ގއ.އަތޮޅުގައި ހުރި ޞިއްޙީ މަރުކަޒުތަކާއި، ހޮސްޕިޓަލުން ދެއްވާ ޚިދުމަތްތަކާއި، އެ މަރުކަޒުތަކުގެ ޙާލަތު މިނިސްޓަރ އޮފް ހެލްތު ޢަބްދުﷲ ނާޒިމް އިބްރާހީމް ބައްލަވާލައްވައިފިއެވެ.
ހެލްތު މިނިސްޓަރ ޢަބްދުﷲ ނާޒިމް އިބްރާހީމް ގއ.ގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި، މިއަދު ވަނީ އެއަތޮޅުގެ ތިން ރަށަކަށް ވަޑައިގެންފައެވެ. އެއީ ގއ. މާމެންދުއާއި، ނިލަންދުއާއި ދާންދޫއެވެ.
ހެލްތު މިނިސްޓަރުގެ މިދަތުރުފުޅުގައި އެރަށްރަށުގެ ޞިއްޙީ މަރުކަޒުތަކަށް ވަޑައިގެން އެތަންތަނުގެ މުވައްޒަފުންނާ ބައްދަލުކުރެއްވިއެވެ. މިބައްދަލުކުރެއްވުންތަކުގައި، މިނިސްޓަރ ވަނީ އެތަންތަނުގައި މަސައްކަތްކުރައްވާ މުވައްޒަފުންނާއި ބައްދަލުކުރައްވައި މުވައްޒަފުންނަށް ދިމާވާ ދަތިތައް އޮޅުންފިލުއްވާފައެވެ. މިނިސްޓަރގެ މިދަތުރުފުޅުގައި، އިއްޔެ ގއ. ވިލިނގިލީގައި ހުންނަ އަތޮޅު ހޮސްޕިޓަލަށް ވަޑައިގެން އެތަނުގެ މުވައްޒަފުންނާވެސް ބައްދަލުކުރެއްވިއެވެ. ހެލްތު މިނިސްޓަރ ގއ. އަތޮޅަށް ކުރައްވަމުން ގެންދަވާ ދަތުރުފުޅު ނިންމަވާލެއްވުމަށްފަހު އެނބުރި މާލެ ވަޑައިގަތުމަށް ހަމަޖެހިފައިވަނީ މިއަދު މެންދުރު ފަހުގެ ވަގުތެއްގައެވެ.