ވެލިދޫ ޖޫނިއަރ ކޮލެޖުގެ މަސައްކަތް ނިމެނީ

ޒުވާނުންނަށް މަސައްކަތާއި ހުނަރު އަދި ތަޢުލީމާއި ތަމްރީނުގެ ފުރުޞަތުތައް ފަހިކުރުމަށް ނ. ވެލިދޫގައި ތަރައްޤީކުރާ ޖޫނިއަރ ކޮލެޖު މަސައްކަތުގެ ބޮޑު ބައެއް ނިންމާލައިފިއެވެ.

މި މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާއި ޙަވާލުކޮށްފައިވަނީ 2023ވަނަ އަހަރުގެ އޯގަސްޓު މަހުގެ ތެރޭގައެވެ.

އެމްޓީސީސީއިން ވިދާޅުވީ މި މަސައްކަތުގެ %70 މަސައްކަތް ނިމިފައިވާކަމަށެވެ. މިހާރު ކުރަމުންދަނީ ކަރަންޓު ވަޔަރު އެޅުމާއި ނަރުދަމާ އެޅުމުގެ މަސައްކަތްކަމަށް ވިދާޅުވިއެވެ.

މި ޖޫނިއަރ ކޮލެޖް ނިމޭއިރު ކިޔަވައިދިނުމަށް ބޭނުންކުރާ ސްމާޓް ކްލާސްރޫމްގެ އިތުރުން އައި.ސީ.ޓީ ލެބޯޓަރީއަކާއި އިދާރީ ޚިދުމަތްތަކަށް ޚާއްޞަ އޭރިއާއަކާއި ލައިބްރަރީ ވެސް ހުންނާނެއެވެ. އަދި މިއިންސްޓިޓިއުޓުގައި ތަފާތު އެކި ދާއިރާތަކުން ވޮކޭޝަނަލް ޕްރޮގްރާމްތައް ހިންގުމަށް މަލްޓިޕާޕަސް ވޯކްޝޮޕްތައްވެސް ތަރައްޤީ ކުރާނެއެވެ.

Project Update: Construction of a junior college at N. Velidhoo

Electrical wiring and sewerage works are ongoing. Overall project progress is 70%.

Follow more updates at: https://t.co/RjAFCf3rnI#MTCCProjects #TeamMTCC #RayyithungeKunfuni #GaumuBinaakurumugaaMTCC pic.twitter.com/8NmDnVmQpT

— MTCC Plc (@MTCCPlc) September 28, 2026

ދިވެހި ޒުވާނުންނަށް މަސައްކަތާއި ހުނަރުގެ ތަޢުލީމާއި ތަމްރީނުގެ ފުރުޞަތުތައް ފަހިކުރުމަކީ ސަރުކާރުން އިސްކަމެއްދެއްވައިގެން ކުރައްވާ މަސައްކަތެކެވެ.

ޓިވެޓް ސެންޓަރުތަކާއި، ޖޫނިއަރ ކޮލެޖްތަކުގެ މަސައްކަތް ރާއްޖޭގެ އެކި ސަރަޙައްދުގައި އަންނަނީ ކުރިއަށްގެންދަމުންނެވެ. ނ،ވެލިދޫގެ އިތުރުން ހއ.ދިއްދޫގައި ޖޫނިއަރ ކޮލެޖެއް ތަރައްޤީކުރުމުގެ މަޝްރޫއާއި ރ.އަލިފުށީގައި ޓިވެޓް ސެންޓަރެއް އިމާރާތް ކުރުމުގެ މަސައްކަތުގެ ބޮޑުބައެއް މިހާރުވަނީ ނިމިފައެވެ.

އަތޮޅުތަކުގައި މަތީތަޢުލީމާއި ތަމްރީނުގެ ފުރުޞަތުތައް ފަހިކުރުމަށާއި ޚާއްސަކޮށް މަސައްކަތުގެ ތަޢުލީމާއި ތަމްރީން މިހާރަށް ވުރެބޮޑަށް ފުޅާކުރެއްވުމަށް ތަފާތު ގިނަ މަސައްކަތްތަކެއް މިސަރުކާރުން ގެންދަވަނީ ކުރައްވަމުންނެވެ. ނ. ވެލިދޫގައި ސަރުކާރުން ތަރައްޤީކުރާ ޖޫނިއަރ ކޮލެޖަކީ 11.91 މިލިއަން ރުފިޔާ ޚަރަދުކުރައްވައިގެން ކުރިއަށްގެންދަވާ މަސައްކަތެކެވެ.