާއި އެއާ ގުޅުންހުރި ޒިންމާތަކުގެ ޤައުމީ އޮނިގަނޑެއް މިހާރު ވަނީ އެކުލަވާލެވިފައެވެ.