އޮސްޓްރޭލިޔާ އަތުން ބްރެޒިލް 4-2އިން މޮޅުވި ނަމަވެސް އެކަށީގެންވާ ގޮތެއްގައި އިދިކޮޅު ޓީމުގެ މައްޗަށް ގަދަވެގަނެވުނީ ފަހުހާފުގައި ކަމަށް ކޯޗު ކާލޯ އަންޗެލޯޓީ ބުނެފިއެވެ.
ސިޑްނީގައި ކުޅުނު މެޗުގައި ބްރެޒިލް ލީޑު ނެގީ މެޗުގެ ތިން ވަނަ މިނިޓުގައި ވެންޑަސަން ޖެހި ގޯލުންނެވެ. ނަމަވެސް 45 ވަނަ މިނިޓުގައި ލިބުނު ޕެނަލްޓީ އަކުން ކެޕްޓަން ރަފީނިއާ 2-2އިން އެއްވަރު ކޮށްދިނުމުގެ ކުރިން އޮސްޓްރޭލިޔާއިން ލީޑު ހޯދިއެވެ. އެއީ 28 ވަނަ މިނިޓާއި 33 ވަނަ މިނިޓުގައި ޖެހި ލަނޑުތަކާއެކުގައެވެ.
ފަހުހާފަށް ބްރެޒިލް ނުކުތީ ރަފީނިއާގެ ބަދަލުގައި ރެއާލްގެ ޒުވާން ފޯވަޑް އެންޑްރކް ގޮވައިގެންނެވެ. ރަފީނިއާ ބަދަލު ކުރީ މަސްގަނޑަށް ހާނިއްކަ ވުމުންނެވެ. ފަހުހާފުގައި ބްރޫނޯ ގިމަރޭޒް އާއި ލިބުނު ޕެނަލްޓީ އަކުން ބްރެޒިލަށް ލަނޑު ޖަހައިދިނީ ވިނީޝިއުސް ޖޫނިއާއެވެ.
"ވިނީޝިއުސް ހުރީ ރަނގަޅު ފޯމެއްގައެއް ނޫން. އެކަމަކު ފަހުހާފުގައި އޭނާ ދެއްކި ކުޅުން ރަނގަޅު. އަހަރުމެން މި މެޗު ކާމިޔާބު ކުރުމަކީ ވަރަށް ބޮޑު ހިތްވަރެއް. ހަގީގަގަތުގައި މި މެޗުގައި ބްރެޒިލަށް ކުރި ލިބުނީ ފަހު ހާފުގައި. ފުރަތަމަ ހާފުގައި އެ މީހުން ވަރަށް ރަނގަޅަށް ކުޅުނު. ދެ ވަނަ ހާފުގައި އަހަރުމެން ދެއްކި ކުޅުމާމެދު އަހަރެން ހިތްހަމަ ޖެހޭ،" އަންޗެލޯޓީ ބުންޏެވެ.
އޭނާ ބުނީ މި މެޗުގައި ރަފީނިއާ ކެޕްޓަން ބޭންޑް އެޅީ ޓީމުގެ ވައިސް ކެޕްޓަނަކަށް ހަމަޖައްސާފައިވާތީ ކަމަށެވެ.
"އަހަރުމެންގެ ކެޕްޓަނަކީ މާކިއުނިއޯސް. އޭނާ ނެތްނަމަ ކެޕްޓަންކަން ކުރާނީ ރަފީނިއާ. އޭނާ ވަނީ މި މެޗުގައި ވެސް ރަނގަޅު ކުޅުމެއް ދައްކާފައި،" އަންޗެލޯޓީ ބުންޏެވެ.
މި މެޗަށް ފަހު އިންޓަނޭޝަނަލް ބްރޭކްގައި ބްރެޒިލް ދެން ނުކުންނާނީ އަންނަ މަހުގެ ތިނެއްގައި އިންޑިއާއާ ދެކޮޅަށެވެ. މިއީ އިންޑިއާގައި ދުނިޔޭގެ އެންމެ ކާމިޔާބު ގައުމު ކުޅޭ ފުރަތަމަ މެޗެވެ. މި މެޗަށް ބްރެޒިލްގެ އެންމެ ގަދަ ޓީމު އިންޑިއާ އަށް ގެންދަން ނިންމާފައިވަނީ ދެ ގައުމުގެ ފުޓްބޯޅަ ފެޑަރޭޝަނުގެ މާކެޓިން ޕްލޭނެއްގެ ތެރެއިންނެވެ.