ސެވަންޓީ ސިކްސަރސްގެ ސަޕޯޓަރުން ކުރިމަތީ ކުޅެން ލެބްރޮން ކެތް މަދުވެފައި

ފިލަޑެލްފިއާ ސެވަންޓީ ސިކްސަރސްގެ ސަޕޯޓަރުން ކުރިމަތީ ކުޅެން ކެތް މަދުވެފައިވާ ކަމަށް އެޓީމާއި މިސީޒަންގައި އަލަށް ގުޅުނު ތަޖްރިބާކާރު ކުޅުންތެރިޔާ ލެބްރޮން ޖޭމްސް ހާމަކޮށްފިއެވެ.

އޭނާ މިކަން ހާމަކޮށްފައިވަނީ އެންބީއޭ ބާސްކެޓްބޯޅަ މުބާރާތުގެ އާސީޒަން ފެށުމުގެ ކުރިން އާންމުކޮށް ތައާރަފް ކުރުމުގެ ގޮތުން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަމުންނެވެ. ސެވަންޓީ ސިކްސަރސްގެ ޖަރޒީއެއްގައި ލެބްރޮން ފެނިގެންދިޔަ ފުރަތަމަ ފަހަރު ވާހަކަ ދައްކަމުން އޭނާ ބުނީ ސެވަންޓީ ސިކްސާރސްގެ ސަޕޯޓަރުންނަކީ މިކުޅިވަރު ވަރަށް ރަނގަޅަށް އެނގޭ ބައެއް ކަމަށާއި އެސަޕޯޓަރުން ކުރިމަތީ ކުޅުމަށް ކެތް މަދުވެފައިވާކަމަށެވެ. އަދި އޭނާގެ އާއިލާ ދޫކޮށް ފިލަޑެލްފިއާއަށް މިބަދަލުވީ ދެވަނަ ބުރުން ބަލިވާން ނޫން ކަމަށާއި އޭގެ ބަދަލުގައި އެޓީމާއެކު ތަށި ކާމިޔާބު ކުރަން ކަމަށެވެ. އަދި މިކަން ކުރުމަށްޓަކައި މަސައްކަތް ތަކެއް ކުރަން ޖެހޭ ކަމަށާއި އޭނާ ހުރީ އެމަސައްކަތް ޓީމުގެ އެހެން ކުޅުންތެރިންނާއިއެކު ކުރަން ތައްޔާރަށް ކަމަށެވެ.

ސެވަންޓީ ސިކްސަރސް އާއި ލެބްރޮން ޖޭމްސް ގުޅުމުން އެކްލަބްގެ ސަޕޯޓަރުންގެ އިތުރުން ރިޕޯޓަރުންގެ ސަމާލުކަންވަނީ މިކަމަށް ވަރަށް ބޮޑަށް ހުއްޓިގެން ގޮސްފައެވެ. ލެބްރޮންއަކީ މިވަގުތު އެންބީއޭގައި ކުޅޭ އެންމެ ތަޖްރިބާކާރު ކުޅުންތެރިޔާއެވެ. އުމުރުން 41 އަހަރުގައި އޭނާގެ ކެރިއަރުގެ ހަތަރު ވަނަ ޓީމާއި ލެބްރޮން ޖޭމްސް ގުޅިފައިވަނީ އޭނާގެ މުސާރަ ބޮޑުތަނުން ކުޑަކުރުމާވެސް އެކުއެވެ. ބުނެވޭގޮތުގައި އޭނާއަށް ސެވަންޓީ ސިކްސަރސްގައި ހޭދަކުރާ ކޮންމެ ސީޒަނަކަށް ލިބިގެންދާނީ 8 މިލިއަން ޑޮލަރެވެ. އަދި އޭނާވަނީ އެޓީމާއެކު ދެ އަހަރު ދުވަހުގެ އެއްބަސްވުމެއްގައި ސޮއި ކޮށްފައެވެ. އޭނާ އެންމެ ފަހުން ކުޅުނު ލޮސް އެންޖަލިސް ލޭކަރސްގެ ފަހު ސީޒަންގައި އެކަނިވެސް އޭނާއަށް ގާތް ގަނޑަކަށް 52 މިލިއަން ޑޮލަރު ލިބިފައިވެއެވެ. ލެބްރޮންވަނީ އޭނާ ކުރިން ކުޅުނު ތިން ޓީމް ކަމަށްވާ މައާމީ ހީޓް، ކްލީވްލަންޑް ކެވެލިއަރސް އަދި ލޭކަރސް އާއެކުވެސް އެންބީއޭ ކާމިޔާބު ކޮށްފައެވެ. އަދި އެމްވީޕީގެ އިނާމް އޭނާ ހަތަރު ފަހަރު ހާސިލްކޮށްފައިވެއެވެ.

ލެބްރޮން ސެވަންޓީ ސިކްސަރސް އާއި ގުޅިފަވާއިރު އެޓީމުގައި މިވަގުތު ހުރި އެންމެ ފާހަގަ ކޮށްލެވޭ ކުޅުންތެރިޔަކީ ޖޮއެލް އެމްބިޑްއެވެ. ނަމަވެސް އޭނާއަށް ކުރިމަތިވެފައިވާ އަނިޔާތަކުގެ ސަބަބުން ފަހަކަށް އައިސް އެންމެ ރަނގަޅު ކުޅުން އެންބީއޭގައި ދެއްކެމުންދާތަނެއް ނުފެނެއެވެ. ފިލަޑެލްފިއާ ސެވަންޓީ ސިކްސަރސްއިން އެންމެ ފަހުން އެންބީއޭގެ ތަށި ކާމިޔާބު ކުރެވިފައިވަނީ 1983 ވަނަ އަހަރެވެ. އަދި އެކްލަބްގެ ސަޕޯޓަރުން ތިބީ ލެބްރޮންގެ ވާހަކަ ތެދުވެ އެޓީމަށް މިމުބާރާތުގެ ތަށި މިފަހަރު ލިބޭނެކަމުގެ އުންމީދުގައެވެ.

ސެވަންޓީ ސިކްސަރސް އިން އެންބީއޭގެ އާސީޒަން ފެށުމަށް ހަމަޖެހިފައިވަނީ 53 އަހަރަށް ފަހު ފުރަތަމަ ފަހަރަށް މިދިޔަ ސީޒަންގައި ތަށި އުފުލާލި ނިއުޔޯކް ނިކްސް އާއި ދެކޮޅަށެވެ. އަދި މިއީ ލެބްރޮން ޖޭމްސް އެންބީއޭގައި ވާދަކުރާ 24 ވަނަ ސީޒަނެވެ. މިއީ އޭގެ ޒާތުގައިވެސް މުޅިން އާރިކޯޑެކެވެ.