ދިވެހިރާއްޖޭގެ ކަނޑުގެ ސަރަހައްދުގެ ސަލާމަތާއި ރައްކާތެރިކަމާ ގުޅުންހުރި ކަންކަމުގައި ބޭނުންކުރެއްވުމަށް ކަނޑުގެ އަސްކަރިއްޔާގެ މުޅިން އާ ދެ އުޅަނދު އެމް.އެން.ޑީ.އެފުން ރާއްޖެ ގެންނަވައިފިއެވެ.
ސްރީލަންކާގެ ކުންފުންޏަކާ ޙަވާލުކުރައްވައިގެން ބަނދެފައިވާ މި ދެއުޅަނދަކީ އިންސްޕެކްޓަރ ކްރާފްޓްގެ ދެ އުޅަނދުކަމަށް އެމް.އެން.ޑީ.އެފުން މައުލޫމާތުދެއްވައެވެ. އަދި މި އުޅަނދުތައް ފަރުމާ ކޮށްފައިވަނީ ކަނޑުމަތީގެ ޚާއްޞަ އޮޕަރޭޝަންތަކާއި ރެސްކިޔު އޮޕަރޭޝަންތަކުގައި ބޭނުންކުރެވޭގޮތަށް ކަމަށް އެމް.އެން.ޑީ.އެފުން މައުލޫމާތުދެއްވައެވެ. ޑިފެންސް މިނިސްޓްރީއާއި ސްރީލަންކާގެ ސޯލާސް މެރިން ލަންކާ ޕްރައިވެޓް ލިމިޓެޑާއެކު ވެފައިވާ އެއްބަސްވުމެއްގެ ދަށުން މިފަދަ އިތުރު 3 އުޅަނދު ބަނުމަށް ހަމަޖެހިފައިވެއެވެ. މި ތިން އުޅަނދުވެސް މިއަހަރު ނިމުމުގެ ކުރިން ކަނޑުގެ އަސްކަރިއްޔާގައި ބޭނުންކުރަން ފެއްޓެވޭވަރު ވާނެމަށް އެމް.އެން.ޑީ.އެފުން މައުލޫމާތުދެއްވާ. ދިވެހިރާއްޖޭގެ ކަނޑުގެ ސަރަހައްދުގެ ސަލާމަތާ ރައްކާތެރިކަން ކަށަވަރު ކުރެއްވުމަކީ ސިފައިންގެ ވާޖިބެއްކަމުން، ކަނޑުގެ އަސްކަރިއްޔާ އިތުރަށް ވަރުގަދަ ކުރެއްވުމަށް ޚާއްޞަ އިސްކަމެއް ދެއްވަމުން ގެންދަވާކަމަށް ޑިފެންސް މިނިސްޓަރ ވަނީ ވިދާޅުވެފައެވެ.