މާލޭ ސިޓީ ރީ-ޑިވެލޮޕްކުރެއްވުމުގެ ޕްލޭންގެ ދަށުން މިވަގުތު ސަރުކާރުން ކުރައްވަމުންދާ އެންމެ ބޮޑު އެއް މަސައްކަތަކީ މާލޭގެ މަގުތައް ރަނގަޅު ފެންވަރަކަށް ތަރައްޤީކުރެއްވުމުގެ މަސައްކަތެވެ. ހައުސިންގ މިނިސްޓްރީން ޚާއްޞަ ޓައިމްލައިނެއް ކަނޑައަޅުއްވައިގެން ކުރިއަށް ގެންދަވާ މި މަޝްރޫޢުގެ ދަށުން، މަޖީދީމަގު މަރަމާތުކުރެއްވުމުގެ މަސައްކަތް ފަށްޓަވާފައިވާއިރު، މަޖީދީމަގުގެ ފުރަތަމަ ސެގްމަންޓާއި، ދެވަނަ ސެގްމަންޓްގެ މަސައްކަތް މިހާރު ވަނީ އެއްކޮށް ނިންމަވާފައެވެ. އަދި މިއަދު ތިންވަނަ ސެގްމަންޓްގެ މަސައްކަތް ފެއްޓެވުމަށް ހަމަޖެހިފައިވާކަމަށް ހައުސިންގ މިނިސްޓްރީން ހާމަކުރައްވައެވެ. ތިންވަނަ ސެގްމަންޓްގެ ދަށުން، މަޖީދީމަގާއި އަޅިވިލާމަގު ގުޅޭ ސަރަޙައްދުން ފެށިގެންގޮސް މާވެޔޮމަގާ ހަމައަށް މަގު ހެދުމުގެ މަސައްކަތް ކުރިއަށްދާނެއެވެ.
މާލޭ ސިޓީ ރީ-ޑިވެލޮޕްކުރެއްވުމުގެ ޕްލޭންގެ ދަށުން މާލޭގެ ހުރިހާ ބޮޑެތި މަގުތަކެއް ރަނގަޅު ފެންވަރަކަށް ތަރައްޤީކުރެއްވުމުގެ މަސައްކަތް ހައުސިންގ މިނިސްޓްރީން ފައްޓަވާފައިވަނީ މިދިޔަ އޮކްޓޯބަރު މަހުގެ އެއްވަނަ ދުވަހުއެވެ. މި މަޝްރޫޢުގެ ދަށުން، މާލޭގެ 13 މަގެއް ތަރައްޤީކުރެއްވުމަށް ވަނީ ހަމަޖެހިފައެވެ. ހައުސިންގ މިނިސްޓްރީން އެންމެ ފުރަތަމަ ފައްޓަވާފައިވަނީ މަޖީދީމަގު ތަރައްޤީކުރެއްވުމުގެ މަސައްކަތެވެ.
img:http://s4.psmnews.mv/images/660x400/14789540922933.jpg|މާލޭ މަގުތައް ރަނގަޅު ފެންވަރަކަށް ހެދުމުގެ މަޝްރޫޢުގެ ތެރެއިން މަޖީދީ މަގުގެ މަސައްކަތް ހިނގަމުންދާގޮތް - ފޮޓޯ: ޕީއެސްއެމް / ޙުސައިން ސަޢީދު
މާލޭ ސިޓީގެ މަގު ހެދުމުގެ މަޝްރޫޢާއި ގުޅޭ އެންމެފަހުގެ މަޢުލޫމާތު މީޑިއާއާއި ހިއްސާކުރައްވަމުން ހައުސިންގ މިނިސްޓްރީގެ ޑެޕިއުޓީ މިނިސްޓަރ ޢަބްދުﷲ މުއްތަލިބު ވިދާޅުވީ، ދެވަނަ ސެގްމަންޓާއި ތިންވަނަ ސެގްމަންޓް ގުޅޭ ސަރަޙައްދުގައި ނަރުދަމާ ހޮޅިއެއް އެޅުމަށް ހަމަޖެހިފައިވާކަމަށެވެ. އަދި އެއީ ގްރެވިޓީ ހޮޅިއަކަށްވާތީ، އެ މަސައްކަތް ކުރެއްވުމުގައި ވަގުތު ނަގާނެކަން މުއްތަލިބު ފާހަގަކުރެއްވިއެވެ.
