ޓްރީ ޓޮޕް ހޮސްޕިޓަލް ހުޅުވިގެންދާނީ، އޯޕަން ހާޓް ސާޖަރީ ހެދޭ ފެންވަރުގެ ޚިދުމަތްތަކާއެކުގައިކަމަށް ޓްރީޓޮޕް އިންވެސްޓަމަންޓް ޕްރައިވެޓް ލިމިޓެޑުން ހާމަކޮށްފިއެވެ.
އަންނަ އޮގަސްޓްމަހު ޓްރީ ޓޮޕް ހޮސްޕިޓަލް ހުޅުވިގެންދާނީ، މިހާތަނަށް ރާއްޖެއިން ހެދެންނެތް އޯޕަން ހާޓް ސާޖަރީ ހެދޭ ފެންވަރުގެ ޑޮކްޓަރަކާއެކުކަމަށް ޓްރީޓޮޕް އިންވަސްޓަމަންޓް ޕްރައިވެޓް ލިމިޓެޑުން ހާމަކޮށްފިއެވެ.
ޒުވާނުންގެ ސިޓީގެ ގޮތުގައި ސަރުކާރުން ތަރައްޤީކުރައްވާ ހުޅުމާލޭގައި، އަމިއްލަ ކުންފުންޏަކުން ހަދާ މި ހޮސްޕިޓަލުން ޚިދުމަތް ދެމުންދާނީ އެންމެ ފަހުގެ ޒަމާނީ ޓެކްނޮލޮޖީ ބޭނުންކޮށްގެންކަމަށް ޓްރީޓޮޕް އިންވެސްޓަމަންޓުން ބުނެއެވެ.
ބައިނަލްއަޤްވާމީ ފެންވަރުގެ ހޮސްޕިޓަލެއްގައި ހުންނާނެ ހުރިހާ ވަސީލަތްތަކާއެކު އަންނަ އޮގަސްޓްމަހު ހުޅުވާ ޓްރީޓޮޕް ހޮސްޕިޓަލަކީ، ރާއްޖޭގައި ޤާއިމުކުރާ މަލްޓި ސްޕެޝަލިޓީ ފުރަތަމަ ހޮސްޕިޓަލެވެ. ޓަރޝަރީ ފެންވަރުގެ މި ހޮސްޕިޓަލް ހުޅުވިގެންދާނީ ތަފާތު ސަރޖަރީތައް ހެދޭ ފެންވަރުގެ ތަޖުރިބާކާރު ޑޮކްޓަރުންނާއި ގިނަ ވަސީލަތްތަކާއެކުއެވެ. ޓްރީޓޮޕް އިންވެސްޓްމަންޓް ޕްރައިވެޓް ލިމިޓެޑްގެ ޑިރެކްޓަރ އަޙުމަދު ސަލީމް ވިދާޅުވީ، މި ހޮސްޕިޓަލުގައި ޚާއްސަ ކެތްލެބެއް ޤާއިމް ކުރުމަށް ހަމަޖެހިފައިވާއިރު އެތަނުން، އޯޕަން ހާޓް ސާޖަރީގެ ޚިދުމަތްވެސް ލިބޭނެކަމަށެވެ. އަދި މިކަމަށް ބޭނުންވާ ޚާއްޞަ ޑޮކްޓަރެއްވެސް މިހާރު ހަމަޖެހިފައިވާކަމަށްވެސް ސަލީމް ވިދާޅުވިއެވެ.
img:http://s4.psmnews.mv/images/660x400/14911440835175.jpg|ޓްރީ ޓޮޕް ހޮސްޕިޓަލުގެ މަސައްކަތް ބައްލަވާލެއްވުމަށް ހެލްތް މިނިސްޓަރ ކުރެއްވި ޒިޔާރަތުގެ ތެރެއިން / ފޮޓޯ: ޕީއެސްއެމް
" އަޅުގަނޑުމެންނަށް ހޯދަން އެންމެ އުނދަގޫވާނެހެން ހިވީ ޑޮކްޓަރު މިހާރު ލިބިއްޖެ. އެއީ އޯޕަން ހާޓް ސަރޖަރީ ހެދޭ ފެންވަރުގެ ޑޮކްޓަރެއް. އޭނަ ލިބިގެން މިހަފްތާތެރޭގައި އޭނާ ދިވެހިރާއްޖެ އަންނާނެ. އެހެންވީމަ އެއީ އަޅުގަނޑުމެންނަށް ލިބުނު ވަރަށް ބޯޑު ކާމިޔާބީއެއް. އޭނަޔަކީ އޮސްޓްރިޔާގެ ވަރަށް ތަޖުރިބާކާރު ސާޖަންއެއް. އެއީ ދިވެހި ރާއްޖޭގައި އަދި ނެތް ސްޕެޝަލިޓީއެއް."
