ދިވެހިރާއްޖޭގެ ހައިކޯޓުގެ ފަނޑިޔާރުކަމުގެ މަޤާމަށް 2 ފަނޑިޔާރުން ހޯއްދެވުމަށް ޖުޑީޝަލް ސަރވިސް ކޮމިޝަނުން އިޢުލާންކުރައްވައިފިއެވެ.
ކޯޓުތަކާބެހޭ ޤާނޫނުގައިވާ ގޮތުން ދިވެހިރާއްޖޭގެ ހައިކޯޓުގެ ފަނޑިޔާރުންގެ މަޖިލިސް އެކުލެވިގެންވަނީ 9 ފަނޑިޔާރުންގެ މައްޗަށެވެ. ޖުޑީޝަލް ސަރވިސް ކޮމިޝަނުން ހައިކޯޓަށް ފަނޑިޔާރުން ހޯއްދެއްވުމަށް ކުރެއްވި އިޢުލާނުގައި ބަޔާންކޮށްފައިވާގޮތުގައި، ފަނޑިޔާރުކަމަށް ކުރިމަތިލެވޭނީ ޢުމުރުން 25 އަހަރުފުރި، ޤާނޫނީ ދާއިރާއިން ފުރަތަމަ ޑިގްރީ ޙާޞިލްކުރައްވާފައިވާ ބޭފުޅުންނަށެވެ. އަދި ޤާނޫނީ ވަކީލުކަމުގައި ނުވަތަ ފަނޑިޔާރުކަމުގައި 5 އަހަރުގެ ތަޖުރިބާ ލިބިވަޑައިގެން ތިއްބެވި ބޭފުޅުންނަށެވެ.
ހައިކޯޓުގެ ފަނޑިޔާރުކަމަށް ކުރިމަތިލުމުގެ ފުރުޞަތު ހުޅުއްވާލައްވާފައިވަނީ ހައިކޯޓުގެ ފަނޑިޔާރު ޑރ. އަޒްމިރާލްދާ ޒާހިރާއި، އަލްއުސްތާޛް ޢައްބާސް ޝަރީފް ރިޓަޔަރކުރެއްވުމާ ގުޅިގެނެވެ.
ހައިކޯޓުގައި މިހާރު ތިއްބެވީ 7 ފަނޑިޔާރުންނެވެ. ކޯޓުތަކާބެހޭ ޤާނޫނަށް ރައްޔިތުންގެ މަޖިލީހުން ގެންނެވި އިޞްލާޙްގެ ދަށުން ހައިކޯޓުގެ ގޮފިތައް ރާއްޖޭގެ އުތުރާއި ދެކުނުގައި ޤާއިމުކުރައްވަންޖެހެއެވެ. އުތުރު ގޮތްޕާއި، ދެކުނު ގޮފި ޤާއިމުކުރައްވާފައި ވީނަމަވެސް އުތުރު ގޮތްޕަށް ފަނޑިޔާރުން އަދި ޢައްޔަނު ކުރައްވާފައެއް ނުވެއެވެ. ހައިކޯޓުގެ ގޮފިތަކަށް ފަނޑިޔާރުން ޢައްޔަނުކުރެއްވުމާ ގުޅޭގޮތުން މިދިޔަމަހު ސްޕްރީމް ކޯޓުން އެކުލަވާލެއްވި ސަރކިއުލަރގައި ވަނީ، ހައިކޯޓަށް އަލަށް ޢައްޔަންކުރައްވާ ފަނޑިޔާރުން ޢައްޔަންކުރާއިރު، ހައިކޯޓުގެ ގޮފިތަކުގައި ފަނޑިޔާރުން ހަމަނޫންނަމަ، އަލަށް ޢައްޔަންކުރައްވާ ފަނޑިޔާރުން ޢައްޔަނުކުރައްވާނީ ހައިކޯޓުގެ ގޮފިތަކުގެ ތެރެއިން ގޮތްޕަކަށް ކަމަށެވެ. އެހެންކަމުން ޖުޑީޝަލް ސަރވިސް ކޮމިޝަނުގެ އިޢުލާނުގެ ދަށުން ހައިކޯޓަށް ޢައްޔަންކުރައްވާ ފަނޑީޔާރުން މަސައްކަތްކުރައްވާނީ ހައިކޯޓުގެ ގޮފިތަކުގެ ތެރެއިން ގޮތްޕެއްގައެވެ.
ހައިކޯޓުގެ ފަނޑިޔާރުކަމަށް ކުރިމަތިލުމުގެ ފުތުޞަތު މިމަހުގެ 18 ވަނަ ދުވަހުގެ ނިޔަލަށް ވަނީ ހުޅުއްވާލައްވާފައެވެ. ހައިކޯޓަށް ފަނޑިޔާރުން ޢައްޔަންކުރައްވާނީ ޖުޑީޝަލް ސަރވިސް ކޮމިޝަނުން އިންޓަރވިއު ކުރެއްވުމަށްފަހުގައެވެ.