"ބްރިޖުގެ ތަނބުތަކުގެ މަސައްކަތް އަންނަ ޖުލައިމަހު ނިންމާލެވޭނެ"

ޗައިނާ މޯލްޑިވްސް ފްރެންޑްޝިޕް ބްރިޖްގެ މަސައްކަތްތައް ކުރެވޭ ތިން ސައިޓްކަމުގައިވާ މާލޭ، ހުޅުލޭ އަދި ހުޅުމާލޭގެ ސައިޓްވެސް ފެނިގެންދަނީ ވަރަށް ޙަރަކާތްތެރިކޮށެވެ. ބްރިޖްގެ މަސައްކަތުގައި ގާތްގަނޑަކަށް 1100 މީހުން ޙަރަކާތްތެރިވާއިރު، މާލޭ ލޮނުޒިޔާރަތްކޮޅުގައި ޤާއިމްކޮށްފައިވާ ސައިޓަށް ބަލާލާއިރު، ބްރިޖްގެ ބޮޑެތި މަސައްކަތްތައް ރެއާއި ދުވާލު ގެންދަނީ ކުރަމުންނެވެ.

ހުޅުލެއާއި މާލެއާ ދެމެދު ސަރުކާރުން ހައްދަވާ ބްރިޖްގެ ދިގުމިނުގައި 1.39 ކިލޯމީޓަރު ހުރެއެވެ. ބްރިޖްގެ ފުޅާމިނުގައި 20.3 މީޓަރު ހުންނައިރު، ހަތަރު ފުރޮޅުލީ އުޅަނދުތަކަށް ހާއްސަ 4 ލޭން އޮންނާނެއެވެ. އަދި ސައިކަލް ދުއްވަން ވަކި ޚާއްޞަ ލޭނެއް އޮންނާނެއެވެ. ބްރިޖްގެ މަސައްކަތް މިހާރު ކުރިއަށްގޮސްފައިވާ ހިސާބަށް ބަލާއިރު، މައި ބްރިޖްގެ ފަސް ތަނބުގެ ތެރެއިން ހުޅުލޭކޮޅުން ހަދާ ފުރަތަމަ ތަނބުގެ ކޮންކްރީޓް ފައުންޑޭޝަން މަސައްކަތް ނޮވެމްބަރު މަހު ވަނީ ފަށާފައެވެ. އަދި މައި ތަނބުގެ ފައުޑޭޝަން އެޅުމަށް ބޭނުންވާ ހުރިހާ ޕައިލްތައް ޑިސެމްބަރުމަހުގެ 14 ވަނަ ދުވަހު ވަނީ ޖަހައި ނިންމާފައެވެ.

ބްރިޖްގެ މަސައްކަތް ކުރިއަށްދާގޮތާ ގުޅޭގޮތުން މީޑިއާއަށް ދެއްވި ޚާއްޞަ އިންޓަރވިއުއެއްގައި މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ޑރ. މުޙައްމަދު މުޢިއްޒު ވިދާޅުވީ، ބްރިޖްގެ ޢަމަލީ މަސައްކަތް ފެށްޓެވިތާ އަހަރެއްހާ ދުވަސްވާއިރު، މި މަސައްކަތުގެ ހުރިހާ ކަމެއްވެސް ވަރަށް ފުރިހަމަކަމާއެކު، ޝެޑިއުލަށްވުރެ އަވަހަށް ނިންމަވަމުންދާކަމަށެވެ. މިހާރު މަސައްކަތް ކުރިއަށްދާ ސްޕީޑަށް ބަލާނަމަ، އަންނަ އަހަރުގެ ޖުލައިމަހުގެ ނިޔަލަށް މެއިން ބްރިޖަށް ބޭނުންވާ ހުރިހާ ޕްލެޓްފޯމްތަކެއްގެ މަސައްކަތް ނިމިގެންދާނެކަމަށް މިނިސްޓަރ މުޢިއްޒު ވިދާޅުވިއެވެ.

img:http://s2.psmnews.mv/images/660x400/14829373890796.jpg|ބްރިޖުގެ މަސައްކަތް ބައްލާވަލެއްވުމަށް ރައީސް ޔާމީން ކުރެއްވި ޒިޔާރަތުގެ ތެރެއިން / ފޮޓޯ: ޕީއެސްއެމް

"މިހާރު މެއިން ބްރިޖްގެ ހުރިހާ ޕައިލްތަކެއް ޖަހާ ނިމިއްޖެ. 2017 ވަނަ އަހަރު އަޅުގަނޑުމެންނަށް ފެނިގެންދާނީ މިއަންނަ އަހަރުގެ ޖުލައިމަހާ ހަމައަށްދާއިރު މެއިން ބްރިޖްގެ ހުރިހާ ޕްލެޓްފޯމްތަކެއް މިދެންނެވީ ހުރިހާ ޕައިލްތަކަކަށް ކޮންކްރީޓްއަޅާ، ހުރިހާ ތަނބުތަކެއް ކޮންކްރީޓްކޮށް ނިމި، އޭގެ ޕައިލް ކެޕްތައް އަޅާ ނިންމާ، އެ ހުރިހާ ކަމެއް ނިމިގެންދާ މަންޒަރު" މިނިސްޓަރ ވިދާޅުވިއެވެ. 

މީގެ އިތުރުން މިނިސްޓަރ މުޢިއްޒު ސިފަކުރެއްވި ގޮތުގައި، 2017 ވަނަ އަހަރު ވެގެންދާނީ ބްރިޖާގުޅޭ މުހިއްމު މަސައްކަތެއް ނިމި، ރައްޔިތުންނަށް ހިތްގައިމު މަންޒަރުތަކެއް ފެނިގެންދާނެ އަހަރަކަށެވެ. އެގޮތުން ހުޅުލޭ ކޮޅުންނާއި އަދި މާލޭ ކޮޅުގެވެސް ހައްދަވާ އެޕްރޯޗް ބްރިޖްގެ ވަރަށް ބޮޑުބައެއްވެސް 2017 ވަނަ އަހަރުގެ ތެރޭގައި ނިމިގެންދާނެކަން އެމަނިކުފާނު ފާހަގަކުރެއްވިއެވެ.

" ވަރަށް ބޮޑު އެޖީވްމަންޓެއް އެއީ. އަދި އެޕްރޯޗް ބްރިޖްގެ ހުޅުލޭ ކޮޅުންނާއި، އަދި މާލޭ ކޮޅުގެވެސް އެޕްރޯޗް ބްރިޖްގެ ވަރަށް ބޮޑުބައެއް ނިމިފައި އޮންނާނީ. ދެން އޮންނާނީ ބްރިޖްގެ ފައިނަލް ޑިޒައިންގައި ފެނިގެންދާހެން ވީ-ޕިއަރގޮތަށް ހުންނަ ވީތައް ކޮންކްރީޓް ކުރުމުގެ މަސައްކަތް. އެހެންވީމަ މި މަސައްކަތުގައި ވަރަށް ބޮޑު ކުރިންއެރުންތަކެއް 2017 ވަނަ އަހަރު ފެނިގެންދާނެ" މިނިސްޓަރ ވިދާޅުވިއެވެ. 

ބްރިޖްގެ މަސައްކަތުގެ ސްޕީޑް އަވަސްކުރެއްވުމުގެ ގޮތުން ބްރިޖްގެ ސްޕަރސްޓްރަކްޗަރ ޗައިނާގައި ހައްދަވައިގެން ރާއްޖެ ގެންނަވާގޮތަށް ސަރުކާރުން ވަނީ ނިންމަވާފައެވެ.