ދިވެހިރާއްޖޭގެ ޝަރުޢީ ނިޒާމުގައި އިންވެސްޓަރުންނަށް ފަހި މާޙައުލެއް ތަނަވަސްކޮށްދެއްވުމަށް މަރޗެންޓައިލް އެންޑް އެޑްމިރާލްޓީ ޑިވިޜަނެއް ސިވިލް ކޯޓްގައި ޤާއިމުކުރެއްވުމަށް ނިންމަވައިފިއެވެ.
ޝަރުޢީ ދާއިރާއިން 2017 ވަނަ އަހަރު ކުރެއްވުމަށް އަމާޒުކުރައްވާފައިވާ ކަންތައްތަކުގެ ތެރޭގައި ވިޔަފާރިތަކަށާއި އިންވެސްޓަރުންނަށް ފަހި މާޙައުލެއް ޝަރުޢީ ނިޒާމުގެ ތެރޭގައި ތަނަވަސްކޮށްދެއްވުމަށް ވަނީ ކަނޑައަޅުއްވާފައެވެ. ސިވިލްކޯޓްގައި އަލަށް ޤާއިމުކުރެއްވުމަށް ކަނޑައަޅުއްވާފައިވާ މާރޗެންޓައިލް އެންޑް އެޑްމިރާލްޓީ ޑިވިޜަންގެ ސަބަބުން، ތަނަވަސްވެ ފުޅާވަމުންދާ ދިވެހިރާއްޖޭގެ ވިޔަފާރިއާއި އިޤްތިޞާދީ ދާއިރާއާ ރައްޓެހި، އެކަންކަމާ ގުޅުންހުރި މައްސަލަތައް ބެލުމުގެ ފުރިހަމަ ޤާބިލުކަން ލިބިފައިވާ ޝަރުޢީ ނިޒާމަކަށް ދިވެހިރާއްޖޭގެ ޝަރުޢީ ދާއިރާ ވެގެންދާނެއެވެ.
ވިޔަފާރިތަކުގެ މެދުގައި ދިމާވާ މަދަނީ މައްސަލަތަކާއި އިޤްތިޞާދީ އެކިއެކި މައްސަލަތައް ދިވެހިރާއްޖޭގެ ޝަރުޢީ ދާއިރާގެ ތެރެއިން މިހާރުވެސް ބެލެވޭނެ އިންތިޒާމް ވަނީ ހަމަޖައްސަވާފައެވެ. ސިވިލް ކޯޓުގައި އަލަށް ޤާއިމުކުރެވޭ ޑިވިޜަންއަކީ މިމަސައްކަތްތަކަށް ލިބިގެންދާ އިތުރު ކާމިޔާބީއެއްކަމަށް ޖުޑީޝަރީން މަޢުލޫމާތުދެއްވައެވެ. މި ރޮނގުން ރާއްޖެއަށް ބޭނުންވާނެ ފަންނީ އެހީތެރިކަން، ސިންގަޕޫރުގެ ޝަރުޢީ ދާޢިރާއިން ދެއްވާނެކަމުގެ ޔަޤީންކަން ދެއްވާފައިވާކަމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުން ވިދާޅުވެއެވެ.
މިމަސައްކަތް ވެގެންދާނީ ދިވެހިރާއްޖޭގެ މަދަނީ ޢަދުލުގެ ނިޒާމު އިޞްލާޙްކޮށް ހަރުދަނާކުރެއްވުމަށް ޝަރުޢީ ދާއިރާއިން ކުރައްވާ މަސައްކަތަށް ލިބިގެންދާނެ ބޮޑު ކާމިޔާބީއަކަށް ކަމަށް ޝަރުޢީ ދާއިރާއިން ވިދާޅުވެއެވެ.