ހއ. ދިއްދޫ މަގުތަކުގައި ތާރުއެޅުމުގެ އަމަލީ މަސައްކަތް ފަށައިފިއެވެ.
ހައުސިންގ މިނިސްޓްރީން، މޯލްޑިވްސް ރޯޑް ޑިވްލޮޕްމަންޓް ކޯޕަރޭޝަން، އެމް.އާރު.ޑީ.ސީ އާއި ޙަވާލުކޮށްގެން ކުރިއަށްގެންދާ މި މަޝްރޫޢުގެ ދަށުން ދިއްދޫގެ 14 މަގެއްގައި ތާރު އަޅައިގެން ޒަމާނީ ފެންވަރަށް ހެދުމަށް ވަނީ ހަމަޖެހިފައެވެ.
މި މަޝްރޫޢުގެ އަމަލީ މަސައްކަތް ފަށާފަވާއިރު މިހާތަނަށް 200 މީޓަރަށްވުރެ ބޮޑު ސަރަހައްދެއްގައި މިހާރުވަނީ ތާރައަޅާފައެވެ. މިމަޝްރޫޢުގެ ދަށުން 4.5 ކިލޯމިޓަރުގައި ތާރުއަޅާނެއެވެ.
ދިއްދޫ މަގުތަކުގައި ތާރައެޅުމުގެ މަސައްކަތް މިއަހަރުގެ އޮކްޓޯބަރު މަހުގެ ނިއަލަށް ނިންމާލުމަށް އެމްއާރުޑީސީން ގެންދަނީ މަސައްކަތް ކުރަމުންނެވެ.
ހަތަރުހާހަށްވުރެ ގިނަ މީހުންގެ އާބާދީއެއް އޮންނަ ދިއްދޫއަކީ އެ އަތޮޅުގެ ގިނަ ރަށްތަކުގެ މީހުން އެކި ޚިދުމަތް ހޯދުމަށް ޒިޔާރަތްކުރާ ރަށެކެވެ. ދިއްދޫ މަގުހެދުމުގެ މަޝްރޫޢަކީ49 މިލިޔަނަށްވުރެ ގިނަ ރުފިޔާ ދައުލަތުގެ ބަޖެޓުން ހަރަދުކޮށްގެން ހިންގާ މަޝްރޫއެކެވެ. މީގެއިތުރުން ކުރިޔަށް އޮތް ދެހަފްތާއެއްހާ ދުވަހުގެ ތެރޭގައި ހދ.ކުޅުދުއްފުށީ މަގުތަކުގައި ތާރުއެޅުމުގެ ޢަމަލީ މަސައްކަތް ފެށޭނެކަމަށްވެސް އެމްއާރްޑީސީން ބުނެއެވެ. އެމްއާރްޑީސީން ދަނީ އަތޮޅުތަކުގެ ގިނަ ރަށްތަކެއްގެ މަގު ހެދުމުގެ މަސައްކަތް ކުރަމުންނެވެ.