ދުވަސްވީ މީހުންގެ ނަފްސާނީ ދުޅަހެޔޮކަމަށް ގުޅިގެން މަސައްކަތްކުރަންޖެހޭ

މިއަދަކީ ބައިނަލްއަޤްވާމީގޮތުން ފާހަގަކުރާ އުމުރުން ދުވަސްވީ މީހުންގެ ދުވަހެވެ.

ދިވެހިރާއްޖޭގެ އާބާދީގެ 8 އިންސައްތަ މީހުންނަކީ އުމުރުން ދުވަސްވީ މީހުންނެވެ. 2050ވަނަ އަހަރަށް ދާއިރު އެއަދަދު 20،000އިން 1 ލައްކައަށް އުފުލޭނެކަމަށް ވިހާ މަރުވާ ނިސްބަތަށް ބަލާއިރު ފާހަގަވެއެވެ.

އުމުރުން ދުވަސްވީ މީހުންގެ ދުވަސް ބައިނަލްއަޤްވާމީ ގޮތުން ފާހަގަކުރަނީ، މުޖުތަމަޢު ބިނާކުރުމަށް އެމީހުން ކޮށްދީފައިވާ ޚިދުމަތްތައް ފާހަގަކުރުމާއި އެކަން ލޯތްބާއެކު ބަލައިގަންނަކަން ހާމަކޮށްދިނުމަށެވެ. އަދި އުމުރުން ދުވަސްވީ މީހުންގެ ޙައްގުތައް ރައްކާތެރިކުރުމާއި، އަޅާލުމާއި، އޯގާތެރިކަމާއި، ނަފްސާނީ ދުޅަހެޔޮކަމުން ރައްކާތެރިކަން ލިބިފައިވާ ބައެއްކަން ކަށަވަރުކުރުމަށް ބާރުއެޅުމަށެވެ.

ކޮންމެ މަންމައެއް ބައްޕައެއް، މާމައެއް ކާފައެއް، ނުވަތަ އެނޫންވެސް އުމުރުން ދުވަސްވީ ކޮންމެ މީހަކީވެސް އަބުރުވެރި ދިރިއުޅުމެއް އުޅުމުގެ ޙައްގު ލިބިފައިވާ މީހެކެވެ.

އެންމެ ތުއްތުއިރުން ފެށިގެން ދަރިން ބަލައި ބޮޑުކުރި ފަދައިން، އެ މައިންބަފައިން އުމުރުން ދުވަސްވެ ގައިބާރު ދެރަވާހިނދު، އެމީހުންގެ އެންމެ ގާތުގައި އަބަދުވެސްވާ ބަޔަކަށް ދަރިން ވުމުގެ ޢަޒުމު ކަނޑައަޅަންޖެހެއެވެ. ދިރުއުޅުމުގެ އިންތިޒާމުތަކާއި މާލީ އެހީތެރިކަން ފޯރުކޮށްދިނުމާއި އަދި މައިންބަފައިންނަކީ ނަފްސާނީ ދުޅަހެޔޮކަމުގައިވާ ބައެއްކަމުގައި ކަށަވަރުކުރުމަކީ ދަރިންނާ އާއިލާގެ އެންމެ ބޮޑު ޒިންމާއެވެ.

"އެންމެ އުފާވަނީ ދަރިން ގުޅާލައި ހާލުބަލައި، ޗުއްޓީ ދުވަސްވަރު ގޭގައި ހުރިހާ ދަރިން އެކުވެލާ އުޅޭތަން ފެނުނީމަ. މައިންބަފައިން މުސްކުޅިވީމަ ގޭގައި ބޭންދުމުގެ ބަދަލުގައި، އެމީހުންގެ ހާލު ރަނގަޅަށް ބަލާ، އޯގާތެރިވާންޖެހޭ. ބާރަށް ބަސް ބުނެގެން ނުވާނެ. ނަފްސާނީ ދުޅަހެޔޮކަމަށް އެމީހުންނާއެކު ގިނަ ވަގުތު ހޭދަކުރަންޖެހޭ." އުމުރުން ދުވަސްވީ މީހުން ފާހަގަކުރެއެވެ.

