އިންޑޮނޭޝިއާއިން ބަންގްލަދޭޝް ކޮޅަށް 9 ލަނޑު ޖަހައިފި

ފީފާ އާސިއާން ކަަޕުގެ ގްރޫޕް ސްޓޭޖުގައި ބަންގްލަދޭޝް އިން ކުޅުނު ތިންވަނަ މެޗުގައި އިންޑޮނީޝިއާ އަތުން ވެސް ބަލިވެ، މުބާރާތުން ކަޓައިފިއެވެ.

ޖަކާޓާގައި ކުޅުނު މި މެޗުން ބަންގްލަދޭޝް ބަލިވީ 2-9ގެ ނަތީޖާއަކުންނެވެ.

އިންޑޮނީޝިއާ ދަރިފަސްކޮޅުގެ އެހެން ޤައުމުތަކުގައި އުޅެ ބޮޑުވި އަދި ފުޓުބޯޅަ ކުޅޭ ކުޅުންތެރިން ހިމަނައިގެން އެކުލަވާލާފައިވާ ޤައުމީ ޓީމަކާއެކު ނުކުމެ މި މެޗުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ އެ ގައުމުންނެވެ.

މެޗުގައި އިންޑޮނީޝިއާއިން ކާމިޔާބުކުރި 9 ލަނޑުގެ ތެރެއިން ފަސް ލަނޑު އެޓީމަށް ކާމިޔާބުކޮށްދިނީ މިޗެލް ބޭކާއެވެ. މިޗެލް އަކީ އޮސްޓްރޭލިއާއަށް އުފަން، އެމެރިކާގައި ފުޓުބޯޅަ ކުޅޭ ކުޅުންތެރިއެކެވެ. އިންޑޮނީޝިއާގެ ބާކީ ލަނޑުތައް ޖަހައިދިނީ ރިޒްކީ ރިދޯ އާއި ޖަސްޓިން ހަބްނާގެ އިތުރުން ލޫކް ވިކެރީ އަދި ކެވިން ޑިކްސްއެވެ.

މެޗުގައި ބަންގްލަދޭޝް އިންވެސް ދެލަނޑު ޖެހިއިރު އެޓީމުގެ ލަނޑުތައް ޖަހައިދިނީ ޝަހްރިއާރް އިމޮން އާއި ފަރްހާން ޢަލީ ވާހިދެވެ. މި މެޗުގައި ބަންގްލަދޭޝްއަށް ނިސްބަތްވާ، އިނގިރޭސި ޕްރިމިއަރ ލީގުގައި ކުޅެފައިވާ ހަމްޒާ ޗޯދުރީ ވެސް ކުޅެފައިވެއެވެ.

އިންޑޮނީޝިއާ އާއި ދެކޮޅަށް ކުޅެ 2-9 ގެ ފަރަގު ބޮޑު ނަތީޖާއަކުން ބަންގްލަދޭޝް ބަލިވިއިރު، މިއީ ފާއިތުވީ ތިން އަހަރުގެ ތެރޭގައި ބަންގްލަދޭޝްއަށް ފުޓުބޯޅައިގައި ކުރިމަތިވި އެންމެ ބޮޑު ނާކާމިޔާބީއެވެ. ބަންގްލަދޭޝް ވަނީ މީގެ 3 އަހަރުކުރިން ވޯލްޑް ކަޕް ކޮލިފައިންގައި އޮސްޓްރޭލިއާ އަތުން 0-7 އިން ބަލިވެފައެވެ.

ފުޓުބޯޅައިގައި ބަންގްލަދޭޝް އެންމެ ބޮޑު ފަރަގަކުން ބަލިވީ އީރާން އަތުން 1982 ވަނަ އަހަރާއި ސައުތު ކޮރެއާ އަތުން 1979 ވަނަ އަހަރެވެ. އެ ދެ މެޗުން ވެސް ބަންގްލަދޭޝް ބަލިވީ 0-9 ގެ ނަތީޖާއަކުންނެވެ. އަދި 1993 ވަނަ އަހަރު ޖަޕާން އަތުން 0-8 އިން ބަންގްލްދޭޝް ބަލިވެފައިވެއެވެ.

ބަންގްލަދޭޝް އަތުން ހޯދި މޮޅާއެކު އިންޑޮނީޝިއާ އިން ވަނީ ފީފާ އާސިއާން ކަޕުގެ ފައިނަލަށް ދަތުރުކޮށްފައެވެ. ފައިނަލްގައި އިންޑޮނީޝިއާ ކުޅެން ޖެހޭނީ ތައިލެންޑާ ދެކޮޅަށެވެ.

މި މުބާރާތުގައި ބަންގްލަދޭޝް އިން ކުޅުނު ތިން މެޗުން ވެސް ވަނީ ބަލިވެފައެވެ. މުބާރާތުގައި ބަންގްލަދޭޝާއި އިންޑޮނީޝިއާ އާއިއެކު ދެން ގުރޫޕުގައި ހިމެނެނީ މެލޭޝިއާ އަދި ސިންގަޕޫރެވެ.

އާސިއާން ކަޕުން ބަންގްލަދޭޝްއަށް ފުރުސަތު ލިބުނީ އިންޑިއާ އިން އެފުރުސަތު ދޫކޮށްލުމުންނެވެ.

މުބާރާތުގައި ކުޅޭ ކޮންމެ ގައުމަކަށް، 125،000 ޑޮލަރުގެ ބޯނަހެއް ދޭން ވަނީ ނިންމައިފަ އެވެ. އާސިއާން ކަޕްގެ ގުރުއަތުލުން ބޭއްވިއިރު އިންޑިއާ ހިމެނުނީ، ޕްްރިމިއާ ޑިވިޝަނުގަ އެވެ. ޗެމްޕިއަނުންނަށް އެއް މިލިއަން ޑޮލަރު ދޭ މި ޑިވިޝަނުގައި އިންޑިއާ ހިމެނެނީ، ގްރޫޕް އޭގައެވެ.

އިންޑިއާ އިން އާސިއާ ކަޕުން ވަަކިވި މައިގަނޑު ސަބަބަކީ، އޮކްޓޫބަރު ތިން ވަނަ ދުވަހު އެ ގައުމުގައި ބްރެޒިލްއާ ދެކޮޅަށް ކުޅެން އޮތް މެޗަށް ތައްޔާރުވުމަށެވެ.

އާސިއާން ކަޕުން އިންޑިއާ ވަކިވުމުން، ފީފާ އިން އެ ޖާގަ މި ފަހަރު، އެމެރިކާ، މެކްސިކޯ އަދި ކެނަޑާގައި ބޭއްވި ފީފާ ވޯލްޑް ކަޕްގައި ކުޅުނު ޓީމެއް ގެންނަން މަޝްވަރާ ކުރިއެވެ. އެހެން ނަމަވެސް، އެ ޖާގަ ލިބޭތޯ، ބަންގްލަދޭޝް ފުޓްބޯލް ފެޑެރޭޝަން (ބީއެފްއެފް) އިން ކުރި މަސައްކަތް ކާމިޔާބުކުރީއެވެ.