ހަނގުރާމަތަކާއި އަނިޔާވެރިކަމުގެ ސަބަބުން 117 މިލިޔަން މީހުން ގެދޮރުދޫކޮށް ގޮސްފައިވާއިރު، ހަނގުރާމަތައް ހުއްޓުވުމަށް ނުފޫޒު ބޭނުންކުރުމަށް އެކުވެރި ދައުލަތްތަކުގެ (އދ) ރެފިއުޖީންނާ ބެހޭ އިދާރާގެ އައު ވެރިޔާ ބަރްހަމް ޞާލިޙް، އދގެ ސަލާމަތީ މަޖިލީހަށް ގޮވާލައްވައިފިއެވެ. ޢިރާޤުގެ ރައީސް ކަމުގެ މަޤާމު ކުރިން ފުރުއްވާފައިވާ، އަދި ރެފިއުޖީއެއްގެ ގޮތުގައި އެތައް އަހަރެއް ހޭދަކުރައްވާފައިވާ ޞާލިޙް، 15 މެންބަރުންގެ މަޖިލީހަށް ދެއްވި ފުރަތަމަ ބަޔާނުގައި ވިދާޅުވީ، އިންސާނީ އެހީދޭ ފަރާތްތަކަށް ޞުލްޙަ ޤާއިމުނުކުރެވޭނެ ކަމުގައެވެ. އަދި، މައްސަލަތައް އިތުރުވަމުންދާއިރު، ސިޔާސީ ޙައްލެއް ހޯދުން އަވަސްކުރަންޖެހޭ ކަމުގައި އޭނާ ވިދާޅުވިއެވެ.
ދުނިޔޭގެ އެންމެ ބޮޑު ކާރިސާ ސޫދާނުގައި ހިނގަމުންދާއިރު، އަސްކަރީ ޙައްލެއް ނެތް އެ ހަނގުރާމަ ހުއްޓުވަން ސަލާމަތީ މަޖިލީހުން އެއްބާރުލުން ދިނުމަށް ޞާލިޙް އެދިވަޑައިގެންނެވިއެވެ. އަދި ކޮންގޯ، ޔޫކްރެއިން އަދި ހުޅަނގު ސަހަރާގައި އިންސާނުންގެ ފުރާނައަށް ނުރައްކާވާ ފަދަ ޙާލަތްތައް ކުރިމަތިވެ، ބޮޑުވަމުންދާ ކަން އޭނާ ފާހަގަކުރެއްވިއެވެ. މީގެއިތުރުން ސޯމާލިއާ، ޔަމަން އަދި ޖިބޫޓީއަށް ކުއްލި އެހީ އިޢުލާނުކުރައްވައި، ޔަމަނުގެ ހަތިޔާރުއެޅި ޙޫޘީ ޖަމާޢަތުން ބަންދުކޮށްފައިވާ އދގެ ހުރިހާ މުވައްޒަފުން ވަގުތުން މިނިވަންކުރުމަށް އޭނާ ވަނީ އިލްތިމާސް ކުރައްވާފައެވެ.
މާލީ އަދި ބުރުކީނާ ފާސޯގައި ހަތަރު މިލިޔަން މީހުން ޙާލުގައި ޖެހިފައިވާއިރު، ބަންގްލަދޭޝްގައި ތިބި 1.2 މިލިޔަން ރޮހިންޔާ ރެފިއުޖީންގެ މަތިން ހަނދާން ނައްތާނުލުމަށް ޞާލިޙް ގޮވާލެއްވިއެވެ. އޭނާ ވިދާޅުވީ، 2017 ވަނަ އަހަރަށްފަހު މުޅި ޖީލެއް ރެފިއުޖީންގެ ގޮތުގައި ބޮޑުވަމުން އަންނަ ކަމަށާއި، މި މައްސަލައިގެ ޙައްލު އޮތީ މިޔަންމާގައި ކަމުގައެވެ. އަދި، އަމިއްލަ ޤައުމަށް އެނބުރި ދިޔުމަށް އެކަށީގެންވާ ރައްކާތެރި މާހައުލެއް އަދިވެސް މިިޔަންމާގެ ރޮހިންޔާ ރެފިއުޖީންނަށް ނެތް ކަން އޭނާ ފާހަގަކުރެއްވިއެވެ.
ރެފިއުޖީން ޙިމާޔަތްކުރުމަށް 1951 ގެ މުއާޙަދާގެ މުހިންމުކަން ހަނދާންކޮށްދެއްވަމުން، 3.8 މިލިޔަން ސޫރިޔާ ރައްޔިތުން އެނބުރި ޤައުމަށް ގޮސްފައިވުމަކީ ކާމިޔާބީއެއްގެ ގޮތުގައި ޞާލިޙް ސިފަކުރެއްވިއެވެ. އަދި، ސޫރިޔާ އަލުން ބިނާކުރުމުގެ ފުރުޞަތު ނަގާނުލުމަށް އޭނާ ގޮވާލެއްވިއެވެ. މީގެއިތުރުން، 2026 ވަނަ އަހަރުގެ ނިޔަލަށް އަފްޣާނިސްތާނުގެ އަށް މިލިޔަން މީހުން އެނބުރި ވަޒަނަށް ދާނެ ކަމަށް ލަފާކުރެވޭއިރު، ރެފިއުޖީންނަށް ދޭ އެހީތެރިކަން ދެމެހެއްޓުމަށް ސަލާމަތީ މަޖިލީހުގެ މެންބަރުންނަށް އޭނާ ވަނީ އިލްތިމާސް ކުރައްވާފައެވެ.