މޯލްޑިވިއަން އައިޑަލް - ގަދަ 3 މިހަފްތާގައި ކަށަވަރުވާނެ

މޯލްޑިވިއަން އައިޑަލްގެ ގަދަ 5 ބައިވެރިން މިރޭ ނުކުންނާނީ މި ޝޯވްގެ އެންމެ ވަރުގަދަ ޗެލެންޖާއެކުއެވެ. ގަދަ ތިނެއްގައި ހިމެނި، ގްރޭންޑް ފިނާލޭގެ ސްޓޭޖުން ޖާގައެއް ކަށަވަރުކުރުމަށް ޖަޖުންނާއި އާއްމުންގެ ހިތާ ކުޅެލެވޭތޯއެވެ. 

މިދިޔަ އެލިމިނޭޝަން ނައިޓުގައި ޖަޖުންގެ ނޯ އެލިމިނޭޝަނާއެކު 5 ބައިވެރިން ސަލާމަތްވި ނަމަވެސް މިރޭގެ ޝޯވއާއިއެކު 2 ބައިވެރިން އައިޑަލް ދަތުރު ނިންމާލާނެއެވެ. މި 5 ބައިވެރިންގެ ވަރަށްވެސް ހިތްގައިމު ލަވަތަކަކާއެކު، އެންމެފަހުގެ ކުރިމަތިލުމަށް ނުކުންނާނީ މިރޭ 22:30ގައެވެ.

ނޯ އެލިމިނޭޝަން ޕަވަރއާއެކު މިދިޔަ ހަފްތާގެ ޝޯވގެންދިޔައީ މޯލްޑިވިއަން އައިޑަލް ސީޒަން ދޭއްގެ ގާލާ ރައުންޑުގައި މިހާރު ވާދަކުރާ ގަދަ 5 ބައިވެރިންނަށް ކޮންމެވެސް ވަރެއްގެ ހިތްހަމަޖެހުމެއް ލިބިގެންދިޔަ ޝޯވއަކަށެވެ. ސަބަބަކީ އައިޑަލްގެ ދަތުރު ނިންމާލަން ނުޖެހި ގަދަ ތިނަކަށް ވާދަކޮށްލުމުގެ އިތުރު ފުރުސަތެއް މި 5 ބައިވެރިނަށް ޝޯވގެ ތިން ޖަޖުން ދިނުމެވެ.

މި 5 ބައިވެރިންގެ ހުނަރާ، ކުޅަދާނަ ހުށައެޅުންތަކަށް ބަލާ 3 ޖަޖުންގެ އިއްތިފާގުން ދިން މި ފުރުޞަތާއެކު، ބައިވެރިންގެ މޫނުމަތިން ހިތްހަމަޖެހުމުގެ ކުލަވަރު ފެނުނު ނަމަވެސް، މިރޭގެ ޝޯވ ވެގެންދާނީ މި 5 ބައިވެރިންނަށްވެސް އައިޑަލަށްކަމަށް ވުމަށް ކުރާ މި ދަތުރުގައި ކުރިމަތިވާނެ އެންމެ ބޮޑުއެއް އިމްތިހާނަށެވެ. ކިތަންމެ ހިތް ހަމަޖެހުމާއި އެކު އެންމެ ފަހުގެ ޝޯވ ނިންމާލިނަމަވެސް މިރޭ ބައިވެރިން ސްޓޭޖަށް ނުކުންނާނީ ނުތަނަވަސްކަމާއި ދެން ވާނެގޮތެއްގެ އިންތިޒާރުގައެވެ. 

