ޒަމާނީ ޑިމޮކްރަސީގެ ނަމުގައި ވާހަކަދައްކާ އިދިކޮޅު ފަރާތްތަކުން މުޒާހަރާކުރާއިރު، ތަރައްޤީގެ މަޝްރޫޢުތައް ފުރިހަމަނުވެގެން އަޑުއުފުލާތަނެއް ފެނިވަޑައިނުގަންނަވާކަމަށާ، އެހެންނަމަވެސް ރިސްކް ނަންގަވައިގެންވެސް ރައްޔިތުން ބޭނުންވާ ތަރައްޤީގެ ފަސޭހަކަން، ފުރިހަމަކޮށްދެއްވަން ސަރުކާރުން މަސައްކަތްޕުޅު ކުރައްވާނެކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.
މޮލަކަތޮޅު މުލަކުގައި މިއަދު ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ، ޑިމޮކްރައީސީގައި އޮން ނަނީ ހަމައެކަނި ޚިޔާލުފާޅުކުރުން ނޫންކަމަށެވެ. ޑިމޮކްރަސީ އަކީ ވަރަށް ގިނަ ޙައްޤުތަކަކާއި ރައްކާތެރިކަމެއް ކަށަވަރުކޮށްދޭ ނިޒާމެއކްމަށާ، ދުނިޔޭގައި ކުރިއަރާފައިވާ ބޮޑެތިޤައުމުތަކުގައި ޑިމޮކްރެސީއަށް އަމަލުކުރަނީ، އެފަދަ އުސޫލުތަކާ އެއްގޮތަށް ހަމަހަމަ ކަމާއެކުކަން ރައީސް ފާހަަގަކުރެއްވިއެވެ. ސަރުކާރުން މަސައްކަތް ކުރައްވަނީ ރައްޔިތުންނަށް ބޭނުންވާ ޚިދުމަތްތަށް ފުރިހަމަ ކުރައްވައި ރައްޔިތުންނަށް ލިބިދޭންޖެހޭ އެންމެހާ ޙައްގުތަށް ރައްކާތެރިކުރެއްވުމަށްކަމަށް ރައީސް ވިދާޅުވިއެވެ.
ދިވެހިންނަށް މިހާރު ލިބިފައިހުރި ވަސީލަތްތައް ބޭނުންކޮށްގެން ބޮޑެތި މަޝްރޫޢުތަށް ފެށުމުގެ ބަދަލުގައި، ތަރައްޤީގެ ރޮނގުގައި ރިސްކު ނަގައިގެން ވެސް އެފަދަ ކަންކަން ކާމިޔާބުކުރެއްވުމަށް ސަރުކާރުން މަސައްކަތް ކުރައްވާކަމަށް އެމަނިކުފާނު ވިދާޅުވިއެވެ. އެގޮތުން ވެލާނާ އިންޓަނޭޝަނަލް އެއަރޕޯޓް ތަރައްގީކުރެއްވުމާއި، ހުޅުލެއާއި މާލެއާ ދެމެދު އަޅުއްވާ ބްރިޖް ފަދަ މަޝްރޫޢުތަކަށް ލޯނު ނަންގަވައިގެން މަސައްކަތް ކުރައްވަނީ، އެކަންކަމުން ރައްޔިތުންނަށް ލިބޭނެ ފަސޭޖަތަކަށް ބައްލަވައި، ވަރަށް އިތުބާރާއެކު އެދަރަނި އަދާކުރެވޭނެކަން ކަށަވަރުވާތީކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރާއްޖޭގެ އެކި ހިސާބުތަކުގައި އަލުން ކުރަން ޖެހިފައިވާ މަސައްކަތްތައް ކުރުމަކީ ސަރުކާރުން މިހާރު ކުރައްވަމުންގެންދަވާ އެންމެ މުހިއްމު މަސައްކަތްތައްކަމަށާއި، ތަރައްޤީއާއި އިޖުމތިމާޢީ ކުރިއެރުމުގެ ރޮނގުން އައު ވިސްނުމަކާއި، އައު އަޒުމަކާއެކު، އާދިވެހިރާއްޖެއަކާ ދިމާއަށް މިސްރާބުޖަހާފައިވާކަމަށް ރައީސް ވިދާޅުވިއެވެ.