ރޭގެ އިރާކޮޅު ސަމަރ އައިލޭންޑް މުވައްޒަފުން ގޮވައިގެން ދަތުރުކުރި ލޯންޗެއް ރީތިރަށް ރިސޯޓް ކައިރީގައި އަޅާފައި އޮތް ސަޕްލައި ދޯންޏެއްގައި ޖެހި ހިނގި އެކްސިޑެންޓުގައި އަނިޔާވި 14 މީހުންގެ ތެރެއިން 11 މީހަކަށް އަދިވެސް އޭޑިކޭގައި ފަރުވާ ދެމުން ދާކަމަށާއި، މީގެތެރެއިން ހަތަރު މީހުންނަށް އައިސީޔޫގައި ފަރުވާ ދެމުންދާކަމަށް އޭޑީކޭއިން ހާމަކޮށްފިއެވެ.
އެކްސިޑެންޓާބެހޭ އެންމެ ފަހުގެ މަޢުލޫމާތު ޕީއެސްއެމާ ޙިއްޞާކުރައްވަމުން އޭޑީކޭގެ މެނޭޖިންގް ޑިރެކްޓަރ އަޙްމަދު އައްފާލް ވިދާޅުވީ އެކްސިޑެންޓުގައި ޙާލުދެރަވި 4 މީހުންނަށް އައިސީޔޫގައި އެޑްމިޓްކޮށްގެން ފަރުވާދެމުންދާކަމަށެވެ. މީގެ ތެރެއިން 2 މީހެއްގެ ޙާލު ވަރަށް ސީރިއަސް ކަމަށާއި އެދެމީހުން މިހާރު ތިބީ ވެންޓިލޭޓަރުގައި ކަމަށް އައްފާލް ވިދާޅުވިއެވެ. ވެންޓިލޭޓަރުގައި ތިބި ދެމީހުންނަކީ ރޭގެ އެކްސިޑެންޓްގައި ސީރިއަސް އަނިޔާތަކެއް ލިބިގެން އޮޕަރޭޝަންކުރި ދެމީހުން ކަމަށްވެސް އައްފާލް ވިދާޅުވިއެވެ. އަދި އަނެއް ދެމީހުންގެ ޙާލު ސްޓޭބަލް ކަމަށް އައްފާލް ވިދާޅުވިއެވެ.
އެކްސިޑެންޓުގައި އަނިޔާވި އިތުރު 4 މީހުންނަން ފަރުވާ ދެމުންދަނީ ހައި ޑިޕެންޑެންސީ ޔުނިޓުގައެވެ. މި ހަތަރު މީހުންގެ ޙާލު ރަނގަޅުކަމަށް އޭޑީކޭއިން ބުނެއެވެ. އަދި ޖެނެރަލް ކެއަރގައި ތިބި ތިން މީހުންގެ ޙާލަތުވެސް ރަނގަޅުވަމުން އަންނަކަމަށް އޭޑީކޭއިން ބުނެއެވެ.
ރޭގެ އިރާކޮޅު ސަމަރ އައިލޭންޑް މުވައްޒަފުން ގޮވައިގެން ދަތުރުކުރި ލޯންޗް އެކްސިޑެންޓްވީ ފަޅުގައި އަޅާފައި އޮތް ސަޕްލައި ދޯންޏެއްގައި ޖެހިގެންނެވެ. މި ޙާދިސާގައި 14 މީހަކަށް އެކިވަރުގެ އަނިޔާވެފައިވެއެވެ. ލޯންޗްގައި ތިބީ 10 ދިވެހިންނާއި 2 ބިދޭސީންނެއެވެ.