އައްޑޫ ސިޓީ ހިތަދޫއަށް ރޭ އެރި ނަގޫރޯޅިއާ ގުޅިގެން ބޯހިޔާވަހިކަން ބޭނުންވި ހުރިހާ ފަރާތްކުން ވަގުތީ ބޯހިޔާވަހިކަން ހޯދާފައިވާކަމަށް އައްޑޫސިޓީގެ މޭޔަރ ޢަބްދުﷲ ޞާދިޤް ވިދާޅުވެއްޖެއެވެ.
ޕީ.އެސް.އެމަށް މައުލޫމާތުދެއްވަމުން އައްޑޫސިޓީގެ މޭޔަރ ޢަބްދުﷲ ޞާދިޤް ވިދާޅުވީ، ނަގޫރޯޅިއާގުޅިގެން ވަގުތީ ބޯހިޔާވަހިކަން ބޭނުންވި ހުރިހާ ފަރާތްތަކުން، ހިޔާވަހިކަން ހޯދަން ބޭނުންވީ ޢާއިލާ މީހުންގެ ގޭގެއިންނާއި، ރައްޓެހިންގެ ގޭގެއިންކަމަށް، އެހެންކަމުން އައްޑޫސިޓީ ކައުންސިލާއި ސަލާމަތީ ބާރުތަކުން ގުޅިގެން އެއިންތިޒާމް ހަމަޖައްސަވާފައިވާކަމަށް މޭޔަރ ވިދާޅުވިއެވެ. މޭޔަރ ޞާދިޤް ވިދާޅުވީ ގެއްލުން ލިބުނު ގޭގެއަށް އެހީތެރިކަން ފޯރުކޮށްދެއްވުމުގެ މަސައްކަތް ޑިޒާސްޓަރ މެނޭޖްމެންޓްގެ އިރުޝާދުގެ ދަށުން ބާރު ސްޕީޑެއްގައި ކުރައްވަމުން ގެންދަވާކަމަށެވެ. ނަގޫރޯޅީގެ ސަބަބުން ގެއްލުން ލިބުނު ގޭގެއަށް ލިބިފައިވަނީ ބޮޑެތި ގެއްލުންތަކެއް ކަމަށާއި، ގެއްލުންތަކުގެ ޢަދަދު އަންދާޒާ ކުރަމުންދާކަމަށް ޞާދިޤް ވިދާޅުވިއެވެ.
"ލިބިފައި ހުންނާނެ ގެއްލުމުގެ ބޮޑުކަން އަންދާޒާ ކޮށްލައްވާ، 12 ވަރަކަށް 13 ވަރަކަށް ގޭގެ ފުރާޅު އެއްލާލާ ސީލިންގު ފަޅައިގެންގޮސް، ކަރަންޑު ވަޔަރިންގ އެއްކޮށް ހަލާކުވެ، ގޭތެރޭގައިހުރި އެނދާ، ސޯފާއާއި، ހުރިހާ ފަރުނީޗަރު ތެމި ގިނަ އެއްޗިހި ހަލާކުވެފަ. ގޭތެރޭގައި ހުރި އޭސީ، ދޮންނަމެޝިން، ޓީވީ މިފަދަ ކަރަންޓް ހުރިހާ ސާމާނެއް ވާރޭވެހި އެއްކޮށް ހަލާކުވެފައި." އައްޑޫސިޓީގެ މޭޔަރ ޢަބްދުﷲ ޞާދިޤް ވިދާޅުވިއެވެ.
މޭޔަރ ޞާދިޤް ވިދާޅުވީ އައްޑޫއަށް ލިބުނު ގެއްލުންތަކާ ގުޅިގެން ޑިޒާސްޓަރ މެނޭޖްމެންޓްގެ ޓީމެއް މިއަދު ހަވީރު އައްޑުއަށް ދިއުމަށް ހަމަޖެހިފައިވާ ކަމަށެވެ. އައްޑޫއަށް ލިބުނު ގެއްލުންތަކާ ގުޅިގެން ރައީސުލްޖުމްހޫރިއްޔާ ޚާއްޞަ ވަފްދެއް މިއަދު ހަވީރު އައްޑޫއަށް ވަޑައިގަތުމަށް ވަނީ ހަމަޖެހިފައެވެ. މި ވަފްދުގައި އިސްކޮށް ހުންނަވާނީ ޑިފެންސް މިނިސްޓަރ އާދަމް ޝަރީފް ޢުމަރު. ރޭ ދިހަގަޑި ބައިކަންހާއިރު ހިތަދޫގެ މެދުތެރެއަށް އެރި މި ނަގޫރޯޅީގެ ސަބަބުން ހަ ގެއެއްގެ ފުރާޅު އެއްލާލާއިފައިވާއިރު، ފުރާޅުމައްޗަށް ބޮޑެތި ގަސް ވެއްޓުމުގެ ސަބަބުން 3 ގެއަކަށް ވަނީ ބޮޑެތި ގެއްލުންތަކެއް ލިބިފައެވެ. އެހެންނަމަވެސް މިޙާދިސާގައި އެއްވެސް މީހަކަށް ޖިސްމާނީ އަނިޔާއެއް ވެފައެއްނުވެއެވެ.
ނޭޝަނަލް ޑީޒަރސްޓާރ މެނޭޖްމަންޓް ސެންޓަރުން ވިދާޅުވީ އައްޑޫ ސިޓީއަށް ރޭ އެރި ނަގޫރޯޅީގެ ސަބަބުން ގެއްލުނު ލިބުނު އާއިލާތަކުގެ މައުލޫމާތުތައް އެއްކުރަމުން ގެންދަވާ ކަމަށެވެ. އަދި އެ މައުލޫމާތުތައް އެއްކުރެއްވުމަށްފަހު އެހީތެރިކަން ބޭނުންވާ އާއިލާތަކަށް އެހީތެރިކަން ދެއްވާނެކަމަށްވެސް އެ ސެންޓަރުން ވިދާޅުވިއެވެ.
އައްޑު ސިޓީ ހިތަދޫއަށް އައި ކޮޅިގަނޑެއްގައި ގެއްލުން ލިބުނު ހާދިސާގެ މައުލޫމާތު ރައީސުލްޖުމްހޫރިއްޔާ ގެންދަވަނީ ވަރަށް ގާތުން ބައްލަވަމުންނެވެ. އަދު އެ ޙާދިސާގެ ޚަބަރު ރައީސުލްޖުމްހޫރިއްޔާއަށް ލިބިވަޑައިގަތުމާއެކު އައްޑޫސިޓީގެ މޭޔަރާ ގުޅުއްވައި ރައްޔިތުންގެ ޙާލު އޮޅުންފިލުއްވާފައިވާކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު ވިދާޅުވިއެވެ.
ރައީސުލްޖުމްހޫރިއްޔާގެ އޮފީހުގެ ތަރުޖަމާނު އިބްރާހީމް މުއާޒް އަލީ ވިދާޅުވީ، ހިތަދޫއަށް އައި ކޮޅިގަނޑުގައި ލިބުނު ގެއްލުމުގެ ޚަބަރު ރައީސުލްޖުމްހޫރިއްޔާ އެއްސެވީ ނުހަނު ހިތާމައާއި އެކުގައި ކަމަށެވެ. ރާއްޖޭގެ އެކި ކަންކޮޅުތަކަށް މިހާރު ކުރަމުންދާ ވިއްސާރައާއި ގުޅިގެން މޫސުމަށް ސަމާލުވުމަށް މޫސުމާބެހޭ ޤައުމީ އިދާރާއިން އިލްތިމާސް ކުރައްވައެވެ.