ވިމެންސް ޗެމްޕިއަންސް ލީގުގައި ބާސާއިން ރޯމާކޮޅަށް 6 ލަނޑު

ޔުއޭފާ ވިމެންސް ޗެމްޕިއަންސް ލީގުގައި އެފްސީ ބާސެލޯނާ އާއި އޭއެސް ރޯމާ ބައްދަލުކުރި މެޗު ބާސާއިން ފަސޭހަ ކަމާއެކު ކާމިޔާބު ކޮށްފިއެވެ.

ރޯމާގެ ދަނޑުގައި ކުޅުނު މިމެޗު ބާސާއިން ކާމިޔާބު ކޮށްފައިވަނީ 6 ލަނޑު ސުން ލަނޑުގެ ތަފާތު ބޮޑު ނަތީޖާ އަކުންނެވެ. ބާސާގެ ފަރާތުން މޮޅު ކުޅުމެއް ފެނިގެންދިޔަ މިމެޗުގައި އެޓީމުން ކާމިޔާބު ކުރި ފުރަތަމަ ލަނޑު މެޗުގެ 19 ވަނަ މިނެޓުގައި ކާމިޔާބު ކޮށްދީފައިވަނީ ކެރޮލީން ގްރަހަމް ހެންސެންއެވެ. އަދި ފުރަތަމަ ހާފު ނިމުމުގެ ކުރިން ބާސާއިން ވަނީ އެޓީމުގެ ލީޑު ފުޅާކޮށްފައެވެ. ނަމަވެސް މިލަނޑަކީ މެޗުގެ 39 ވަނަ މިނެޓުގައި ރޯމާގެ ޝުކުރަތު އޮލަޑީޕޯ އަތުން ބައިކޮޅަށް ވަން ލަނޑެކެވެ. މިމެޗުގައި ބާސާގެ ތިންވަނަ ލަނޑު މެޗުގެ 53 ވަނަ މިނެޓުގައި ކްލައުޑިއާ ޕީނާ ކާމިޔާބު ކޮށްދިން އިރު ހަތަރު ވަނަ ލަނޑު މެޗުގެ 60 ވަނަ މިނެޓުގައި ކާމިޔާބު ކޮށްދީފައިވަނީ ފުރަތަމަ ލަނޑުވެސް ޖަހައިދިން ގްރަހަމް ހެންސެންއެވެ. އަދި ފަހު ދެ ލަނޑު މެޗުގެ 75 ވަނަ މިނެޓާއި 85 ވަނަ މިނެޓްގައި ކާމިޔާބު ކޮށްދިނީ ކްލައުޑިއާ ޕިނާ އާއި އޭވާ ޕަޔޯއެވެ. މިލަނޑާއެކު ޕަޔޯވެފައިވަނީ ވިމެންސް ޗެމްޕިއަންސް ލީގުގެ ގްރޫޕް ސްޓޭޖް އަދި މިހާރު ކުޅޭ ލީގު ފޭސްފައި މިހާތަނަށް އެންމެ ގިނަ ލަނޑު ޖެހި ކުޅުންތެރިޔާއަށް ވެގެން ގޮސްފައެވެ. އޭނާ ވަނީ މިހާތަނަށް ޗެމްޕިއަންސް ލީގުގެ ގްރޫޕް ސްޓޭޖާއި ލީގު ފޭސްގައި 18 ލަނޑު ކާމިޔާބު ކޮށްފައެވެ.

މިމުބާރާތުގައި ރޭ ކުޅުނު އެހެން ބައެއް މެޗުތަކަށް ބަލާލާއިރު ބަޔާން މިޔުނިކް އިން ވަނީ ބެންފީކާ އާއި ބައްދަލުކޮށް ރަށުން ބޭރުގައި 3 ލަނޑު ސުން ލަނޑުން ބަލިކޮށްފައެވެ. މިމެޗުގައި ބަޔާން އިން ކާމިޔާބު ކުރި ތިން ލަނޑުވެސް ޖަހާފައިވަނީ މެޗުގެ ފަހު 6 މިނެޓްގެ ތެރޭގައެވެ. މިގޮތުން ފުރަތަމަ ލަނޑު މެޗުގެ 74 ވަނަ މިނެޓުގައި ކްލާރާ ބާރލް ކާމިޔާބު ކޮށްދިން އިރު ދެވަނަ ލަނޑު މެޗުގެ 80 ވަނަ މިނެޓުގައި ކާމިޔާބު ކޮށްދިނީ ޕަރނީލް ހާޑަރއެވެ. އަދި ފަހު ލަނޑު މެޗުގެ 88 ވަނަ މިނެޓުގައި ކާމިޔާބު ކޮށްދިނީ ފްރަންޒިސްކާ ކެޓްއެވެ.

މިމުބާރާތުގައި ޔުވެންޓަސް އާއި ހާކެން ބައްދަލުކުރި މެޗު ޔުވެންޓަސް އިން ކާމިޔާބު ކޮށްފައިވަނީ ރަށުން ބޭރުގައި 3 ލަނޑު ސުން ލަނޑުންނެވެ. މިމެޗުގައި ޔޫވޭއިން ކާމިޔާބު ކުރި ތިން ލަނޑު ޖަހާފައިވަނީ މެޗުގެ ދެވަނަ ހާފުގައެވެ. މިގޮތުން ފުރަތަމަ ލަނޑު މެޗުގެ 57 ވަނަ މިނެޓުގައި ޓަޓިއާނާ ޕިންޓޯ ކާމިޔާބު ކޮށްފައިވާއިރު ދެވަނަ ލަނޑު މެޗުގެ 77 ވަނަ މިނެޓުގައި ޖަހައިދިނީ އެމާ ސްޓޮލެން ގޯޑޯއެވެ. އަދި ފަހު ލަނޑު މެޗުގެ 88 ވަަނަ މިނެޓުގައި ކާމިޔާބު ކޮށްދިނީ އަލްބާ ރެޑޮންޑޯއެވެ.

މީގެއިތުރުން އާސެނަލް ވިމެން އާއި ޕެރިސް އެފްސީ ބައްދަލުކުރި މެޗުގައި އާސެނަލް އިން ދެ ލަނޑު ޖަހާ ލީޑު ނަގާފައިވަނިކޮށް ޕެރިސްއިން ވަނީ ފަހަތުން އަރާ މެޗުގެ ނަތީޖާ ހަމަހަމަ ކޮށްފައެވެ. އަދި ލިއޯން އާއި ޗެލްސީ ވިމެން ބައްދަލުކުރި މެޗު ލިއޯންގެ ދަނޑުގައި ކުޅެ ނިމިފައިވަނީ އެއްވެސް ޓީމަށް ލަނޑެއް ނުޖެހި އެއްވަރު ވެގެންނެވެ.