"5 އަހަރުތެރޭގައި ޖަލުތައް ބައިނަލްއަޤުވާމީ މިންގަނޑުތަކަށް ބަދަލުކުރާނަން"

ދިވެހިރާއްޖޭގެ ޖަލުތަކަކީ ބައިނަލްއަޤުވާމީ މިންގަނޑުތަކަށް ފެތޭ އަދި ދިވެހި ރައްޔިތުން ފަޚުރުވެރިވާފަދަ އިޞްލާޙީ މަރުކަޒުތަކަކަށް މި 5 އަހަރުގެ ތެރޭގައި ހައްދަވާނެކަމަށް ދާޚިލީ ސަލާމަތާއި، މަސައްކަތްތެރިކަމާއި ފަންނިއްޔާތާއި ބެހޭ ވަޒީރު ޢަލީ އިޙުސާން ވިދާޅުވެއްޖެއެވެ.

ވަޒީރު މިހެން ވިދާޅުވީ ޕަބްލިކް ސަރވިސް މީޑިއާއިން ކުރިއަށްގެންދިޔަ "އަހާ" ފޯރަމްގައި އާންމު ރައްޔިތަކު ކުރި ސުވާލަކަށް ޖަވާބުދެއްވަމުންނެވެ.

ވަޒީރު އިޙުސާން ވިދާޅުވީ، އަދުގެ ސަރުކާރުން ހަވާލުވިިއިރު ޖަލުތަކުގެ ޖާގަ އޮތީ ވަރަށް ބޮޑަށް މަދުވެފައި ކަމަށެވެ. ނަމަވެސް މިހާތަނަށް ސަރުކާރުން 400 އެއްހާ ޖާގަ ޖަލުތަކަށް އިތުރުކޮށްފައިވާ ކަމަށާއި، މި މަހުގެ ނިޔަލަށް އިތުރު 100 އެއްހާ ޖާގަ އިތުރުކުރެވިގެންދާނެ ކަމަށް ވަޒީރު ފާހަގަކުރެއްވިއެވެ.

ނަމަވެސް ޖަލުގެ ޖާގަ އިތުރުކުރުމުގެ ބޭނުމަކީ އެއްވެސް ހާލެއްގައި ރައްޔިތުންތަކެއް ގައިދުކުރުން ނޫންކަން ފާހަގަކުރައްވައި ވަޒީރު ވިދާޅުވީ، މިވަގުތު ރާއްޖޭގައި އޮތް ކުށުގެ މާހައުލު ބެލެހެއްޓުމަށްޓަކައި، ޖަލަށް ލައިގެން ރިހެބިލިޓޭޓްކޮށްގެން މުޖުތަމަޢަށް ނެރެންޖެހޭ މީހުން ތިބުމުން ޖަލުގައި އެ ކެޕޭސިޓީ ހުންނަންޖެހޭ ކަމަށެވެ.

ޖަލުތަކުގެ ހާލަތު ރަނގަޅުކުރުމަށް ކުރެވުނު މަސައްކަތްތަކަށް އަލިއަޅުއްވާލައްވަމުން ވަޒީރު ވިދާޅުވީ، ސަރުކާރުން ހަވާލުވިއިރު ގިނަ ގޮޅިތަކުގައި ނެތް އަސާސީ ޚިދުމަތްތައްވެސް މި ސަރުކާރުން ހަމަޖައްސަވާފައިވާކަމަށެވެ.

"އަޅުގަނޑުމެން ހަވާލުވި އިރުގައި ޖަލުގެ ގިނަ ގޮޅި ތަކުގައި ކަރަންޓެއް ނެތް، ވައި ދައުރެއް ނުކުރޭ. މިހާލަތުގައި ޖަލުއޮތީ. މިހާރު %100 ޖަލު ގޮޅިތަކުގައި ހުންނާނީ ކަރަންޓު ލެވިފައި. ވައި ދައުރުކުރާނެ. އަދި ބައެއް ގޮޅިތަކުގައި ވާނީ އޭސީވެސް ކުރެވިފައި. އެހެންވީމައި އިރާދަކުރެއްވިއްޔާ ޖަލުތަކަކީ ދިވެހި ރައްޔިތުންނަށް އަމާން، ދިވެހި ރައްޔިތުން ރިހެބިލިޓޭޓް ކުރެވިގެން އަނބުރާ މުޖުތަމައުއަށް ނެރެވޭނެފަދަ ބައިނަލްއަގުވާމީ މިންގަނޑުތަކުން ފާސްވާ، އަދި އަޅުގަނޑުމެންގެ ރައްޔިތުން ފަޚުރުވެރިވާފަދަ އިންސްޓިޓިއުޝަނަލް ކަރެކްޝަނަލް ފެސިލިޓީއަކަށް އަޅުގަނޑުމެން ހަދާނަނަން މި 5 އަހަރުތެރޭ." ދާޚިލީ ވަޒީރު އަލީ އިޙުސާން ވިދާޅުވިއެވެ.

