ޓެރަރިޒަމާއި ހައްދުފަހަނަ އަޅާދިއުން ރާއްޖެއިން ނައްތާލުމާއި ގުޅޭގޮތުން ބޭއްވި ސެމިނާގެ ސަބަބުން، ރާއްޖޭގެ ހާލަތާއި ގުޅޭގޮތުން ކުރިން ބޭރުގެ ޤައުމުތަކުން ދެކެމުންދިޔަގޮތް ބަދަލުވެއްޖެ ކަމަށް ޑިފެންސް މިނިސްޓަރ ވިދާޅުވެއްޖެއެވެ.
ޑިފެންސް މިނިސްޓަރ އާދަމް ޝަރީފް ޢުމަރު މިހެން ވިދާޅުވީ، ޓެރަރިޒަމާއި ހައްދުފަހަނައަޅާދިއުން ރާއްޖެއިން ނައްތާލުމަށް ބައިނަލްއަޤްވާމީ ފަރާތްތަކުގެ ތަޖުރިބާ ޙިއްޞާކުރުމަށް ރާއްޖޭގައި ބޭއްވެވި ސެމިނާ ނިންމަވާލެއްވުމަށްފަހު ނޫސްވެރިންނާއި ބައްދަލުކުރައްވާ ވާހަކަފުޅު ދައްކަވަމުންނެވެ.
ޓެރަރިޒަމާއި ހައްދުފަހަނަ އަޅާދިއުން ރާއްޖެއިން ނައްތާލުމަށް ބައިނަލްއަޤްވާމީ ފަރާތްތަކުގެ ތަޖުރިބާ ޙިއްޞާކުރުމަށް ބޭއްވި 2 ދުވަހުގެ ސެމިނާގައި އދ ހިމެނޭހެން ދުނިޔޭގެ 12 ޤައުމަކުން 21 ބައިވެރިން ވަނީ ބައިވެރިވެފައެވެ. މިސެމިނަރ ނިންމަވާލެއްވުމަށްފަހު ނޭޝަނަލް ކައުންޓަރ ޓެރަރިޒަމް ސެންޓަރުގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޑިފެންސް މިނިސްޓަރ އާދަމް ޝަރީފް އުމަރު ވިދާޅުވީ، ރާއްޖެ ފަދަ ކުޑަ ޤައުމެއްގައި ރައީސް އަބްދުﷲ ޔާމީންގެ ގެ އިސްނެންގެވުމާއެކު ކައުންޓަރ ޓެރަރިޒަމް ސެންޓަރެއް އުފައްދަވައި އަހަރެއްވެސް ނުވަނީސް ކުރައްވަމުންގެންދަވާ މަސައްކަތުގެ ސަބަބުން ބައިނަލްއަޤްވާމީ ފެންވަރުގައި ބޮޑެތި މަސައްކަތްތަކެއް ކުރެވެން ފެށިފައިވާ ކަމަށެވެ. އަދި ޓެރަރިޒަމާ ދެކޮޅަށް ދުނިޔޭގެ ޤައުމުތަކާއެކު އިސް ސަފުގައި ރާއްޖެއިން މަސަކަތްތަކެއް ކުރައްވާނެ ކަމުގައި ޑިފެންސް މިނިސްޓަރ ވިދާޅުވިއެވެ.
ޓެރަރިޒަމާއި ހައްދުފަހަނަ އަޅާދިއުމުގެ ކަންކަން ދެނެގަތުމައްޓަކައި ރާއްޖެއިން ހަދާ ބޭސްލައިން ސްޓަޑީ ހެދުމަށްޓަކައި ބޭރުގެ ފަރާތްތަކުގެ އިތުރު އެހީ ލިބިގެންދާނެ ކަމަށްވެސް ޑިފެންސް މިނިސްޓަރ ވިދާޅުވިއެވެ.
މި ނޫސްވެރިންގެ ބައްދަލުވުމުގައި ނޭޝަނަލް ކައުންޓަރ ޓެރަރިޒަމް ސެންޓަރުގެ ޑިރެކްޓަރ ޖެނެރަލް ބްރިގޭޑިއަރ ޖެނެރަލް ޒަކަރިއްޔާ މަންސޫރު ވިދާޅުވީ، ބޮޑެތި ކުށްތަކާއި ބޮޑެތި ޖަރީމާތަކާއި ގުޅޭގޮތުން ސެމިނާގައި ބައިވެރިވި ތަޖުރިބާކާރުން ތަޤުރީރު ކުރެއްވިކަމަށާއި، އެފަދަ ކަންކަމާއި، ރާއްޖެއާ، އަދި ދުނިޔެއާ އޮތްގުޅުމާއި ގުޅޭގޮތުންވެސް އެކި ލެވެލްތަކުގައި މަޝްވަރާ ކުރެވިގެންދިޔަ ކަމަށެވެ. މީގެ އިތުރުން ރާއްޖޭގައި ކުރިއަރާފައިވާ ސިނާއަތުތައް ހިމާޔަތް ކުރުމާއި ގުޅޭގޮތުންވެސް އެހެން ޤައުމުތަކުގެ ތަޖުރިބާ ހިއްސާ ކުރެވުނު ކަމަށް ޒަކަރިއްޔާ މަންސޫރު ވިދާޅުވިއެވެ.