ޝޯވގެ ތެރެއިން އުފެދިފައިވާ ގާތްކަމާއި އެކުވެރިމަށް ބެލުމެއްނެތި އެކަކު އަނެކަކާ ޖެހިލުމެއްނެތި ވާދަކުރުމުގެ ރޫހުގައެވެ. ކޮންމެއަކަސް މިރޭގެ ޝޯވގައި މި 5 ބައިވެރިންގެ ވާދަވެރިކަމާއި ހުނަރުވެރިކަން މިރޭގެ ޝޯވއިން ދައްކަންޖެހޭނެއެވެ. ސަބަބަކީ މި ހަފްތާގެ ޝޯވއާއެކު މޯލްޑިވިއަން އައިޑަލްގެ ދެވަނަ ސީޒަންގެ ގްރޭންޑް ފިނާލޭއަށް ދަތުރުކުރާނެ ގަދަ 3 ބައިވެރިން ކަނޑައެޅިގެންދާނެތީއެވެ. އެހެންކަމުން ގަދަ ތިނެއްގައި ހިމެނި، ގްރޭންޑް ފިނާލޭގެ ސްޓޭޖުން ޖާގައެއް ކަށަވަރުކުރުމަށް ޖަޖުންނާއި އާއްމުންގެ ހިތާ ކުޅެލެވޭ ފަދަ މޮޅު ރީތި ހުށައެޅުންތަކެއް މި ބައިވެރުން މިރޭ ހުށައަޅަންޖެހޭނެއެވެ. މި ރޭގެ ޝޯވ އަކީ މި 5 ބައިވެރިންނަށްވެސް ވަރަށް ޕްރެޝަރ ބޮޑު ޝޯވއެކެވެ.

img:http://s1.psmnews.mv/images/660x400/14928879449251.jpg|މޯލްޑިވިއަން އައިޑަލް ސީޒަން 2 ގެ ގަދަ 5 ބައިވެރިންނާއި، އައިޑަލް ސީޒަން 1 ގެ ބައިވެރިން / ފައިިލް ފޮޓޯ: ޕީއެސްއެމް

ގަދަ ތިނަކަށް ކުރާ ހަނގުރާމައަށް މިރޭ މި 5 ބައިވެރިން ނުކުންނައިރު މިދިޔަ ސީޒަންގެ ގަދަ ތިނެއް މި ފަސްބައިވެރިންނަށް ދިނީ އެއް މެސެޖެކެވެ. ލައިޝާ ޖުނައިދާއި ޝަލަބީ އިބްރާހީމް، އަދި މުހައްމަދު އިޝާންވެސް ބުނީ އެއް ވާހަކައެކެވެ.

"މިހާރު އަނެއްކާވެސް މިއަށްވުރެ އިތުރަށް މިއަށްވުރެ ރަނގަޅަށް ޕަރފޯމްކުރަން ގަދަ ފަހަކަށް މަޖުބޫރުވާނެ.. ދެން ކޮމްޕެޓިޝަން މިއޮތީ ވަރަށް ވަރަށް ޓަފްވެފައި. އެހެންވީމަ މިހާރު އެންމެ ބެސްޓް ހުރިހާ ކުދިންވެސް ދޭން ޓްރައިކުރަންވާނެ. ޓްރައިކޮށްފިއްޔާ ގެރެންޓީ އެކުއްޖަކު ބޭނުންވާ ހިސާބަކަށް ދެވޭނެކަން..."  ފުރަތަމަ މޯލްޑިވިއަން އައިޑަލް ލައިޝާ ޖުނައިދު ބުންޏެވެ.

"އަސްލު 4 ކުދިންނަމަ ތަންކޮޅެއް އުނދަގޫވާނެހެން ހީވާތީ ކަންނޭނގެ 5 ކުދިންނަށް ދެވަނަ ފުރުޞަތެއް ޖަޖުން އެ ދިނީ. ދިނީމަ އެ ފުރުޞަތުގެ ބޭނުން އެންމެ ރަނގަޅަށް ހިފަން އިނގޭ ކުދިންނަކީ އެންމެ މޮޅު ކުދިންކަމުގައި ޝަލަބީ ދެކެނީ.. ވަރަށް ރަނގަޅު އޮޕޮޗިއުނިޓީއެއް ޖަޖުން އެ ދެއްވީ އެކުދިންނަށް.." ޝަލަބީ އިބްރާހީމް ބުންޏެވެ.