އުމުރުން ދުވަސްވީ މީހުންނާއި ގުޅިގެން ހުށައަޅާ މައްސަލަތަކުގެ ތެރޭގައި، ޖިސްމާނީ އަދި ނަފްސާނީ އަނިޔާގެ މައްސަލަތައް ހިމެނެއެވެ. އަދި މާލީ ދަތިކުރުންތަކާއި، ބާރަށް ބަސްބުނުންފަދަ، ނޭގި ދެވޭ އަނިޔާވެސް ހިމެނެއެވެ. އެކަމުގައި ނަފްސާނީ އުނދަގޫތައް ތަޙައްމަލުކުރަންޖެހެއެވެ.

ރާއްޖޭގައި އުމުރުން ދުވަސްވީ މީހުންނަށް ރައްކާތެރިކަން ފޯރުކޮށްދިނުމަށް ތަފާތު ސިޔާސަތުތައް ވަނީ ކަނޑައަޅާފައެވެ. އަދި އުމުރުން ދުވަސްވީ އާބާދީއަކާ ދިމާލަށް ރާއްޖެ މިސްރާބުޖަހާފައިވާއިރު، މިމަގުން ކުރެވޭ މަސައްކަތްތައް އިތުރުކުރުމުގެ ސިޔާސަތުތައް ދަނީ އެކަށައަޅަމުންނެވެ.

އޭގެތެރޭގައި އުމުރުން ދުވަސްވީ މީހުންނަށް ސަރުކާރުން ދޭ އިނާޔަތް ފާހަގަކުރެއެވެ. އަދި އެމީހުންނަކީ މުޖުތަމަޢުގައި ޝާމިލު ބައެއްގެ ގޮތުގައި ހެދުމަށް، ނާދީތައް ހަދާ، އުމުރުން ދުވަސްވީ މީހުންނަށް ޚާއްސަކޮށް އެކި ޕްރޮގްރާމްތައް އަންނަނީ ހިންގަމުންނެވެ. އަދި އެކި ހާލަތްތަކާ ގުޅިގެން ދަޢުލަތުގެ ބެލުމުގެދަށަށް ގެންދާ މީހުންނަށް ރައްކާތެރިކަން ފޯރުކޮށްދިނުމަށް، އެކަމަށް ޚާއްސަ 3 މަރުކަޒު، ތަރައްޤީކުރުމުގެ މަސައްކަތްވެސް އަންނަނީ ކުރަމުންނެވެ.

ޞިއްޙަތާ ޢާއިލާއާއި އިޖުތިމާޢީ އެހީއާ ބެހޭ ވަޒީރު ޤީލާ އަލީ ވިދާޅުވީ، މިތަންތަން ހެދި ނަމަވެސް އެންމެ ބޮޑު އަމާޒަކަށްވާނީ ޢާއިލާގެ ބެލުމުގެ ދަށުގައި އެމީހުންނަށް އުޅެވޭނެ ގޮތެއް ހޯދައިދިނުމަށް ބޭނުންވާ އެހީތެރިކަންދިނުންކަމަށެވެ.

"އައްޑޫ، ތުލުސްދޫ އަދި ށ.ފުނަދޫގައި މި ސެންޓަރުތައް ދަނީ ހަދަމުން. ނަމަވެސް އެންމެ ބޮޑު އަމާޒަކީ އަބަދުވެސް، އެމީހުން އާއިލާތެރޭގައި ބައިތިއްބައިގެން، އާއިލާގެ އަޅާލުމާ ލޯތްބާއެކު އުޅެވޭނެ ގޮތް ފަހިކުރުން." ވަޒީރު ވިދާޅުވިއެވެ.

މިސެންޓަރު ތަކަކީ އުމުރުން ދުވަސްވީ މީހުން ސެންޓަރުގައި ބޭތިއްބުމާއި އަދި އެމީހުންނަށް ބޭނުންވާ ނަފްސާނީ އަދި އެހެނިހެން ފަރުވާވެސް އެތަނުން ލިބޭނެ ގޮތަށް ހަދާ ތަންތަނެވެ. މީގެއިތުރުން އިޖުތިމާޢީ އެކިއެކި ހަރަކާތްތަކާއެކު ވަށާޖެހޭ ނިޒާމެއް ޤާއިމުކުރާނެއެވެ.