ރާއްޖޭގެ އިޖްތިމާޢީ ވެށި އަމާން، ވެށްޓަކަށް ހެދުމަށް ސަރުކާރުން ގެންގުޅުއްވާ ސިޔާސަތުގެ ތެރޭގައި ހިމެނޭ މައިގަނޑު އެއްކަމަކީ، ރައްޔިތުންނަށް ރައްކާތެރި މާޙައުލެއް ޤާއިމުކުރެއްވުމުގެ މަސައްކަތެވެ. މިމަސައްކަތުގައި އެންމެ މުހިންމު ދައުރެއް އަދާކުރާ އެއްބަޔަކީ ދިވެހި ފުލުހުންނެވެ.
ފުލުހުންގެ ތަފާސް ހިސާބުތަކަށް ބަލާލާއިރު ވޭތުވެދިޔަ 3 އަހަރުދުވަހުގެ ތެރޭގައި މުޖުތަމަޢުގައި ކުށްކުރާ މިންވަރު ވަނީ މަދުވެފައެވެ. ޚާއްޞަކޮށް ބޮޑެތި ކުށްކުރާ ނިސްބަތް ވޭތުވެދިޔަ 3 އަހަރު ދުވަހުގެ ތެރޭގައި މަދުކުރެވިފައިވާކަން ތަފާސްހިސާބުތަކުން ދައްކައެވެ. ފުލުހުންގެ ތަފާސް ހިސާބުތައް ދައްކާގޮތުން ވޭތުވެދިޔަ ތިން އަހަރުގެ ތެރޭގައި އެކި އެކި ކުށްތައް ކޮށްގެން ފުލުހުންނަށް ރިޕޯޓް ކޮށްފައިވާ މިންވަރުވެސް އަހަރަކަށްވުރެ އަހަރެއް ވަނީ ދަށަށްގޮސްފައެވެ.
ވޭތުވެދިޔަ 8 އަހަރުގެ ތެރޭގައި އެކި އެކި ކުށްތައް ކޮށްގެން ފުލުހުންނަށް ރިޕޯޓް ކުރި މައްސަލަތަކުގެ ޢަދަދު އެންމެ މަދު އަހަރަކީ 2016 ވަނަ އަހަރެވެ. އެގޮތުން 2016 ވަނަ އަހަރު ފުލުހުންނަށް ހުށަހަޅާފައިވަނީ 16293 މައްސަލައެެވެ. 2013 ވަނަ އަހަރު މި ޢަދަދު އުޅެނީ 21885 ގައެވެ.
ވޭތުވެދިޔަ ތިން އަހަރުދުވަހުގެ ތެރޭގައި މަސްތުވާތަކެއްޗާ ގުޅުންހުރި ކުށްތަކުގެ ޢަދަދުވެސް 60 އިންސައްތަ ދަށަށް ގޮސްފައިވާކަން ފުލުހުންގެ ތަފާސް ހިސާބުތަކުންދައްކައެވެ. މަސްތުވާތަކެއްޗާއި ބަނގުރާއާ ގުޅުންހުރި 3965 މައްސަލަ 2013 ވަނަ އަހަރުގެ ތެރޭގައި ފުލުހުން ބައްލަވާފައިވާއިރު 2016 ވަނަ އަހަރު މިޢަދަދު ވަނީ 2378 އަށް ދަށްވެފައެވެ.
އިޖްތިމާއީ ނިޒާމުން އެއްވެސް މީހަކު ބާކީ ނުކުރުމުގެ ސިޔާސަތުގެ ދަށުން، ކުށްކުރާ މީހުންނާއި، މަސްތުވާތަކެތީގެ ވަބާގައި ޖެހިފައިވާ މީހުން ރިހެބިލިޓޭޓްކޮށްގެން އަނބުރާ މުޖުތައަށް ނެރުމަށް މީގެ ކުރިން ކުރެވިފައި ނުވާ މިންވަރަށް ސަރުކާރުން ގެންދަވަނީ މަސައްކަތް ކުރައްވަމުންނެވެ. ނަތީޖާއެއްގެ ގޮތުން ވޭތުވެދިޔަ ތިން އަހަރުދުވަހުގެ ތެރޭގައި ކުށް ތަކުރާރުކުރާ މީހުންގެ ޢަދަދު ވަނީ 12 އިންސައްތަ ދަށްވެފައެވެ.
ކުޑަކުދިންނާއި، ޒުވާނުނާއި މުޖުތަމަޢުގެ އެކި ޢުމުރުފުރާތަކުގެ މީހުންގެ މެދުގައި ހޭލުންތެރިކަން އިތުރުކުރެއްވުމަށް ފުލުހުން ކުރައްވަމުން ގެންދަވާ މަސައްކަތްތަކުގެ ދަށުން ވޭތުވެދިޔަ ތިން އަހަރުގެ ތެރޭގައި ބްލޫސް ފޯ ޔޫތް އަދި ރެޑީ ކޭންޕް، 9954 މީހުން ފުރިހަމަކޮށްފައިވާކަމަށް ފުލުހުން މައުލޫމާތުދެއްވައެވެ.