މިދިޔަ މަހު ރާއްޖެއަށް 150،000އަށްވުރެ ގިނަ ފަތުރުވެރިން

މިދިޔަ މަހު 150،000އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާ ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ.

ރާއްޖެއަށް ޒިޔާރަތްކުރާ ފަތުރުވެރިންގެ އަދަދު މިހާރު އަންނަނީ އިތުރުވަމުންނެވެ. އަދި ކުރިއަށްއޮތް ހައި ސީޒަންގައި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވަމުން އަންނާނެ ކަމަށް ސަރުކާރާއި، ދާއިރާގެ ހިއްސާދާރުން ފާހަގަކުރެއެވެ.

ފަތުރުވެރިކަމާ ބެހޭ ވުޒާރާއިން އެންމެ ފަހުން އާންމުކުރި ތަފާސްހިސާބުތަކަށް ބަލާއިރު، މިދިޔަ ސެޕްޓެންބަރު މަހު ރާއްޖެއަށް މުޅި ޖުމްލަ 150,764 ފަތުރުވެރިން ވަނީ ޒިޔާރަތްކޮށްފައެވެ. މިދިޔަ އަހަރުގެ ސެޕްޓެންބަރު މަހު ރާއްޖެއަށް ޒިޔާރަތްކޮށްފައިވަނީ 151,114 ފަތުރުވެރިންނެވެ. އެހެންކަމުން މިއީ 0.2 އިންސައްތަ ދަށް އަދަދެކެވެ.

މިދިޔަ މަހު އެވްރެޖްކޮށް ދުވާލެއްގެ މައްޗަށް 5,872 ފަތުރުވެރިން ޒިޔާރާތްކުރިއެވެ. ތަފާސްހިސާބުތައް ދައްކާގޮތުން، މި މުއްދަތުގެ ތެރޭގައި އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ 26ވަނަ ދުވަހުއެވެ. އެދުވަހު އެކަނިވެސް ރާއްޖެއަށް 6,284 ފަތުުރުވެރިން ވަނީ ޒިޔާރަތްކޮށްފައެވެ.

މިއާއެެކު އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު މިވަނީ 1,603,021 އަށް އަރާފައެވެ. މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 1,659,031 ފަތުރުވެރިންނެވެ. އެހެންކަމުން މިއީ 3.4 އިންސައްތަ ދަށް އަދަދެކެވެ.

އެންމެ ގިނައިން ފަތުރުވެރިން ޒިޔާރަތްކުރި 5 ޤައުމު:

* ޗައިނާ: 300,977 ފަތުރުވެރިން
* ރަޝިއާ: 229,236 ފަތުރުވެރިން
* އިނގިރޭސިވިލާތް: 119,968 ފަތުރުވެރިން
* ޖަރުމަނުވިލާތް: 99,062 ފަތުރުވެރިން
* އިޓަލީވިލާތް: 98,039 ފަތުރުވެރިން

ތަފާސްހިސާބުތަކުން ދައްކާގޮތުގައި މިމުއްދަތުގައި ރާއްޖެ ޒިޔާރަތްކުރި ފަތުރުވެރިންގެ ތެރެއިން 1,158,404 ފަތުރުވެރިން ޗުއްޓީ ހޭދަކޮށްފައިވަނީ ރިސޯޓުތަކުގައެވެ. ގެސްޓްހައުސްތަކުގައި 345,220 ފަތުރުވެރިން ޗުއްޓީ ހޭދަކޮށްފައިވާއިރު، ހޮޓާތަކުގައި 36,106 ފަތުރުވެރިން އަދި ސަފާރީ އުޅަނދުތަކުގައި 29,679 ފަތުރުވެރިން ޗުއްޓީ ހޭދަކޮށްފައިވެއެވެ.

މިއަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެ އެތެރެވެފައިވަނީ ވައިގެ މަގުންނެވެ. އެގޮތުން 1,587,438 ފަތުރުވެރިން ވައިގެ މަގުން އެތެރެވެފައިވެއެވެ. މީގެ ތެރެއިން 1,569,214 ފަތުރުވެރިން އައީ ވެލާނާ އިންޓަރނޭޝަނަލް އެއަރޕޯޓުންނެވެ. މީގެ އިތުރުން ގަން އިންޓަރނޭޝަނަލް އެއަރޕޯޓުން 5,606 ފަތުރުވެރިން، މާފަރު އިންޓަރނޭޝަނަލް އެއަރޕޯޓުން 5,032 ފަތުރުވެރިން، ހަނިމާދޫ އިންޓަރނޭޝަނަލް އެއަރޕޯޓުން 3,331 ފަތުރުވެރިން، މާމިގިލީ އެއަރޕޯޓުން 2,971 ފަތުރުވެރިން އަދި ދާލު އެއަރޕޯޓުން 1,284 ފަތުރުވެރިން އެތެރެވިއެވެ.