ރައީސުލްޖުމްހޫރިއްޔާ ޑރ މުޙައްމަދު މުޢިއްޒުއަށް އިތުރު ޒަޢާމަތެއް ލިބިއްޖެނަމަ، ރާއްޖޭގެ ކުށުގެ މާހައުލުގައި ތިބޭ މީހުންގެ އަދަދު ބޮޑުތަނުން މަދުކުރެވިގެންދާނެކަމުގެ ޔަޤީންކަންވެސް ވަޒީރު ވަނީ ދެއްވާފައެވެ.

"އަޅުގަނޑުމެން އެދޭ އެދުމަކީ، އަދި އިރާދަކުރައްވައިގެން އަދުގެ ރައީސުލްޖުމްހޫރިއްޔާގެ ޒައާމަތްތައް ކުރިއަށް ލިބިއްޖެއްޔާމު އަޅުގަނޑުމެނަށް މި ބެލެވެނީ ކުރިއަށްއޮތްތަނުގައި ޖަލުގެ ގައިދީންގެ އަދަދު ދުވަހެއް ދުވަހަކަށް ދާނީ މަދުވަމުންނޭ. އަދި ކުށުގެ މާހައުލުގައި ތިބޭ މީހުންވެސް ދާނީ ދުވަހެއް ދުވަހަކަށް މަދުވަމުންނޭ." ދާޚިލީ ވަޒީރު އަލީ އިޙުސާން ވިދާޅުވިއެވެ.

ޖަލުތަކުގެ ކެޕޭސިޓީ އިތުރުކުރުމަށް ކުރެވޭ މަސައްކަތްތަކުގެ ތެރެއިން 370 އެއްހާ އެނދު ޤާއިމުކުރެވިފައިވާކަމަށް މޯލްޑިވްސް ކަރެކްޝަނަލް ސަރވިސްއިންވެސް ވަނީ މީގެ ކުރިން މައުލޫމާތު ދެއްވާފައެވެ. ކަރެކްޝަންސްގެ އަމާޒަކީ މި ދައުރުގެ ތެރޭގައި 500 އެނދަށް ޖާގަ އިތުރުކުރުމެވެ.

ޖަލުތަކުގެ މައްސަލައަށް ދާއިމީ ހައްލެއް ގެނައުމަށް ސަރުކާރުން ރާވަނީ "ވަން ޕްރިޒަން ކޮންސެޕްޓް" ގެ ދަށުން ހުރިހާ ޚިދުމަތެއް އެއްފުރާޅެއްގެ ދަށުން ލިބޭނެ ސެންޓްރަލް ޖަލެއް ތަރައްޤީކޮށްގެންނެވެ. މިހާރު މީހުން ދިރިއުޅޭ، ވަކިން ޚާއްސަކޮށް ލޯކަލް ޓޫރިޒަމް ފުޅާދާއިރާއެއްގައި ކުރަމުންދާ ދެ ރަށެއްގައި ޖަލު ޤާއިމުކޮށްފައި ހުރުމަކީ ސަރުކާރާއި އާންމުންގެވެސް ބޮޑު ކަންބޮޑުވުމެކެވެ. މިކަމަށް އެދެވޭ ހައްލެއް ގެނައުމުގެ ގޮތުން އުތުރު ތިލަފަޅުގައި ޒަމާނީ ޖަލެއް ތަރައްޤީކުރުމަކީ ސަރުކާރުގެ ބޮޑު ތަސައްވުރެކެވެ.