ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމްއަށް ޒުވާނުންގެ ތާޢީދު އޮތްކަން ހާމަކުރުމުގެ ގޮތުން ހުޅުމާލޭގައި ޚާއްޞަ ސައިކަލް ބުރެއް ބާއްވައިފިއެވެ.
ޒުވާނުން ރައީސް ޔާމީނަށް ތާއީދުކުރާކަން ހާމަކުރުމަށްޓަކައި ހުޅުމާލޭގައި ކުރިއަށްގެންދިޔަ ސައިކަލް ބުރުގައި ގިނަޢަދަދެއްގެ ޒުވާނުން ވަނީ ބައިވެރިވެފައެވެ. މި ސައިކަލް ބުރުގައި ބައިވެރިވި ޒުވާނުން ވަނީ ރައީސް ޔާމީނަށް ތާޢީދުކުރާކަން ހާމަކޮށް ޝުޢޫރު ފާޅުކޮށްފައެވެ.
މި ހަރަކާތް އިންތިޒާމް ކުރުމުގައި އިސްކޮށް އުޅުއްވި ޢަބްދުއްﷲ ރަޝީދު، ޕީ.އެސް.އެމް އަށް މަޢުލޫމާތުދެއްވަމުން ވިދާޅުވީ މި ހަރަކާތަކީ ޒުވާނުން އިސްނަގައިގެން، ވަރަށް ކުއްލި ގޮތަކަށް ރޭވި ޙަރަކާތެއް ކަމަށާ، މިއީ ރައީސް ޔާމީނަށް ޒުވާނުންގެ މެދުގައި އޮތް ތާޢީދު ހާމަކުރުމުގެ ގޮތުން ކުރިއަށްގެންދިޔަ ޙަރަކާތެއްކަމަށެވެ.
img:http://s1.psmnews.mv/images/660x400/14903690466930.jpg|ސައިކަލު ބުރު އިންތިޒާމްކުރުމުގައި އިސްކޮށް ހަރަކާތްތެރިވި ފަރާތްތަކުން ނޫސްވެރިންނަށް މަޢުލޫމާތުދެއްވަނީ / ފޮޓޯ: ޕީއެސްއެމް
މި ހަރަކާތުގައި ބައިވެރިވި ބައިވެރިން ބުނީ ސިޔާސީ ގޮތުން ކަންކަން ހަލަބޮލިވެގެންގޮސްފައިވާ މި ދަނޑިވަޅުގައި ޒުވާނުން ތިބީ ރައީސް ޔާމީނާ އެކުކަން ރައްޔިތުންނަށް އެންގުމަކީ މި ހަރަކާތުގެ އެންމެ ބޮޑު މަޤްޞަދުކަމަށެވެ.
ރައީސް ޔާމީން ރައީސްކަމާ ޙަވާލުވެވަޑައިގަތުމަށްފަހު ޒުވާނުންގެ ތަރައްޤީއާއި، ޒުވާނުންނަށް ދިމާވެފައިވާ ދަތިތައް ހައްލުކޮށްދެއްވުމަށް ޚާއްޞަ އިސްކަމެއް ދެއްވާފައިވެއެވެ. އަދި އެމަނިކުފާނަކީ ޒުވާނުންގެ މެދުގައި މަޤްބޫލު ބޭފުޅެކެވެ. އެމަނިކުފާނަށް ތާޢީދުކުރުމުގެ ގޮތުން ހުޅުމާލޭގައި ބޭއްވި ސައިކަލް ބުރުގައި ގިނަޢަދަދެއްގެ ޒުވާނުން ބައިވެރިވެފައިވާއިރު، ރައީސް ޔާމީންގެ ސަރުކާރުން ހުޅުމާލެ ތަރައްޤީކުރައްވަމުން ގެންދަވަނީ ޒުވާނުންގެ ސިޓީއެއްގެ ގޮތުގައެވެ.