"މިއީ ހަމަގައިމުވެސް މި މުބާރާތުގައި މިފަހަރުގެ ސްޓާރުންނަށް ވާން ލިބޭ އެންމެ ފަހު ޗާންސް.. ގަދަ ތިނެއްގައި ހިމެނުން އެއީ އިޝާން ދެކޭގޮތުގައި އައިޑަލް އަކީ އައިޑަލްކަން ފެންނާނީ އަސްލު ފައިނަލް ރޭ ކިޔާލުމުންނޭ.." - މުޙައްމަދު އިޝާން ބުންޏެވެ.

ކޮންމެ އަކަސް ސީޒަން އެކެއްގެ ގަދަ ތިނެއްގައި ވާދަކުރި މި 3 ބައިވެރިންނަކީވެސް މިހާރު ރާއްޖޭގެ މިއުޒިކް އިންޑަސްޓްރީގައި ކާމިޔާބުކަމާއެކު ފިޔަޖަހަމުން އަންނަ ވަރަށްވެސް ކުޅަދާނަ 3 ފަންނާނުންނެވެ. އެހެންކަމުން ސީޒަން ދޭއްގެ ގަދަ ތިނަކަށް ދަތުރުކުރާ ބައިވެރިންގެ ފަރާތުންވެސް އެމީހުންގެ ސަޕޯޓަރުންނާއި ބެލުންތެރިން ކުރާ އުއްމީދުތައް ވަރަށްވެސް ފޮނިވާނެކަން ޔަޤީނެވެ.

ވާދަވެރި ޝޯވތަކަކަށްފަހު އައިޑަލް ސީޒަން ދޭއްގެ ޝޯވތައް ގާތްގަނޑަކަށް ނިމުމަކާ ހިސާބަށް ދަތުރުކޮށްފައިވާއިރު، މި ޝޯވގެ ގަދަ 5 ބައިވެރިން، ޢިބްރާހީމް ވަޙީދު، މުޙައްމަދު ތަސްނީމް، ޢަބްދުﷲ ހިޝާން، ޙަމޫދު އަޙްމަދު އަދި ޝަމްވީލް މުޙައްމަދުގެ ފަރާތުން ހިތްގައިމު ރީތި ލަވަތަކެއް ފެނިފައިވެއެވެ. 

މިރޭގެ ޝޯވއަށް ލޯބީގެ ލަވަތަކާއި، އަންފޮގެޓަބަލް މޯސްޓް ފޭވަރިޓް ސޯންގ މި ތީމްތަކާއެކު ބައިވެރިން މިރޭ ނުކުންނާނީ އެމީހުންގެ ހަނދާނުން ފޮހެލަން އެންމެ ދަތި ހަދާންތަކާއި ހަޔާތާއި ގުޅިފައިވާ އެންމެ ރީތި ލަވަތަކާއިއެކުއެވެ. މިރޭގެ ޝޯވގައިވެސް ކޮންމެ ބައިވެރިއަކުވެސް 2 ލަވަ ހުށައަޅާދޭނެއެވެ. މިރޭގެ ޝޯވގައި ގެސްޓް ޖަޖެއްގެ ގޮތުގައި ބައިވެރިވާނީ މިއުޒިކް އިންޑަސްޓްރީގައި ކުރިއަރަމުން އަންނަ ޒުވާން ފަންނާނެއްކަމުގައިވާ ރިޝްވާން އައިމަންނެވެ.

މޯލްޑިވިއަން އައިޑަލްގެ ދެވަނަ ސީޒަންގެ ގްރޭންޑް ފިނާލޭއަށް ދަތުރުކުރާ ގަދަ 3 ބައިވެރިން އިޢުލާން ކުރުން އޮންނާނީ މާދަމާ ރޭ ބާއްވާ އެލިމިނޭޝަން ނައިޓުގައެވެ.