"ސެގްމަންޓް 2 އަދި ސެގްމަންޓް 3 ގައި އެބަ އެޅޭ ނަރުދަމާ ހޮޅިއެއް. އެއީ ގްރެވިޓީ ލައިނަކަށްވާތީ ވަކިގޮތަކަށް އެޅިގެންދާނީ. ފާހަގަކޮށްލަން ބޭނުން ފެން ހޮޅިއަކާއި، ނަރުދަމާ ހޮޅިއެއްގެ އިތުރުން ވޯޓަރ ހައިޑްރެންޓް ހޮޅި މި ދެ ސެގްމަންޓްގައި އެބައެޅޭ. އެހެންވީމަ ސެގްމަންޓް 3 ގެ ތެރެއަށްވެސް މިދެންނެވި ނަރުދަމާ ހޮޅިއާއި ފެންވަރު ވަދެގެންދާނެ. އެހެންވީމަ އެ މަސައްކަތް ތަންކޮޅެއް ކޮޕްލިކޭޓްވެ، އުނދަގޫވެގެންދަނީ" މުއްތަލިބު ވިދާޅުވިއެވެ.
މުއްތަލިބު ވިދާޅުވީ، މަޖީދީމަގުގެ ތިން ވަނަ ސެގްމަންޓްގެ ދަށުން 240 މީޓަރުގެ ސަރަޙައްދެއް ރަނގަޅު ފެންވަރަކަށް ތަރައްޤީކުރެއްވިގެންދާނެކަމަށެވެ. އަދި އަމާޒަކީ ތިން ވަނަ ސެގްމަންޓްގެ މަސައްކަތް ގާތްގަނޑަކަށް 30 ދުވަހުގެ ތެރޭގައި ނިންމެވުންކަމަށެވެ.
img:http://s3.psmnews.mv/images/660x400/14799641179771.jpg|ހައުސިންގ މިނިސްޓްރީގެ ޑެޕިއުޓީ މިނިސްޓަރ ޢަބްދުﷲ މުއްތަލިބު މީޑިއާއަށް މަޢުލޫމާތުދެއްވަނީ / ފޮޓޯ: ޕީއެސްއެމް
"މިފަހަރު މަޖީދީމަގު ލަގްޒަރީ ފިހާރައާއި ހަމައަށް 240 މީޓަރުގެ މަސައްކަތް ކުރެވިގެންދާނެ. އަޅުގަނޑުމެން ރާވާފައިމިވަނީ 30 ދުވަހުގެ ތެރޭގައި މި މަސައްކަތް ނިންމުމަށް. މި ސެގްމެންޓްގެ މަސައްކަތް ކޮމްޕްލިކޭޓްވެގެންދާ ސަބަބަކީ އެމް.ޑަބްލިޔު.އެސް.ސީގެ ފެން ހޮޅިއެއް އެމީހުންގެ މައި ސިސްޓަމާ ގުޅުވާލުމުގެ މަސައްކަތްވެސް މި ސެގްމަންޓްގެ ތެރެއިން ކުރެވިގެންދާނެތީ" މުއްތަލިބު ވިދާޅުވިއެވެ.
