ޑިމޮކްރަސީގެ ނަމުގައި ދުނިޔޭގެ އިސްލާމީ ބޮޑެތި ބައެއް ޤައުމުތައް ސުންނާފަތިކޮށްލިގޮތަށް ދިވެހިރާއްޖެ ސުންނާފަތިކޮށްލިޔަ ނުދެއްވާނެކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ކ. ތުލުސްދޫގެ ބިން ހިއްކައި ނިންމެވުން ފާހަގަކުރެއްވުމަށް ބޭއްވެވި ރަސްމިއްޔާތު ޝަރަފްވެރިކޮށްދެއްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވީ ރައްޔިތުން އެދޭ ކަންކަން ސަރުކާރުން ކޮށްދެއްވަނީ މުޒާހަރާއާއި ހަމަނުޖެހުންތަކުގެ ތެރެއިން ނޫންކަމަށެވެ. ރައްޔިތުންގެ ޝަކުވާތަކާއި، ރައްޔިތުން އެދޭކަންކަން ސަރުކާރަށް ހުށައެޅުމުގެ ފުރުޞަތު ކޮންމެ ރައްޔިތަކަށްވެސް އޮންނާނެ ކަމަށާއި، ތަރައްޤީގެ ދަތުރުގެ ނިމުން އަންނާނީ ރައްޔިތުންގެ ބޭނުންތައް އެންމެ ފުރިހަމައަށް ޙާޞިލްކޮށްދެއްވުމަށްފަހުގައިކަމަށް ރައީސުލްޖުމްހޫރިއްޔާ ވިދާޅުވިއެވެ.
"ތުލުސްދުއަށް ބިން ނެތިގެން ދިޔައިރު ތުލުސްދޫއަށް ބިން އިތުރުވެގެން ދިޔައީ މުޒާހަރާތަކެއް ކޮށްގެނެއް ނޫން. ތުލުސްދުއަށް ބިން އިތުރުވެގެން ދިޔައީ، ތުލުސްދޫގެ ރައްޔިތުންގެ މި އިލްތިމާސް އަޅުގަނުމެންނާ ހަމައަށް އައިސް މީ ޙަޤީޤަތުގައިވެސް ތުލުސްދޫގެ ރައްޔިތުންނަށް ބޭނުންވާ ކަމެއްކަމުގައި އަޅުގަނޑުމެންނަށް ޤަބޫލުކުރެވޭތީ" ރައީސް ވިދާޅުވިއެވެ.
ޑިމޮކްރަސީގެ ނަމުގައި ޤައުމު ހަމަނުޖެހުމުގެ ތެރެއަށް ވައްޓާލުމުގެ ފުރުޞަތު ނުދެއްވާނެ ކަމަށާއި، ތަރައްޤީއާއި ތަހުޒީބަކީ ހަމަޖެހުމާއި އަމާންކަމުގެ ތެރެއިން ޙާޞިލްކުރެވޭނެ އެއްޗެއްކަމުގައި ރައީސުލްޖުމްހޫރިއްޔާ ވިދާޅުވިއެވެ. އިސްލާމީ ބޮޑެތި ދައުލަތްތަކުގައި ފަހުގެ ތާރީޚުތަކުގައި ހިނގި ދާޚިލީ ހަމަނުޖެހުންތަކުގައި އެޤައުމުތަކުގެ ތަރައްޤީ އެތައް އަހަރެއް ފަހަތައް ޖެހިފައިވާކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ، މިއީ ދިވެހިރައްޔިތުން ވިސްނަންޖެހޭ ކަމެއްކަމަށެވެ. ދުނިޔޭގެ އިސްލާމީ ބައެއް ދައުލަތްތަކާ އެއްގޮތަށް ދިވެހިރާއްޖެ ހަމަނުޖެހުމުގެ ތެރެއިން ސުންނާފަތިވިޔަ ދީގެން ނުވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.
