އެމްޑީޕީގެ ރައީސްގެ މަޤާމު އުވާލައި، އެންމެ އިސް މަޤާމަކަށް ޗެއާޕާރސަން!

ދިވެހި ރައްޔިތުންގެ ޑިމޮކްރެޓިކް ޕާޓީ، އެމްޑީޕީއިން އެޕާޓީގެ އަސާސީ ޤަވާއިދަށް ގެންނަ އިސްލާޙުތައް ފާސްކޮށްފިއެވެ.

މިހާރު ކުރިއަށްދާ ކޮންގްރެސްގައި، މިއަދު ހަވީރު ބޭއްވި ސެޝަންގައި އެ ޕާޓީގެ އަސާސީ ޤަވާއިދަށް ހުށަހެޅި ހުރިހާ އިސްލާހަކަށް ވޯޓަށް އަހާފައިވެއެވެ. އޭގެ ތެރެއިން ފާސްވެފައިވާ އިސްލާޙުތައް ފާސްވީ 500އަށް ވުރެ ގިނަ މެމްބަރުންގެ ވޯޓާއެކުގައެވެ.

އެމްޑީޕީގެ އަސާސީ ޤަވާއިދަށް ގެނައި މުހިންމު އިސްލާޙުތަކުގެ ތެރޭގައި ޕާޓީގެ ރައީސްގެ މަޤާމު އުވާލައި ޗެއާޕަސަންއަކީ އެންމެ އިސް މަޤާމަށް ހެދުން ހިމެނެއެވެ. އަދި ޕާޓީގެ ނައިބު ރައީސުންގެ އަދަދު ތިނަކަށް އިތުރުކުރުމާއި، އޭގެ ތެރެއިން އެކަކީ އަންހެން މެންބަރަކަށް ހެދުމަށް އަސާސީ ޤަވާއިދަށް އިސްލާޙު ގެނެސްފައިވެއެވެ.

ޕާޓީގެ މެންބަރަކު ރައީސުލްޖުމްހޫރިއްޔާގެ މަޤާމަށް ހޮވިއްޖެނަމަ ސިޔާސަތުތައް ކަނޑައަޅާއިރު ޤައުމީ މަޖިލީހުގެ މަޝްވަރާ ހޯދުން ލާޒިމްކުރުމާއި، ރައީސުލްޖުމްހޫރިއްޔާގެ ޚާއްސަ މުޝީރަކަށް ޗެއާޕާސަން އައްޔަން ކުރުމަށްވެސް އަސާސީ ޤަވާއިދަށް ގެނައި އިސްލާޙުތަކުގައި ހިމަނާފައިވެެއެވެ.

އެމްޑީޕީގެ އަސާސީ ޤަވާއިދަށް ހުށަހެޅި އިތުރު އިސްލާޙުތަކުގެ ތެރޭގައި ޕްރައިމަރީގައި ވޯޓު ލެވޭނީ ޕާޓީގެ މެންބަރުންގެ ދަފްތަރުގައި ހިމެނި ތިން މަސްދުވަސް ހަމަވުމުންކަމަށް ކަނޑައެޅުން ހިމެނެއެވެ.

އަލަށް ގެނައި އިސްލާޙުތަކާއެކު އަސާސީ ޤަވާއިދު ފާސްކުރުމަށް ވޯޓުނެގުން މިރޭ އޮންނަ ކޮންގްރެސްގެ ނިންމުމުގެ ޖަލްސާގައި ކުރިއަށްދާނެއެވެ.