އަނިޔާގެ ސަބަބުން ސިނަރއަށް ޝެންހާއީ މާސްޓަރސްވެސް ނުކުޅެވޭނެ

ދުނިޔޭގައި އެއްވަނައަށް ރޭންކް ކުރެވިފައިވާ ފިރިހެން ޓެނިސް ކުޅުންތެރިޔާ ކަމަށްވާ އިޓަލީވިލާތުގެ ޔަނިކް ސިނަރއަށް ލިބިފައިވާ އަނިޔާ ރަނގަޅު ނުވާތީ މިއަންނަ ހަފްތާގައި ފެށުމަށް ހަމަޖެހިފައިވާ ޝެންހާއި މާސްޓަރސްއިން ވަކިވެއްޖެއެވެ.

މިއަހަރުގެ ޖުލައި މަހު ވިމްބަލްޑަން ޓެނިސް މުބާރާތް ކާމިޔާބު ކުރިފަހުން ސިނަރ އަދި މެޗެއް ކުޅެފައެއް ނުވެއެވެ. މިގޮތުން އުތުރު އެމެރިކާގެ ހާޑްކޯޓްގެ ހުރިހާ މުބާރާތްތަކެއް އޭނާއަށްވަނީ ގެއްލިފައެވެ. މީގެތެރޭގައި އަހަރުގެ ފަހު ގްރޭން ސްލޭމް މުބާރާތް ކަމަށްވާ ޔޫއެސް އޯޕަންވެސް ހިމެނުނެވެ. މަޢުލޫމާތުލިބޭގޮތުގައި ވިމްބަލްޑަންގެ ތެރޭގައި ސިނަރގެ ކަކުލަށް ލިބުނު އަނިޔާ އަދިވެސް މުޅިން ރަނގަޅެއް ނުވެއެވެ. މިކަމުގެ ސަބަބުން އޭނާވަނީ ޗައިނާގެ ވެރިރަށް ބެއިޖިންގގައި މިހާރު ކުރިއަށްދާ އޭ.ޓީ.ޕީ. ފައިވް ހަންޑްރެޑް މުބާރާތުގައިވެސް ކުޅެވޭގޮތް ނުވެފައެވެ.

މާސްޓަރސް ވަން ތައުޒަންޑްގެ އިވެންޓެއްގެގޮތުގައި ހިމެނޭ ޝެންހާއީ އޯޕަން ކުރިއަށް ދާނީ މިމަހުގެ 7 އިން 18 އަށެވެ. އަދި އެމުބާރާތުގައި ފިރިހެން ޓެނިހުގެ ދުނިޔޭގައި މިވަގުތު ފާހަގަ ކޮށްލެވޭ ގިނަ ތަރިން ކުޅޭނެކަމަށް މަޢުލޫމާތުލިބެއެވެ. މީގެތެރޭގައި އެމުބާރާތް ހަތަރު ފަހަރު ކާމިޔާބު ކޮށްފައިވާ ސަރބިއާގެ ނޯވަކް ޖޯކޮވިޗް، ޖަރުމަނުވިލާތުގެ އެލެގްޒެންޑަރ ޒުވަރޭވް، ސްޕެއިންގެ ކާލޯސް އަލްކަރާޒް، ރަޝިއާގެ ޑަނީލް މެޑްވެޑޭވް، އެމެރިކާގެ ބެން ޝެލްޓަން، ކެނެޑާގެ ފީލިކްސް އައުގަރ އަލިއާސީމް އަދި މިމުބާރާތުގެ އެންމެ ފަހުގެ ޗެމްޕިއަން ފަރަންސޭސިވިލާތުގެ ވެލެންޓިން ވަޗެރޯ ހިމެނެއެވެ.

ސިނަރ އެންމެ ފަހުން ޝެންހާއީ އޯޕަން ކާމިޔާބު ކޮށްފައިވަނީ 2024 ވަނަ އަހަރު ފައިނަލްގައި ޖޯކޮވިޗް ބަލިކުރުމަށްފަހުއެެވެ. ވިމްބަލްޑަންއަށް ފަހު ސިނަރ އަށް ނުކުޅެވުމުގެ ފައިދާ އެންމެ ބޮޑަށް ނަގަމުން އަންނަ އެއް ކުޅުންތެރިޔަކީ ދުނިޔޭގައި ދެވަނައަށް ރޭންކް ކުރެވިފައިވާ ޒުވަރޭވްއެވެ. މިގޮތުން ޔޫއެސް އޯޕަން ޒުވަރޭވް ކާމިޔާބު ކޮށްފައިވާއިރު މިހާރު ކުރިއަށްދާ ޗައިނާ އޯޕަން އާއި ކުރިއަށްއޮތް ޝެންހާއީ އޯޕަން ކާމިޔާބު ކުރެވިއްޖެނަމަ ދުނިޔޭގެ ރޭންކިންގގެ އެއްވަނައަށްއެރުމުގެ ފުރުސަތު އޭނާއަށް ލިބިގެންދާނެއެވެ.