img:http://s1.psmnews.mv/images/660x400/14869796019479.jpg|ތުލުސްދޫ ބިން ހިއްކުމުގެ މަޝްރޫޢުގެ ނިމުން ފާހަގަކުރެއްވުމުގެ ރަސްމިއްޔާތުގެ ތެރެއިން- ފޮޓޯ: ހައުސިންގ މިނިސްޓްރީ
"އިސްތިޢުމާރީ ހުޅަނގުގެ އެކިފަރާތްތަކުން މިޤައުމުގެ އެކި އުބޫލުތަކާއި ޤައުމުތަކުގެ ލީޑަރުންނާ ދޭތެރޭގައި ހިތްހަމަ ނުޖެހިގެން ކޮންމެވެސް ކަހަމަ ބަހަނާއެއްގައި މުޅި އެތަނުގެ ތަހްޒީބު ބިމާހަމައަށް ތިރިކޮށްލިތަން އަޅުގަނޑުމެންނަށް ފެނިގެންދިޔައީ. ދިވެހި ދައުތަލަތުގެ ނިސްބަތުން އަޅުގަނޑުމެންނަށްވެސް މިތަކުލީފުތައް، މި އުނދަގޫތައް އުފުލަން ޖެހޭ، ކަންކަން ޒަމާނީ ކުރުމުގެ ނަމުގައި، ކަންކަން ޑިމޮކްރަސީއަށް، ނުވަތަ ދުސްތޫރީ އުސޫލަށް ފެއްތުމުގެ ނަމުގައި. އެކަމަކު ބޭރުގެ ތަޙްލީލުކުރާ ހުރިހާ ފަރާތްތަކުންވެސް ބުނާގޮތުގައި މި ސަރަހައްދުގައިވެސް އެންމެ ފުރިހަމަ ލިޔުމުން އެކުލަވާލެއްވިފައިވާ ދުސްތޫރެއް އޮތީ ދިވެހިރާއްޖޭގައި." ރައީސް ވިދާޅުވިއެވެ.
ސަރުކާރުން ރައްޔިތުންނަށް ތަރައްޤީ ހޯއްދަވައިދެއްވުމަށް ކުރައްވާ މަސައްކަތްތަކުގައި ދިވެހިރައްޔިތުންގެ ފުރިހަމަ އެއްބާރުލުން ބޭނުންވާކަމަށް އެމަނިކުފާނު ވިދާޅުވިއެވެ. މުޖުތަމަޢުގެ ކޮންމެ ފަރުދަކަށް ލިބޭ އުފަލަކީ ސަރުކާރާއި މުޅި މުޖުތަމައަށް ލިބޭ އުފަލެއްކަމަށް ރައީސުލްޖުމްހޫރިއްޔާ ވިދާޅުވިއެވެ.
"އަޅުގަނޑުމެންނަށް މިކުރެވޭ މަސައްކަތަކީ ހަމަ ބޭރު ދުނިޔޭގައި ކަންކަން ހިނގާ އުސޫލުން އެހެންނަމަވެސް ދިވެހި ވައްޓަފާޅިއަށް ފެތޭގޮތަށް، އިސްލާމީ އުސޫލުތަކާ އެއްގޮތަށް ރައްޔިތުންނަށް ތަރައްޤީ ހޯދަން ކުރާ މަސައްކަތް. މިމަސައްކަތް ކުރުމުގައި ރައްޔިތުން އަޅުގަނޑާއެކު ކުރިއަށް ވަޑައިގަތުމަށް އަޅުގަނޑު އެދެން." ރައީސް ވިދާޅުވިއެވެ.
ތަރައްޤީގެ މަސައްކަތްތަކުގައި ކައުންސިލްތަކުގެ ދައުރު ފާހަގަކުރައްވަމުން އެމަނިކުފާނު ވިދާޅުވީ ކައުންސިލްތަކުން ސަރުކާރަށް ފުރިހަމަ އެއްބާލުން ދެއްވަންޖެހޭކަމަށެވެ. އަދި ތަރައްޤީއަށް އޮތް ހުރަހަކަށް ކައުންސިލްތައް ވެވަޑައިނުގަތުމަށް ރައީސުލްޖުމްހޫރިއްޔާ އިލްތިމާސް ކުރެއްވިއެވެ.