މި މަޝްރޫޢުގެ ދަށުން މާލޭގެ މަގުތަކަށް ގެންނަވާ ބަދަލުތައް އާއްމުން ބަލައިގެންފައިވާކަން ފާހަގަކުރައްވަމުން މުއްތަލިބު ވިދާޅުވީ، މާލޭގެ މަގުތަކަށް ގެނެވޭ ބަދަލުތަކާއެކު، މަގުތައް އެއްވަރު ނުވުމާއި، މަގުތަކުގައި ފެންބޮޑުވާ މައްސަލައަށް ބޮޑު ހައްލެއް ލިބިގެންދާނެކަމަށެވެ. އަދި ޚާއްސަ އެހީއަށް ބޭނުންވާ ފަރާތްތަކަށް ފަސޭހަކަމާއެކު ބޭނުންކުރެވޭނެހެން ޕޭވްމަންޓްތަކަށް ގެނެވުނު ބަދަލުތައް މުއްތަލިބު ފާހަގަކުރެއްވިއެވެ.
"ޕޭވްމަންޓަށް މިގެނެވުނު ބަދަލުތަކާއި، ޚާއްސަކޮށް މިހާރު މަގު ހެދިގެންދާއިރު ޙާއްސަ އެހީއަށް ބޭނުންވާ ފަރާތްތަކަށް ފަސޭހައިން ބޭނުންކުރެވޭނެހެން ރޭމްޕެއްލާފައި ހެދިގެންދާތީ، އާއްމުންނަށް މިކަންކަން ވަރަށް ބޮޑަށް ބަލައިގެންފައި މިވަނީ. ހަމައެހެންމެ މަޖީދީމަގުގެ ހުޅަނގުފަރާތަކީ ވަރަށް ބޮޑަށް ފެން ބޮޑުވާ ސަރަޙައްދެއް. ނަމަވެސް މިކަމަށްވެސް މިހާރު މިވަނީ ހައްލެއް ގެނެވިފައި" މުއްތަލިބު ވިދާޅުވިއެވެ.
img:http://s2.psmnews.mv/images/660x400/14789531187420.jpg|މާލޭ މަގުތައް ރަނގަޅު ފެންވަރަކަށް ހެދުމުގެ މަޝްރޫޢުގެ ތެރެއިން މަޖީދީ މަގުގެ މަސައްކަތް ހިނގަމުންދާގޮތް - ފޮޓޯ: ޕީއެސްއެމް / ޙުސައިން ސަޢީދު
މާލޭ ސިޓީގެ މަގުތައް ރަނގަޅު ފެންވަރަކަށް ތަރައްޤީކުރެއްވުމަށް ސަރުކާރުން ހިންގަވާ މަޝްރޫޢުގެ ދަށުން، މާލޭގެ މަގުތަކުގައި ޑްރެއިނޭޖް ސިސްޓަމް ޤާއިމުކުރެއްވުމަށް ވަނީ ހަމަޖެހިފައެވެ. އަދި މިހާރު ހުރި ކާނުތަކުގެ ސައިޒް ދެގުނައަށް ބޮޑުކުރައްވާ ކާނުތަކަށް އެޅޭފެން ވަކި ދިމާއަކުން މޫދަށް ބޭރުވާ ނިޒާމެއް ޤާއިމު ކުރެވޭނެއެވެ. މީގެއިތުރުން ދުވާރާއި، މަގުތަކުގައި އަތުރާފައިވާ ގާތައް އާކޮށް، ޚާއްޞަ އެހީއަށް ބޭނުންވާ ފަރާތްތަކަށް ފަސޭހައިން ބޭނުންކުރެވޭގޮތަށް ދުވާރުތައް ބަދަލުކުރައްވާނެއެވެ. މި މަޝްރޫޢުގައި ހިމެނޭ 13 މަގުގެ މަސައްކަތް މުޅިން ނިންމަވާލެއްވުމަށް ސަރުކާރުން ކަނޑައަޅުއްވާފައިވާ ތާރީޚަކީ 9 ސެޕްޓެމްބަރު 2018އެވެ.