މަސައްކަތުގެ މާހައުލުގައި އަންހެނުންނާއި ފިރިހެނުންގެ މެދުގައި އޮންނަ ތަފާތު ކުރުންތައް ނައްތާލާ، އަންހެނުން އިގްތިސާދީ މައިދާނަށްނެރެ، މާލީ ގޮތުން ފުދުންތެރި ބަޔަކަށް ހެދުމަކީ، ގައުމުގެ އަރަންޏާއި ދަރަނީގެ ބެލެންސް ހިފެހެއްޓުމަށް މުހިއްމު ކަމެއް ކަމަށް މިނިސްޓަރ އޮފް ހެލްތް އެންޑް ޖެންޑަރ ޑރ. މަރިޔަމް ޝަކީލާ ވިދާޅުވެއްޖެއެވެ. މިނިސްޓަރ މިހެން ވިދާޅުވީ، އަންހެނުން އިގްތިސާދީ ގޮތުން ބާރުވެރި ބަޔަކަށް ހެދުމުގައި ހުރި ގޮންޖެހުންތަކާއި، އަންހެނުންނަށް މިހާރު ހުރި ފުރުސަތުތައް ދެނެގަތުމަށްޓަކައި، ބަނޑޮސް އައިލެންޑް ރިސޯޓުގައި ބޭއްވި މަހާސިންތާ ފެށުމަށް ބޭއްވި ރަސްމިއްޔާތު ޝަރަފުވެރި ކޮށްދެއްވާ ވާހަކަފުޅު ދައްކަވަމުންނެވެ.
މަސައްކަތްތެރިކަމުގެ މާހައުލުގައި މިހާރުވެސް އަންހެނުންނަށް ވަރަށް ބޮޑެތި ގޮންޖެހުންތަކެއް ހުރިކަން ފާހަގަ ކުރައްވާ، މިނިސްޓަރ ވިދާޅުވީ، ފިރިހެނުންނާ އަންހެނުންނާ ދޭތެރޭ މުޖުތަމައުން ދެކޭގޮތް ތަފާތު ވުމަކީވެސް، އާމްދަނީ ހޯދުމަށްޓަކައި އަންހެނުންނަށް މަސައްކަތެއް ފެށުމުގައި އަދި މަސައްކަތާއިގެން ކުރިއަށް ދިޔުމަށްވެސް ހުރި ހުރަހެއް ކަމުގައެވެ.
މި މަހާސިންތާ ފެށުމުގެ ރަސްމިއްޔާތުގައި ސްޓޭޓް މިނިސްޓަރ، ޑރ.ހާލާ ހަމީދު ދެއްކެވި ވާހަކަ ފުޅުގައި، ރާއްޖޭގައި އާމްދަނީ ހޯދުމަށްކުރާ ބައެއް މަސައްކަތަކީ ފިރިހެނުންނަށް ޚާއްސަ މަސައްކަތެއްގެ ގޮތުގައި ބައެއް ފަރާތްތަކުން ދެކޭ ކަމަށާއި، އެގޮތުން ފަތުރުވެރިކަމުގެ ދާއިރާއަކީ އެންމެ ފާހަގަކޮށްލެވޭ އެއް ދާއިރާކަން ފާހަގަ ކުރެއްވިއެވެ.
މި މަހާސިންތާގައި، އިގްތިސާދީ ގޮތުން އަންހެނުން ބާރުވެރި ކުރުމުގައި ހުރި ގޮންޖެހުންތަކާއި، ކަންބޮޑުވުންތަކާއި ގުޅޭ ގޮތުން މަޝްވާރާކޮށް، ފާހަގަ ކުރެވޭ ކަންތައްތައް ހިމެނޭ ގޮތަށް ރިޕޯޓެއް އެކުލަވާލާ، ކަމާބެހޭ ފަރާތްތަކާއި ހިއްސާ ކުރެވޭނެ ކަމަށް މިނިސްޓްރީއިން މައުލޫމާތުދެއެވެ. މި މަހާސިންތާގައި ބައިވެރިވަނީ، މިނިސްޓްރީ އޮފް އިކޮނޮމިކް ޑިވެލޮޕްމެންޓް، މިނިސްޓްރީ އޮފް ޓުއަރިޒަމް، ބޭންކް އޮފް މޯލްޑިވްސް، ސްޓޭޓް ޓްރޭޑިން އޯގަނައިޒޭޝަންގެ އިތުރުން ވިލާ ހޮޓެލްސްއާއި، ބައެއް ރަށްރަށުގެ އަންހެނުންގެ ކޮމެޓީތަކާއި، ބައެއް އަމިއްލަ ވިޔަފާރިވެރިންނެވެ.