ދިވެހިރާއްޖޭގެ ސިއްޙީ ނިޒާމް ހަރުދަނާކޮށް ތަރައްޤީކުރުމަށް ބޮޑު އިސްކަމެއް ސަރުކާރުން ދެއްވާފައިވާއިރު، ސިއްޙީ ނިޒާމަކީ އާންމުން އިތުބާރުކުރާ ނިޒާމަކަށް ހެއްދެވުމަކީވެސް ސަރުކާރުގެ އަމާޒެކެވެ. އެގޮތުން ޕްރައިވެޓް ކުންފުންޏަކުން ތަރައްޤީކުރާ ޓްރީޓޮޕް ހޮސްޕިޓަލުންވެސް ރައްޔިތުންނަށް އިތުބާރު ލިބިގެންދާނެކަމަށް ހެލްތް މިނިސްޓަރ ވަނީ ވިދާޅުވެފައެވެ. ދުނިޔޭގެ ތަޖުރިބާކާރު ޑޮކްޓަރުން ހިމެނޭ ނެޓްވޯކަކުން ޓްރީޓޮޕް ހޮސްޕިޓަލު ހިންގަވާއިރު، ފުލީ އޮޓަމޭޓްކޮށް ހިންގާ މިހޮސްޕިޓަލުން އޮސްޓްރޭލިޔާއާއި މެލޭޝިޔާ އަދި ޔޫރަޕްގެ އިތުރު ޤައުމުތަކުގެމެދުގައި އުފެދިފައިވާ މެޑިކަލް ސަޕޯޓް ސިސްޓަމެއްގެ ތެރެއިން ޚިދުމަތް ލިބެމުންދާނެކަމަށްވެސް ޓްރީޓޮޕްގެ މެނޭޖްމަންޓުން ވިދާޅުވެއެވެ.
"އެއްވެސް ކަހަލަ ޕޭޕަރވޯކްސް ކުރާކަށް ނުޖެހޭނެ، ހުރިހާ އިމޭޖްތައްވެސް އެކްސްރޭ ނެގީމަ ބޭނުން ޑޮކްޓަރަކަށް ބޭނުންތާކުން ބަލާލެވޭނެ. އަދި އެވަރުން ނުވެއްޖެއްޔާ އަޅުގަނޑުމެންނަށް އެ އިމޭޖްތައް ފޮނުވާލެވޭނެ މިސާލަކަށް އޮސްޓްރޭލިޔާ ނޫނީ މެލޭޝިޔާގެ އަޅުގަނޑުމެންގެ އެސޯސިއޭޓް ހޮސްޕިޓަލަކަށް. އޭރުން އެތަންތަނުންގެ ޑޮކްޓަރުންގެ އެހީވެސް ލިބިގެންދާނެ."
img:http://s3.psmnews.mv/images/660x400/14911440258740.jpg|ހުޅުމާލޭގައި ތަރައްޤީކުރައްވާ ޓްރީ ޓޮޕް ހޮސްޕިޓަލް / ފޮޓޯ: ޕީއެސްއެމް
ޓްރީޓޮޕް ހޮސްޕިޓަލް ހުޅުވުމަށް ތައްޔާރުވަމުންދާއިރު، އެ ހޮސްޕިޓަލުގައި މަސައްކަތްކުރުމަށް، ކުރިން ސިއްޙީ ދާއިރާގެ އެކި މަސައްކަތްތަކުގައި ޙަރަކާތްތެރިވެފައިނުވާ އައު މީހުން ރެކްރޫޓްކުރުގެ މަސައްކަތްވެސް ޓްރީޓޮޕް އިންވެސްޓްމެންޓުންދަނީ ކުރަމުންނެވެ. ރާއްޖޭގައި މިހާރު ހިދުމަތް ދެމުން އަންނަ ހޮސްޕިޓަލްތަކާއި ޓްރީޓޮޕް ހޮސްޕިޓަލާއި ހުރި ތާފަތާކީ އެޑްމިޓްކޮށްގެން ފަރުވާ ދޭ ބަލި މީހުންގެ ކެއުމުގެ ކަންކަންކަމާއި، ބޭސް ލިބޭނެ އިންތިޒާމު ހޮސްޕިޓަލުން ހަމަޖައްސާފައިވުމެވެ. އަދި ބަލި މީހާ ގާތުގައި އެހީތެރިއަކު ކޮންމެހެން ހުންނާކަށްނުޖެހެއެވެ.
ރަށްރަށުން އެޕޮއިންޓްމެންޓް ހަދައިގެން ވަކި ދުވަހަކަށް އަންނަ މީހުންނަށްވެސް ޚާއްސަ އިންތިޒާމްތަކެއް ޓްރީޓޮޕް ހޮސްޕިޓަލުން ހަމަޖައްސަވާފައިވެއެވެ. އެގޮތުން ބަލިމީހުންގެ އެހީތެރިންނަށް، ހޮސްޕިޓަލުގެ ސަޕޯޓް ބިލްޑިންގގެ ގޮތުގައި ހަދާ 8 ބުރީގެ ޢިމާރާތުގެ އެއް ފްލޯގައި ހެޔޮއަގުތަކެއްގައި ރޫމްތައް ލިބެން ހުންނާނެކަމަށް ޓްރީޓޮޕް ހޮސްޕިޓަލުގެ މެނޭޖްމަންޓުން ވިދާޅުވެއެވެ.